ຂ່າວຫຼ້າສຸດ

ມອບເງິນອຸດໜູນໃຫ້ພະນັກງານນັກປະຕິວັດອາວຸໂສ

402 11 ທ.ວ. 2017 ຂ່າວໜ້າ​ໜຶ່ງ
ມອບເງິນອຸດໜູນໃຫ້ພະນັກງານນັກປະຕິວັດອາວຸໂສ

ພະ​ແນກ​ແຮງ​ງານ ແລະ ສະຫວັດ​ດີ​ການ-ສັງຄົມ ນະຄອນຫຼວງວຽງ​ຈັນ (​ຮສສ.ນວ) ຈັດ​ພິທີມອບ-ຮັບນະໂຍບາຍ​ເງິນ​ປ່ຽນແທນ​ໂກ​ຕ້າ​ລົດ ນະໂຍບາຍ​ກູ້​ຢືມເງິນ ​ເພື່ອ​ປຸກ​ສ້າງ-ສ້ອມແປງເຮືອນ ແລະ ນະໂຍບາຍ​ເງິນ​ອຸດໜູນ​ເທື່ອ​ດຽວ​ຜູ້​ຍັງ​ມີ​ຊີວິດ ​ຕາມດຳລັດ 272/​ລບ ປະຈຳ​ປີ 2017 ຂຶ້ນ​ວັນ​ທີ 08 ທັນວາ 2017 ຜ່ານມາ ຢູ່​ທີ່​ພະ​ແນກ​ຂອງ​ຕົນ ໂດຍການ​ເປັນ​ປະທານ​ຮ່ວມ​ຂອງ​ທ່ານນາງ ລຳ​ພອຍ ສີ​ອັກ​ຄະ​ຈັນ ຫົວໜ້າ​ພະ​ແນກ ​ຮສສ.ນວ ທ່ານ ຄຳ​ປິງ ແສງ​ຕານ​ນະລາດ ຫົວໜ້າ​ກົມນະໂຍບາຍ​ຕໍ່​ຜູ້​ມີ​ຜົນງານ ເຊິ່ງ​ມີ​ຮອງ​ເຈົ້າເມືອງ ຫ້ອງການແຮງ​ງານ​ເມືອງ ແລະ ພະນັກງານ​ບຳນານ​ນັກ​ປະຕິວັດ​ອາ​ວຸໂສ​ເຂົ້າ​ຮ່ວມ.

ທ່ານ​ນາງ ລຳ​ພອຍ ສີ​ອັກ​ຄະຈັນ ກ່າວ​ວ່າ: ໄລຍະ​ຜ່ານ​ມາ​ພັກ-ລັດຖະບານ ໄດ້​ມີ​ນະໂຍບາຍ ເພື່ອ​ສະແດງ​ຄວາມ​ກະຕັນຍູ​ຮູ້​ບຸນຄຸນ ​ຕໍ່​ພະນັກງານ​ບຳນານ ພະນັກງານ​ນັກ​ປະຕິວັດ​ອາວຸໂສ ຜູ້​ທີ່​ມີຜົນງານ ແລະ ຄຸນງາມຄວາມດີ ໃນ​ການ​ປົດ​ປ່ອຍປະ​ເທດ​ຊາດ​ສືບຕໍ່​ພາລະກິດ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ກ້າວ​ຂຶ້ນ​ສູ່ສັງຄົມ​ນິຍົມ ນະໂຍບາຍ​ດັ່ງກ່າວ ໄດ້​ມອບ​ຄວາມ​ຮັບຜິດຊອບ​ໃຫ້​ກະຊວງ ພະ​ແນກ ແລະ ຫ້ອງການແຮງ​ງານ-ສະຫວັດດີ​ການ-ສັງຄົມ ເມືອງ​ເປັນ​ຜູ້​ຈັດ​ຕັ້ງ​ປະຕິບັດ​ວຽກງານ​ດັ່ງກ່າວ​ນີ້.

ສຳລັບ​ເງິນ​ທີ່​ມອບ​ໃຫ້​ພະນັກງານ​ບຳນານ​ຄັ້ງ​ນີ້ ມີ​ນະໂຍບາຍເງິນ​ປ່ຽນ​ແທນ​ໂກ​ຕ້າ​ລົດ​ໃຫ້​ຈຳນວນ 7 ທ່ານ ຍິງ 1 ທ່ານ ເປັນຈຳນວນ​ເງິນ​ທັງ​ໝົດ 509.414.400 ກີບ ນະໂຍບາຍເງິນ​ອຸດ​ໜູນ​ເທື່ອ​ດຽວ​ຜູ້​ຍັງ​ມີ​ຊີວິດ ຈຳນວນ 21 ທ່ານ ຍິງ 9 ທ່ານ ເປັນ​ຈຳນວນ​ເງິນ 287.565.675 ກີບ ແລະ ນະໂຍ​ບາຍ​ກູ້​ຢືມ​ເງິນ​ເພື່ອ​ປຸກ​ສ້າງ-ສ້ອມແປງ​ເຮືອນ ຈຳນວນ 12 ທ່ານ ຍິງ 3 ທ່ານ ເປັນ​ຈຳນວນເງິນ 360 ລ້ານ​ກີບ.

ຂ່າວທີ່ກ່ຽວຂ້ອງ