ການນຳພັກ-ລັດ ເຂົ້າວາງພວງມາລາ ໃນໂອກາດວັນຊາດທີ 2 ທັນວາ

1.215 05 ທ.ວ. 2017 ຂ່າວໜ້າ​ໜຶ່ງ
ການນຳພັກ-ລັດ ເຂົ້າວາງພວງມາລາ ໃນໂອກາດວັນຊາດທີ 2 ທັນວາ

ເນື່ອງ​ໃນ​ໂອກາດ​ວັນ​ສະ​ຖາປະ​ນາ​ສາທາລະນະ​ລັດ ປະຊາ​ທິປະ​ໄຕ ປະຊາຊົນ​ລາວ 2 ທັນວາ ຄົບຮອບ 42 ປີ (2/12/1975-2/12/2017) ແລະ ເພື່ອ​ສະແດງຄວາມ​ຮູ້​ບຸນຄຸນ​ຕໍ່​ນັກຮົບ​ປະຕິວັດ ຜູ້​ເສຍສະຫຼະ​ຊີວິດ​ເລືອດ​ເນື້ອ ເຂົ້າ​ໃນ​ຂະ​ບວນ​ການ​ຕໍ່ສູ້​ກູ້​ຊາດ ຍາດ​ເອົາ​ເອກະລາດ ສັນຕິພາບ ແລະ ຜືນ​ແຜ່ນດິນ​ອັນ​ຄົບ​ຖ້ວນ ມາສູ່​ປວງ​ຊົນ​ລາວ​ທັງ​ຊາດ.

ໃນ​ວັນ​ທີ 1 ທັນວາ 2017 ການ​ນຳ​ຂັ້ນ​ສູງ​ພັກ-ລັດ ​ໄດ້​ເຂົ້າວາງ​ພວງມາລາ​ຢູ່​ທີ່​ອະນຸສາວະລີ​ນັກຮົບ​ນິລະນາມ (ດາວ​ແດງ) ທີ່ເດີ່ນ​ສະໜາມ​ຫຼວງ ແລະ ວາງ​ກະຕ່າ​ດອກ​ໄມ້​ຢູ່​ຕໍ່ໜ້າ​ຮູບ​ຫຼໍ່​ປະທານ ໄກສອນ ພົມວິຫານ ທີ່​ພິ​ພິ​ທະ​ພັນ ໄກສອນ ພົມວິຫານ​ ທີ່​ປະກອບ​ມີຫຼາຍ​ຄະນະ​ດັ່ງນີ້:

ຄະນະ​ບໍລິຫານ​ງານ​ສູນ​ກາງພັກ​ນຳ​ໂດຍ​ສະຫາຍ ບຸນ​ຍັງ ວໍລະຈິດ ເລຂາທິການ​ໃຫຍ່​ຄະນະບໍລິຫານ​ງານ​ສູນ​ກາງ​ພັກ ປະຊາຊົນ​ປະຕິວັດ​ລາວ ປະທານ​ປະເທດ ຄະນະ​ສະພາ​ແຫ່ງ​ຊາດ ນຳ​ໂດຍສະຫາຍ ພົນ​ໂທ ແສງ​ນວນ ໄຊຍະ​ລາດ ຄະນະ​ເລຂາທິການ​ສູນກາງ​ພັກ ຮອງ​ປະທານ​ສະພາແຫ່ງ​ຊາດ ຄະນະ​ລັດຖະບານ​ນຳໂດຍ​ສະຫາຍ ທອງ​ລຸນ ສີ​ສຸ​ລິດ ກຳມະການ​ກົມ​ການເມືອງ​ສູນກາງ​ພັກ ນາຍົກລັດຖະມົນຕີ ຄະນະ​ສູນ​ກາງ​ແນວ​ລາວ​ສ້າງຊາດ ແລະ ອົງ​ການຈັດຕັ້ງ​ມະຫາຊົນ​ນຳ​ໂດຍ​ສະຫາຍ ໄຊ​ສົມ​ພອນ ພົມວິຫານ ກຳມະການ​ກົມ​ການເມືອງ​ສູນ​ກາງ​ພັກ ປະທານ​ສູນກາງ​ແນວ​ລາວ​ສ້າງ​ຊາດ ຄະນະນຳ​ກະຊວງ​ປ້ອງ​ກັນ​ປະເທດ ນຳໂດຍ​ສະຫາຍ ພົນ​ໂທ ຈັນ​ສະໝອນ ຈັນ​ຍາ​ລາດ ກຳມະການກົມ​ການເມືອງ​ສູນ​ກາງ​ພັກ ລັດຖະ​ມົນຕີ​ກະຊວງ​ປ້ອງ​ກັນ​ປະເທດ ຄະນະ​ນຳ​ກະຊວງປ້ອງ​ກັນ​ຄວາມສະຫງົບ ນຳ​ໂດຍ​ສະຫາຍ ພົນ​ຕີ ສົມ​ແກ້ວ ສີ​ລາ​ວົງ ຄະນະ​ເລຂາທິ​ການ​ສູນ​ກາງ​ພັກ ລັດຖະມົນຕີກະຊວງ​ປ້ອງ​ກັນ​ຄວາມ​ສະຫງົບ ແລະ ຄະນະ​ພັກ-ອົງການ​ປົກຄອງ​ນະຄອນຫຼວງ​ວຽງ​ຈັນ​ນຳ ໂດຍ​ສະຫາຍ ສິນ​ລະ​ວົງ ຄຸດ​ໄພທູນ ກຳມະການ​ກົມ​ການເມືອງສູນ​ກາງ​ພັກ ເລຂາ​ຄະນະ​ພັກ ເຈົ້າ​ຄອງ​ນະຄອນຫຼວງ​ວຽງ​ຈັນ.

