ຂ່າວຫຼ້າສຸດ

ລັດຖະບານເຄັ່ງຮ້ອນ ປະຕິບັດຄວາມຮັບຜິດຊອບຢ່າງເຂັ້ມຂຸ້ນ

1.008 08 ທ.ວ. 2017 ຂ່າວໜ້າ​ໜຶ່ງ
ລັດຖະບານເຄັ່ງຮ້ອນ ປະຕິບັດຄວາມຮັບຜິດຊອບຢ່າງເຂັ້ມຂຸ້ນ

ກອງ​ປະຊຸມ​ລັດຖະບານ​ສະໄໝ​ສາມັນ ປະຈຳ​ເດືອນ​ພະຈິກ 2017 ໄດ້​ໄຂ​ຂຶ້ນ​ຢ່າງ​ເປັນ​ທາງການ​ໃນ​ວັນ 6-7 ທັນວາ 2017 ທີ່​ຫ້ອງ​ວ່າການ​ສຳນັກງານ​ນາຍົກ​ລັດຖະມົນຕີ ພາຍ​ໃຕ້​ການເປັນ​ປະທານ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ມີ​ບັນດາ​ທ່ານ​ຮອງ​ນາຍົກລັດຖະມົນຕີ ສະມາຊິກ​ລັດຖະບານ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ໃນ​ຄັ້ງ​ນີ້ ພ້ອມ​ກັນປຶກສາ​ຫາລື ພິຈາລະນາ​ຮັບຮອງເອົາ 4 ຫົວຂໍ້​ໃຫຍ່: ທິດ​ທາງ​ການຊຸກຍູ້​ການຈັດຕັ້ງ​ປະຕິບັດ ແລະ ເສີມ​ຂະຫຍາຍ​ການ​ຮ່ວມ​ມື ລາວ-ຈີນ ແລະ ລາວ-ຫວຽດນາມ ທິດ​ທາງ​ຜັນ​ຂະຫຍາຍ​ມະຕິ​ກອງປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ການ​ສົ່ງເສີມ​ການ​ຜະລິດ​ພາຍ​ໃນ ທິດ​ທາງ​ການ​ແກ້​ໄຂ​ບັນຫາການອຳນວຍ​ຄວາມ​ສະດວກ​ໃຫ້​ແກ່ການ​ລົງທຶນ ແລະ ດຳເນີນ​ທຸລະກິດຢູ່ ​ສປປ ລາວ.

