ຖືກຈັບຂະນະນຳເອົາຢາບ້າ-ຢາໄອສ໌ໄປສົ່ງໃຫ້ຜູ້ສັ່ງຊື້

101 06 ທ.ວ. 2017 ຂ່າວໜ້າ​ໜຶ່ງ

ເຈົ້າ​ໜ້າທີ່​ໜ່ວຍ​ງານ​ຕຳຫຼວດສະກັດ​ກັ້ນ ແລະ ຕ້ານ​ຢາ​ເສບ​ຕິດ ກອງ​ບັນຊາ​ການ ​ປກສ ເມືອງ​ສີໂຄດ​ຕະບອງ ນະຄອນຫຼວງ​ວຽງຈັນ ໄດ້​ກັກ​ຕົວ​ທ້າວ ຄຳ​ພາສິດ ຫຼື ຕ໋າມ ອາຍຸ 26 ປີ ປະຊາຊົນຢູ່ບ້ານ​ສະໂນ​ຄຳ ເມືອງ​ສີ​ໂຄດ​ຕະບອງ ພ້ອມ​ຂອງ​ກາງ​ຢາ​ບ້າ ຈຳນວນ 472 ເມັດ ແລະ ຢາ​ໄອສ໌ 15 ຖົງ ນ້ຳໜັກ 15 ກຣາມ ໄປສອບ​ສວນ​ຂະຫຍາຍ​ຜົນ​ຫາ​ຜູ້ຮ່ວມ​ຂະ​ບວນ​ການ​ນຳ​ກັນ​ມາ​ດຳເນີນ​ຄະດີ.

ທ່ານ ​ພັຕ ຄຳ​ວິ​ເສີດ ສຸ​ລິ​ວົງ ຮອງ​ຫົວໜ້າ​ໜ່ວຍ​ງານ​ຕຳຫຼວດສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ເມືອງ​ສີ​ໂຄດ​ຕະບອງ ໄດ້ໃຫ້​ຮູ້​ວ່າ: ໃນ​ວັນ​ທີ 8 ພະຈິກ 2017 ໄດ້​ນຳ​ກຳລັງ​ວິຊາ​ສະເພາະ ລົງ​ກວດກາ​ລາດຕະເວນ​ຢູ່​ຂອບເຂດ​ບ້ານ​ໜອງ​ສະໂນ​ຄຳ ເຂດບ້ານ​ສີ​ຊົມຊື່ນ ພາຍຫຼັງ​ໄດ້​ຮັບລາຍ​ງານ​ຈາກ​ພົນລະເມືອງ​ດີວ່າ: ຈະ​ມີ​ໄວ​ລຸ້ນ​ນຳ​ເອົາ​ຢາ​ເສບຕິດ​ໄປ​ສົ່ງ​ໃຫ້​ຜູ້​ສັ່ງ​ຊື້​ຢູ່​ເຂດ​ບ້ານດັ່ງກ່າວ ຜ່ານ​ການ​ຕິດຕາມ​ພົບເຫັນ​ເປົ້າ​ໝາຍ​ທີ່​ຖືກ​ສົງໄສ​ເປັນ​ຜູ້ຊາຍ 1 ຄົນ ຂັບ​ຂີ່​ລົດ​ເວບ 100 ບໍ່ມີ​ປ້າຍ​ທະບຽນ ມຸ່ງ​ໜ້າ​ໄປ​ທາງບ້ານ​ສີ​ຊົມຊື່ນ ເຈົ້າ​ໜ້າທີ່​ຈຶ່ງ​ໄດ້ສະກັດ​ລົດ​ເພື່ອ​ກວດ​ຄົ້ນ​ເປົ້າ​ໝາຍ ພົບ​ເຫັນ​ຢາ​ບ້າ​ທີ່​ເຊື່ອງ​ໄວ້​ໃນ​ຖົງສົ້ງ ຈຳນວນ 400 ເມັດ ພ້ອມທັງ​ປະສານ​ສົມທົບ​ກັບ​ອຳນາດການ​ປົກຄອງບ້ານ​ໜອງ​ສະໂນຄຳ ເຂົ້າ​ກວດ​ຄົ້ນ​ຫ້ອງ​ນອນ​ຢູ່ເຮືອນ​ຂອງ​ຜູ້ກ່ຽວພົບ​ຢາ​ບ້າ ແລະ ຢາ​ໄອສ໌ 15 ຖົງ​ນ້ອຍ.

ຜ່ານ​ການ​ສອບ​ສວນຂອງເຈົ້າ​ໜ້າທີ່ ທ້າວ ຄຳ​ພາສິດ ຮັບສາລະພາບ​ວ່າ: ຢາ​ບ້າ ແລະ ຢາໄອສ໌ ທີ່​ເຈົ້າ​ໜ້າທີ່​ຢຶດ​ໄດ້​ແມ່ນຂອງ​ຕົນ​ແທ້ ໂດຍ​ໄດ້​ຊື້​ມາ​ຈາກ​ຜູ້ຮ່ວມ​ຂະ​ບວນ​ການ​ນຳ​ກັນ ເພື່ອຈະ​ເອົາ​ໄປ​ສົ່ງຕໍ່​ໃຫ້​ຜູ້​ສັ່ງ​ຊື້​ຢູ່​ບ້ານ​ສີ​ຊົມຊື່ນ ຜູ້ກ່ຽວ​ໄດ້​ພົວພັນ​ກັບ​ຢາເສບ​ຕິດ​ມາ​ແຕ່​ປີ 2015 ເສບ​ມື້ລະ 3-4 ເມັດ ໂດຍ​ມີ​ໝູ່ຄູ່​ເປັນ​ຜູ້ຊັກ​ຊວນ​ເສບ ມາ​ຮອດ​ຕົ້ນ​ປີ 2017 ຈຶ່ງ​ເລີ່ມ​ປ່ຽນ​ຈາກ​ຜູ້​ເສບມາ​ເປັນ​ຜູ້​ຂາຍ ໂດຍ​ເລີ່ມ​ຂາຍເທື່ອ​ທຳ​ອິດ​ຄັ້ງ​ລະ 50 ເມັດ ໃນອາທິດ​ໜຶ່ງ​ຈະ​ນຳ​ມາ​ຂາຍ​ເຖິງ 4-5 ຄັ້ງ ປັດຈຸບັນ ຄະດີ​ດັ່ງກ່າວຍັງ​ຢູ່​ໃນ​ຂັ້ນ​ຕອນ​ການ​ສືບສວນ-ສອບ​ສວນ​ຂອງ​ເຈົ້າ​ໜ້າທີ່ ເພື່ອຊອກ​ຫາ​ກຸ່ມ​ແກ້ງ​ທີ່​ຮ່ວມ​ຂະ​ບວນການ​ດຽວ​ກັນ ເພື່ອ​ຕິດຕາມ​ຈັບຕົວ​ມາ​ດຳເນີນ​ຄະດີ​ຕາມ​ກົດໝາຍ.

ຂ່າວທີ່ກ່ຽວຂ້ອງ