ໂຄງການເຂື່ອນໄຟຟ້າດອນສະໂຮງ ຈະສຳເລັດໃນປີ 2019

383 11 ທ.ວ. 2017 ຂ່າວໜ້າ​ໜຶ່ງ

ເພື່ອ​ສືບຕໍ່​ຮັບ​ຟັງ​ການ​ລາຍງານ​ ສະພາບ​ການຈັດຕັ້ງ​ປະຕິບັດໂຄງການ​ກໍ່ສ້າງ​ເຂື່ອນ​ໄຟຟ້າດອນ​ສະ​ໂຮງ ບັນດາ​ຂໍ້​ສະດວກຂໍ້ຫຍຸ້ງຍາກ​ຕ່າງໆ ແລະ ພ້ອມ​ກັນຄົ້ນຄວ້າ​ພິຈາລະນາ ແລະ ຕັດສິນ​ບັນຫາ​ຕ່າງໆ ແນໃສ່​ອຳນວຍຄວາມ​ສະດວກ​ໃນ​ການ​ຊີ້​ນຳການຈັດຕັ້ງ​ປະຕິບັດ​ໂຄງການ​ດັ່ງກ່າວ ​ໃຫ້​ມີ​ຄວາມ​ໂລ່ງ​ລ່ຽນ ກະຊວງ​ພະລັງງານ ແລະ ບໍ່​ແຮ່ (​ພບ) ຈຶ່ງ​ໄດ້​ຈັດ​ກອງ​ປະຊຸມ​ຄະນະ​ກຳມະການ​ຊີ້​ນຳ​ຮ່ວມ​ໂຄງການ​ໄຟຟ້າ​ດອນ​ສະ​ໂຮງ ຄັ້ງ​ທີ III ຂຶ້ນ​ເມື່ອ​ບໍ່​ດົນ​ມາ​ນີ້ ຢູ່​ແຂວງຈຳປາ​ສັກ ໂດຍ​ເປັນ​ປະທານຂອງ​ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ ​ພບ ມີ​ຄະນະກຳມະການ​ຊີ້​ນຳ​ຮ່ວມ​ໂຄງການ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ໂຄງການ​ເຂື່ອນ​ໄຟຟ້າ​ດອນສະ​ໂຮງ ແມ່ນ​ບໍລິສັດ Mega First Corporation Berhad Consortium ປະເທດ​ມາ​ເລ​ເຊຍ ເປັນ​ຜູ້​ຈັດ​ຕັ້ງປະຕິບັດ ເປັນ​ເຂື່ອນ​ໄຟຟ້າ​ແບບຝາຍ​ນ້ຳ​ລົ້ນ ມີ​ກຳລັງ​ການ​ຕິດຕັ້ງ 260 ເມ​ກາ​ວັດ ສາມາດ​ຜະລິດ​ພະລັງງານ​ໄດ້ 2.000 ກິກ​ກະວັດ​ໂມງ​ຕໍ່​ປີ ມູນ​ຄ່າ​ການ​ກໍ່ສ້າງ 520 ລ້ານ​ໂດ​ລາ​ສະຫະລັດ ຫຼື ປະມານ 4.160 ຕື້​ກີບ ການ​ພັດທະ​ນາ​ແມ່ນ​ຮູບ​ແບບ​ກໍ່ສ້າງ​ດຳເນີນ​ງານ ແລະ ມອບ​ໂອນ​ໂດຍມີ​ອາຍຸ​ສຳ​ປະທານ 25 ປີ ເລີ່ມກໍ່ສ້າງປີ 2016 ເປັນຕົ້ນ​ມາ ປັດຈຸບັນ​ໂຄງການ​ມີ​ຄວາມ​ຄືບໜ້າ 43% ຄາດ​ວ່າ​ຈະ​ໃຫ້​ສຳເລັດ​ໃນ​ປີ 2019 ໂດຍ​ພະລັງງານໄຟຟ້າ ທັງ​ໝົດ​ຈະ​ຈຳໜ່າຍ​ໄຟຟ້າ​ໃຫ້​ລັດ​ວິ​ສາ​ຫະ​ກິດ​ໄຟຟ້າລາວ.

ທ່ານ ຄຳ​ມະນີ ອິນ​ທິ​ລາດ ກ່າວ​ວ່າ: ໂຄງການ​ໄຟຟ້າ​ດອນສະ​ໂຮງ ແມ່ນ​ໜຶ່ງ​ໃນ​ບັນດາ​ໂຄງການ​ທີ່​ມີ​ປະ​ສິດທິ​ຜົນ ການ​ລົງທຶນບໍ່​ສູງ ແຕ່​ປະກອບສ່ວນ​ສຳຄັນເຂົ້າ​ໃນ​ຂະແໜງ​ພະລັງງານ​ໄຟຟ້າ ເປັນ​ໂຄງການ​ທີ່​ມີ​ລັກສະນະພິເສດ ເນື່ອງ​ຈາກ​ເປັນ​ໂຄງການທີ​ສອງ​ ທີ່​ໄດ້​ກໍ່ສ້າງ​ຢູ່​ລຳ​ນ້ຳຂອງ ນອກຈາກ​ຈະ​ປະຕິບັດ​ພັນທະ​ຕໍ່ລັດຖະບານ​ລາວ​ແລ້ວ ຍັງ​ຕ້ອງປະຕິບັດ​ພັນທະ​ຂອງ​ສາກົນ ກໍ່​ຄືປະເທດ​ພາຄີ​ອີກ​ດ້ວຍ ໂດຍ​ສະເພາະ​ການ​ປະຕິບັດ​ສົນທິສັນຍາແມ່ນ້ຳ​ຂອງ​ປີ 1995 ສະນັ້ນ ຜູ້ພັດທະນາ ແລະ ພາກສ່ວນ​ທີ່ກ່ຽວຂ້ອງ​ຕ້ອງ​ໄດ້​ພ້ອມ​ກັນ​ປະກອບ​ສ່ວນ​ຢ່າງ​ຕັ້ງໜ້າ​ຕາມ​ສິດ ແລະ ໜ້າທີ່​ຂອງ​ຕົນ ເພື່ອ​ຈັດ​ຕັ້ງປະຕິບັດ​ໂຄງການ​ໃຫ້​ປະສົບ​ຜົນສຳເລັດ​ຕາມ​ເປົ້າ​ໝາຍ.

ຂ່າວທີ່ກ່ຽວຂ້ອງ