ການ​ເຂົ້າ​ວາງ​ພວງມາລາຄັ້ງ​ນີ້​ ເພື່ອ​ລະນຶກ​ເຖິງ​ຄຸນ​ງາມຄວາມ​ດີ​ຂອງ​ນັກຮົບ​ວິລະ​ຊົນ​ປະຕິວັດ ​ຜູ້​ທີ່​ເສຍສະຫຼະ​ຊີວິດ ແລະ ເລືອດ​ເນື້ອ​ເພື່ອ​ຊາດ​ເພື່ອ​ປະຊາຊົນ​ ໃນ​ການ​ຕໍ່ສູ້​ກູ້​ຊາດ​ ຍາດ​ເອົາເອກະລາດ ອະທິປະ​ໄຕ​ມາ​ໃຫ້​ປະຊາ​ຊົນ​ລາວ​ບັນດາເຜົ່າ ເຊິ່ງ​ຄຸນງາມ​ຄວາມ​ດີ​ເຫຼົ່ານັ້ນ​ໄດ້​ຈາລຶກໄວ້​ໃນ​ໜ້າ​ປະຫວັດສາດ ແລະ ຄວາມ​ຊົງ​ຈຳ​ຂອງ​ກອງທັບ ແລະ ປະຊາຊົນ​ບັນດາເຜົ່າ​ບໍ່​ມີ​ວັນ​ຫຼົງລືມ​ໄດ້ ເຊິ່ງ​ຄວາມ​ພິລະ​ອາດຫານ ​ເດັດດ່ຽວ​ໜຽວ​ແໜ້ນ​ຂອງນັກຮົບ​ວິລະ​ຊົນ​ແມ່ນ​ສິ່ງ​ທີ່​ຄົນ​ຮຸ່ນຫຼັງ​ ຕ້ອງ​ໄດ້​ສຶກ​ສາ​ຄົ້ນຄວ້າ ຮ່ຳຮຽນ​ຄຸນສົມບັດ ສິນ​ທຳ​ປະຕິວັດ ເພື່ອ​ສືບຕໍ່​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດຊາດ​ຂອງ​ພວກ​ເຮົາ ​ໃຫ້​ຈະເລີນ​ຮຸ່ງເຮືອງ​ສີວິໄລ​ເປັນ​ກ້າວໆ ນຳ​ເອົາຄວາມ​ຢູ່​ເຢັນ​ເປັນ​ສຸກ ແລະ ຄວາມ​ອີ່ມ​ໜຳ​ສຳລານ​ມາ​ໃຫ້​ປະຊາ​ຊົນ​ບັນດາເຜົ່າ ແລະ ນຳພາປະເທດ​ຊາດ​ຫຼຸດ​ພົ້ນ​ອອກ​ຈາກຄວາມ​ດ້ອຍ​ພັດທະນາ ໃນ​ປີ 2020.

ຂ່າວທີ່ກ່ຽວຂ້ອງ