ສະຫຼອງວັນຕ້ານການສໍ້ລາດບັງຫຼວງສາກົນ

517 11 ທ.ວ. 2017 ຂ່າວໜ້າ​ໜຶ່ງ
ສະຫຼອງວັນຕ້ານການສໍ້ລາດບັງຫຼວງສາກົນ

ບັນຫາ​ການ​ສໍ້​ລາດ​ບັງ​ຫຼວງ ເປັນ​ສະພາບ​ຫຍໍ້ທໍ້​ໜຶ່ງ​ໃນ​ກົງຈັກການຈັດຕັ້ງ ຖື​ເປັນ​ໄພ​ອັນຕະລາຍຮ້າຍ​ແຮງ ສົ່ງ​ຜົນ​ກະທົບ​ທັງ​ທາງກົງ ແລະ ທາງ​ອ້ອມ ເປັນ​ບັນຫາທີ່​ກົດ​ໜ່ວງ​ການ​ພັດທະນາ​ເສດຖະ​ກິດ-ສັງຄົມ​ຂອງ​ຫຼາຍ​ປະເທດທົ່ວ​ໂລກ ໂດຍ​ການ​ສໍ້​ລາດ​ບັງຫຼວງ ມີ​ຫຼາຍ​ຮູບ​ແບບ​ທີ່​ພົ້ນ​ເດັ່ນແມ່ນ​ການ​ສວຍ​ໃຊ້​ໜ້າທີ່ ເພື່ອ​ຫາປະໂຫຍດ​ໃຫ້​ແກ່​ຕົນ​ເອງ ສ້າງຄວາມ​ເສຍ​ຫາຍ​ແກ່​ພາກ​ລັດ ການ​ຮັບ ແລະ ໃຫ້​ສິນ​ບົນ ລວມທັງ​ການ​ນຳ​ໃຊ້​ຊັບ​ສິນ​ຂອງ​ລັດໂດຍ​ບໍ່​ຖືກ​ເປົ້າ​ໝາຍເປັນຕົ້ນ ດັ່ງນັ້ນ ເພື່ອ​ເປັນ​ການ​ຕ້ານ​ປາກົດການ​ຫຍໍ້ທໍ້​ເຫຼົ່າ​ນີ້​ໃຫ້​ຫຼຸດ​ໜ້ອຍຖ້ອຍ​ລົງ ກອງ​ປະຊຸມ​ໃຫຍ່​ສະຫະປະຊາ​ຊາດ ປີ 2000 ໄດ້​ກຳນົດຄວາມ​ຈຳເປັນ​ຕ້ອງ​ມີ​ກົດໝາຍ​ທີ່ມີ​ຜົນ​ສັກສິດ​ ໃນ​ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ​ຢູ່ໃນ​ໂລກ ເຊິ່ງ​ໄດ້​ສ້າງຕັ້ງ​ຄະນະກຳມະການ​ຮ່າງ​ກົດ​ບັດ​ຂອງ​ສະຫະ​ປະຊາ​ຊາດ ກ່ຽວ​ກັບ​ການຕ້ານ​ການ​ສໍ້​ລາດ​ບັງ​ຫຼວງ ພ້ອມກັບ​ສ້າງ​ສົນທິສັນຍາ​ສະຫະ​ປະຊາຊາດ ວ່າ​ດ້ວຍ​ການ​ຕ້ານ​ການ​ສໍ້ລາດ​ບັງ​ຫຼວງ ໂດຍ​ໄດ້​ຮັບ​ການຮັບຮອງ​ເປັນ​ເອກະສັນ ໃນ​ປີ 2003 ຢູ່​ທີ່​ນິວ​ຢອກ ປະເທດ​ອາເມ​ຣິ​ກາ ມາ​ຮອດ​ປັດຈຸບັນ ມີ​ສະມາ​ຊິກ​ທັງ​ໝົດ 178 ປະເທດ 183 ພາຄີ ແລະ ​ສປປ ລາວ ກໍ່​ໄດ້​ເຂົ້າເປັນ​ສະມາຊິກ​ແຕ່​ປີ 2003 ແລະ ໃຫ້​ສັດຕະຍາບັນ ໃນ​ວັນ​ທີ 25 ກັນຍາ 2009 ເປັນຕົ້ນ​ມາ.