ວຽກ​ງານ​ຈຸດ​ສຸມ​ໃນ​ເດືອນ​ທັນວາ 2017 ທ່ານ​ນາຍົກ​ລັດ​ຖະ​ມົນຕີ​ໄດ້​ຊີ້​ນຳ​ວ່າ: ສືບຕໍ່​ຮັກສາ​ຄວາມສະຫງົບ ແລະ ແກ້​ໄຂ​ປາກົດການຫຍໍ້ທໍ້​ທາງ​ສັງຄົມ ຕອບ​ຕ້ານ​ທຸກກົນອຸບາຍ ເລ່ຫຼ່ຽມ ແລະ ການເຄື່ອນ​ໄຫວ​ກໍ່​ຄວາມ​ບໍ່​ສະຫງົບຂອງ​ພວກ​ຄົນ​ບໍ່​ຫວັງ​ດີ ສືບຕໍ່​ຕິດຕາມ​ຢ່າງ​ໃກ້ຊິດ​ສະພາບ​ການພາກ​ພື້ນ ແລະ ສາກົນ ທີ່​ກຳລັງຜັນ​ແປ​ໄປ​ຢ່າງ​ສະຫຼັບ​ສັບ​ຊ້ອນ ແລະ ອາດ​ມີ​ຜົນ​ກະທົບ​ທາງດ້ານ​ການເມືອງ ເສດຖະກິດ ແລະ ສັງຄົມ​ຕໍ່​ປະເທດ​ເຮົາ ໃຫ້ເອົາໃຈໃສ່​ວິເຄາະ​ວິໄຈ ແລະ ກຳນົດ​ທັດສະນະ​ໃຫ້​ເໝາະ​ສົມ ພ້ອມທັງ​ກະກຽມ​ປ້ອງ​ກັນ​ຄວາມ​ສ່ຽງຕ່າງໆ​ທີ່​ອາດ​ຈະ​ເກີດ​ຂຶ້ນ ສືບຕໍ່ສູ້​ຊົນ​ຈັດ​ຕັ້ງ​ປະຕິບັດ​ແຜນການທີ່​ຍັງ​ບໍ່​ທັນ​ບັນລຸ​ໄດ້​ຕາມ​ຄາດໝາຍ ສືບຕໍ່​ຄຸ້ມ​ຄອງ​ເສດຖະກິດມະຫາ​ພາກໃຫ້​ມີ​ສະຖຽນ​ລະພາບ ຕິດຕາມອຳນວຍ​ຄວາມສະດວກ ຊຸກຍູ້ ແລະ ແກ້​ໄຂ​ບັນຫາ​ທີ່​ຕິດ​ພັນ​ກັບ​ໂຄງການ​ລົງທຶນ ແລະ ໂຄງການ​ພັດທະນາ​ຂະໜາດ​ໃຫຍ່​ຕ່າງໆ ສືບຕໍ່​ສ້າງ ແລະ ປັບປຸງ​ບັນດາ​ນິຕິ​ກຳ ເອົາໃຈ​ໃສ່​ວຽກ​ງານ​ປັບປຸງ ແລະ ພັດທະ​ນາ​ສີມື​ແຮງ​ງານ ຄຸ້ມ​ຄອງແຮງ​ງານ​ຕ່າງປະເທດ ໃຫ້​ເຄື່ອນໄຫວ​ສອດຄ່ອງ​ກັບ​ກົດໝາຍ ແລະ ລະບຽບ​ການກະກຽມ​ຊຸກ ຍູ້​ການ​ຜະລິດ​ລະດູແລ້ງ​ໃຫ້​ທັນກັບ​ລະດູ​ການ ເປັນຕົ້ນແມ່ນ ການ​ສະໜອງ​ແນວ​ພັນ ການ​ສະໜອງ​ນ້ຳ​ເຂົ້າ​ໃນ​ພື້ນ​ທີ່​ການ​ຜະລິດ ແລະ ການ​ຊ່ວຍເຫຼືອ​ທາງດ້ານ​ເຕັກນິກ​ວິຊາ​ການ​ທີ່​ຈຳເປັນໃຫ້​ແກ່​ຊາວ​ກະສິກອນ ສືບຕໍ່​ຕິດຕາມ ຈັດ​ຕັ້ງການ​ເຝົ້າ​ລະວັງ ແລະ ປ້ອງ​ກັນ​ເຊື້ອ​ພະຍາດ​ໄຂ້ຫວັດ​ສັດ​ປີກ (H5N1 H7N9) ໄຂ້ຍຸງ​ລາຍ ແລະ ພະຍາດ​ຕາມລະດູ​ການ​ຕ່າງໆ ສືບຕໍ່​ເອົາໃຈໃສ່ໂຄສະນາ​ເຜີຍແຜ່​ກ່ຽວ​ກັບ​ການເປັນ​ເຈົ້າພາບ​ທີ່​ດີ ໃນ​ປີ​ທ່ອງ​ທ່ຽວລາວ 2018 ຢ່າງ​ກວ້າງຂວາງທົ່ວ​ເຖິງ ໂດຍ​ສຸມ​ໃສ່​ຄົ້ນຄວ້າ​ນຳໃຊ້​ທ່າແຮງ​ບົ່ມ​ຊ້ອນ​ທີ່​ປະເທດເຮົາ​ມີ ປັບປຸງ ແລະ ໂຄສະນາ​ສະຖານ​ທີ່​ທ່ອງ​ທ່ຽວ ປັບປຸງ​ການ​ບໍລິ​ການ​ໃຫ້​ສະດວກ​ວ່ອງໄວ ແກ້ໄຂ​ສິ່ງ​ອັດ​ຕັນ ແລະ ປ້ອງ​ກັນຄວາມ​ສ່ຽງ​ດ້ານ​ຕ່າງໆ ເພື່ອ​ດຶງດູດ​ນັກ​ທ່ອງ​ທ່ຽວ​ໄດ້​ຕາມ​ຄາດໝາຍ​ກຳນົດ (5,2 ລ້ານ​ຄົນ ໃນປີ 2018) ສືບຕໍ່​ເພີ່ມ​ທະວີ​ການຕິດຕາມ​ກວດກາ ແກ້​ໄຂ​ສະພາບຫຍໍ້ທໍ້​ຕ່າງໆ​ໃນ​ກົງຈັກ​ການ​ຈັດຕັ້ງ ແລະ ຖັນ​ແຖວ​ພະນັກງານ-ລັດຖະກອນ ເຮັດ​ໃຫ້ການ​ປະຕິບັດ​ໜ້າທີ່​ມີ​ຄວາມ​ວ່ອງໄວ ໂປ່ງໃສ ແລະ ມີ​ປະ​ສິດທິ​ຜົນ​ສູງ​ຂຶ້ນ.

ພ້ອມ​ນີ້ ໃຫ້​ບັນດາ​ທ່ານ​ສະມາ​ຊິກ​ລັດຖະບານ ເພີ່ມ​ຄວາມເອົາໃຈໃສ່ ແລະ ລົງ​ເລິກ​ຊີ້​ນຳ ນຳພາ​ກົງຈັກ-ການຈັດຕັ້ງ ແລະ ພະນັກງານ​ນຳພາຄຸ້ມ​ຄອງ ທີ່ຂຶ້ນ​ກັບ​ຄວາມ​ຮັບຜິດຊອບ​ຂອງຕົນ ໃຫ້​ປະຕິບັດ​ວຽກ​ງານ​ຈຸດ​ສຸມທີ່​ຍັງ​ຄ້າງ​ຄາ​ໃຫ້​ມີ​ປະ​ສິດທິ​ຜົນ ຫຼຸດຜ່ອນ​ການ​ໄປ​ເຄື່ອນ​ໄຫວ​ວຽກງານ​ຕ່າງປະເທດທີ່​ບໍ່​ຈຳເປັນ​ລົງຕື່ມ ມອບ​ໃຫ້​ບັນດາ​ກະຊວງ ​ອົງການ​ລັດ​ທຽບ​ເທົ່າ​ກະຊວງ ແລະ ອຳນາດ​ການ​ປົກຄອງ​ທ້ອງຖິ່ນ ​ຜັນຂະຫຍາຍ ແລະ ຈັດ​ຕັ້ງ​ປະຕິບັດ ເນື້ອ​ໃນ ແລະ ທິດ​ຊີ້​ນຳ​ຂອງ​ກອງປະຊຸມ​ລັດຖະບານ​ຄັ້ງ​ນີ້​ ໃຫ້​ມີ​ປະສິດທິ​ຜົນ.

ຂ່າວທີ່ກ່ຽວຂ້ອງ