ລາວ-ຮົງກາລີ ສະຫຼອງສາຍພົວພັນການທູດ ຄົບຮອບ 55 ປີ

655 11 ທ.ວ. 2017 ຂ່າວໜ້າ​ໜຶ່ງ
ລາວ-ຮົງກາລີ ສະຫຼອງສາຍພົວພັນການທູດ ຄົບຮອບ 55 ປີ

ສປປ ລາວ-ຮົງ​ກາລີ ສ້າງຕັ້ງສາຍ​ພົວພັນ​ການ​ທູດ​ນຳ​ກັນ ວັນທີ 12 ກັນຍາ 1962 ປັດຈຸບັນ ຄົບຮອບ 55 ປີ ຕະຫຼອດ​ເຄິ່ງ​ສະຕະວັດ​ຜ່ານ​ມາ ສາຍ​ພົວພັນ​ມິດ​ຕະພາບ ແລະ ການ​ຮ່ວມ​ມື​ທີ່​ດີລະຫວ່າງ​ສອງ​ປະເທດ ໄດ້​ຮັບ​ການພັດທະນາ​ຢ່າງ​ຕໍ່​ເນື່ອງ ບົນ​ພື້ນຖານ​ແຫ່ງ​ການ​ເຄົາລົບ​ເຊິ່ງ​ກັນ ແລະ ກັນ ຫຼັກການ​ແຫ່ງ​ການ​ພົວພັນ​ສາກົນ ທັງ​ສອດຄ່ອງ​ກັບຄວາມ​ມຸ່ງ​ມາດ​ປາຖະໜາ​ຂອງປະຊາຊົນ​ສອງ​ຊາດ ລາວ-ຮົງ​ກາລີ.

ເພື່ອ​ເປັນ​ການ​ສະເຫຼີມສະຫຼອງ ຄົບຮອບ 55 ປີ ສາຍ​ພົວພັນ​ການທູດລັດຖະບານ​ຮົງ​ກາລີ ຕາງໜ້າ​ໂດຍ​ທ່ານ ປີ​ເຕີ ຈາ​ຄອບ (Peter JAKAB) ເອກ​ອັກ​ຄະລັດ​ຖະ​ທູດຮົງ​ກາ​ຣີ ປະຈຳ​ລາວ ເຊິ່ງ​ມີ​ສຳນັກງານ​ຕັ້ງ​ຢູ່​ບາງກອກ ປະເທດ​ໄທ ແລະ ສະມາຄົມ​ມິດຕະ​ພາບ ລາວ-ຮົງ​ກາລີ ຈັດ​ງານສະເຫຼີມສະຫຼອງ​ຂຶ້ນ​ໃນ​ວັນ​ທີ 7 ທັນວາ 2017 ທີ່​ໂຮງແຮມ​ລາວພລາ​ຊາ ນະຄອນຫຼວງ​ວຽງ​ຈັນ ເປັນ​ກຽດ​ເຂົ້າ​ຮ່ວມ​ງານ​ມີ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດຖະ​ມົນຕີ​ກະຊວງ​ການ​ຕ່າງ​ປະເທດ ມີ​ບັນດາ​ທ່ານ​ລັດຖະມົນຕີ ຮອງ​ລັດຖະມົນຕີ ທູຕານຸທູດ ແຂກ​ຖືກ​ເຊີນ ທັງ​ພາກ​ລັດ ແລະ ເອກະ​ຊົນ ແລະ ບັນດາ​ອະດີດນັກ​ສຶກ​ສາ​ລາວ ​ທີ່​ຮຽນ​ຈົບ​ຈາກຮົງ​ກາລີ ເຂົ້າ​ຮ່ວມ.

ໃນ​ພິທີ​ທັງ​ສອງ​ຝ່າຍ ໄດ້​ຜັດປ່ຽນ​ກັນ​ຂຶ້ນ​ປະກອບ​ຄຳ​ເຫັນ ໂດຍ​ສະເພາະຝ່າຍ​ລາວ ​ໄດ້​ສະແດງ​ຄວາມ​ຮູ້​ບຸນຄຸນຂອບໃຈຢ່າງ​ຈິງ​ໃຈ​ຕໍ່​ລັດຖະບານ​ຮົງ​ກາລີ ໃຫ້ການ​ຮ່ວມ​ມື​ຊ່ວຍເຫຼືອ​ໃນ​ການສ້າງສາ​ພັດທະນາ ​ສປປ ລາວ ເປັນຕົ້ນ ການ​ສະໜັບສະໜູນ​ໃນດ້ານ​ເງິນ​ກູ້​ດອກ​ເບ້ຍ​ຕ່ຳ ອັນ​ເປັນການ​ປະກອບສ່ວນ​ພັດທະນາ​ເສດຖະ​ກິດ-ສັງຄົມຢ່າງ​ຕໍ່​ເນື່ອງ​ ລວມທັງ​ການ​ສືບຕໍ່​ຊ່ວຍເຫຼືອ​ໃນ​ການພັດທະນາ​ຊັບພະຍາກອນ​ມະນຸດ ນອກ​ນີ້ ທັງ​ສອງ​ຝ່າຍ​ຍັງ​ຢືນຢັນສືບຕໍ່​ເພີ່ມ​ທະວີ​ຮັດ​ແໜ້ນ​ການ​ພົວພັນ​ຮ່ວມ​ມື​ສອງ​ຝ່າຍ​ຂຶ້ນ​ສູ່​ລະດັບໃໝ່ ສືບຕໍ່​ໃນ​ການ​ສະໜັບສະໜູນຊ່ວຍເຫຼືອ​ເຊິ່ງ​ກັນ ແລະ ກັນ ໃນການ​ພັດທະນາ​ປະເທດ.

ຂ່າວທີ່ກ່ຽວຂ້ອງ