ອົງການ​ກວດກາ​ລັດຖະບານ ແລະ ຕ້ານ​ການ​ສໍ້​ລາດ​ບັງ​ຫຼວງ ຈັດ​ງານ​ສະເຫຼີມສະຫຼອງ​ວັນ​ຕ້ານການ​ສໍ້​ລາດ​ບັງ​ຫຼວງ​ສາກົນ ຄົບຮອບ 14 ປີ (9 ທັນວາ 2003-9 ທັນວາ 2017) ວັນ​ທີ 8 ທັນວາ 2017 ຢູ່​ສະໂມສອນ​ຄະນະ​ກວດກາ​ສູນ​ກາງ​ພັກ ມີ​ທ່ານ ສີ​ໄນ ມຽງ​ລາ​ວັນ ຮອງ​ປະທານ​ອົງການ​ກວດກາ​ລັດຖະບານ ແລະ ຕ້ານ​ການ​ສໍ້​ລາດ​ບັງ​ຫຼວງ ທ່ານ ເອີ​ເລນ ໂອ​ດູ​ສັນຟອນ ຜູ້​ຕາງໜ້າ​ຈາກ​ອົງການ​ສະຫະ​ປະຊາຊາດ ເພື່ອ​ຕ້ານ​ຢາ​ເສບ​ຕິດ ແລະ ອາ​ຊະ​ຍາ​ກຳ​ຂ້າມ​ຊາດ ປະຈຳ ​ສປປ ລາວ ພ້ອມ​ດ້ວຍ​ບັນດາ​ຫົວໜ້າ​ກົມ ຫ້ອງການ ແລະ ພະນັກງານ-ວິຊາ​ການ​ກ່ຽວຂ້ອງ.

ສຳລັບ ​ສປປ ລາວ ພັກ-ລັດຖະ​ບານ ໄດ້​ຖື​ເອົາ​ການ​ຕ້ານ ແລະ ການ​ແກ້​ໄຂ​ທີ່​ຕ້ອງ​ໄດ້​ປະຕິບັດ​ຢ່າງ​ເຂັ້ມ​ງວດ ເຊິ່ງ​ແຕ່​ປີ 2013 ເປັນຕົ້ນ​ມາ ໄດ້​ກວດ​ພົບເຫັນ​ຜົນ​ເສຍ​ຫາຍ​ຈາກ​ກໍລະນີສໍ້​ລາດ​ບັງ​ຫຼວງ ທີ່​ເຮັດ​ໃຫ້​ລັດ​ເສຍຜົນ​ປະໂຫຍດ ມູນ​ຄ່າ 480,49 ຕື້ກີບ ເກັບ​ກູ້​ຄືນ​ໄດ້ 337,99 ຕື້​ກີບ ໃນ​ນັ້ນ ສະເພາະ​ຄວາມ​ເສຍ​ຫາຍຈາກ​ການ​ປະຕິບັດ​ໂຄງການ ແລະ ການ​ສໍ້​ໂກງ​ຊັບ​ສິນ​ຂອງ​ລັດ ມີ​ຈຳນວນ 417,21 ຕື້​ກີບ ເກັບ​ກູ້ຄືນ​ໄດ້ 289,49 ຕື້​ກີບ ມີ​ຜູ້​ກະທຳຜິດ​ກົດໝາຍ ຈຳນວນ 107 ຄົນ ໃນ​ນັ້ນ ພະນັກງານ​ລັດ 86 ຄົນ ແລະ ພະນັກງານ​ບໍລິສັດ 21 ຄົນ ຖືກ​ສານ​ຕັດສິນ​ແລ້ວ ຈຳນວນ 13 ຄົນ.

ຂ່າວທີ່ກ່ຽວຂ້ອງ