ຂ່າວຫຼ້າສຸດ

ໂຮງຮຽນລ້ຽງເດັກ-ອະນຸບານເມທານີ ເນັ້ນຄຸນະພາບຂອງການສຶກສາ

400 11 ມ.ກ. 2018 ຂ່າວໜ້າ​ໜຶ່ງ
ໂຮງຮຽນລ້ຽງເດັກ-ອະນຸບານເມທານີ ເນັ້ນຄຸນະພາບຂອງການສຶກສາ

ພິທີ​ເປີດ​ອາຄານ​ຫຼັງ​ໃໝ່​ຂອງໂຮງຮຽນ​ລ້ຽງ​ເດັກ ແລະ ອະນຸບານ​ເມ​ທານີ ຈັດ​ຂຶ້ນ​ວັນ​ທີ 8 ມັງກອນ 2018 ທີ່​ບ້ານ​ຈອມ​ມະນີ ເມືອງ​ໄຊ​ເຊດ​ຖາ ນະຄອນຫຼວງວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິ​ການ ແລະ ກີລາ ທ່ານ ນິ​ເຮ ທາ​ໂມ​ຊຶ ຜູ້ອຳນວຍການ​ໂຮງຮຽນ​ທາ​ເຕ​ຊິ ຈາກ​ປະເທດ​ຍີ່ປຸ່ນ ທັງ​ເປັນ​ທີ່​ປຶກສາ​ກິດ​ຕິ​ມະ​ສັກ​ໂຮງຮຽນ​ລ້ຽງ​ເດັກ ແລະ ອະນຸບານເມ​ທານີ ພ້ອມ​ດ້ວຍ​ຄະນະ​ອຳນວຍ​ການ ພະນັກງານ​ຄູ-ອາຈານ ພໍ່​ແມ່​ຜູ້​ປົກຄອງ ນ້ອງ​ນັກຮຽນ ແລະ ແຂກ​ທີ່​ຖືກ​ເຊີນ​ເຂົ້າຮ່ວມ.

ທ່ານ​ນາງ ອາ​ໄທ​ລັດ ພົມມະຈັນ ປະທານ​ໂຮງຮຽນ​ລ້ຽງ​ເດັກ ແລະ ອະນຸບານ​ເມ​ທານີ ກ່າວ​ວ່າ: ໂຮງຮຽນ​ລ້ຽງ​ເດັກ ແລະ ອະນຸບານເມ​ທານີ ເປັນ​ອາຄານ​ຮຽນ​ທີ່​ໄດ້ອອກ​ແບບ​ເປັນ​ເອກະລັກ ເພື່ອ​ໃຫ້ເດັກນ້ອຍ​ໄດ້​ໃຊ້​ຊີວິດ​ດ້ວຍ​ຄວາມສະດວກ​ສະບາຍ ແລະ ປອດ​ໄພເປັນ​ຫຼັກ ພ້ອມ​ທັງ​ມີ​ຄວາມ​ມຸ່ງໝັ້ນ ແລະ ຄຳນຶງ​ເຖິງ​ການ​ສຶກສາ​ຂອງ​ເດັກນ້ອຍ​ຢ່າງ​ເກ່ງ​ກ້າ ໂດຍ​ເນັ້ນ​ຄຸນະພາບ​ຂອງ​ການ​ສຶກສາ​ເປັນ​ສິ່ງ​ສຳຄັນ ​ທີ່​ຈະ​ເຮັດ​ໃຫ້ເດັກນ້ອຍມີ​ຜົນ​ການ​ຮຽນ​ທີ່​ດີ ພ້ອມ​ນັ້ນຍັງ​ມີ​ເປົ້າ​ໝາຍ​ສ້າງ​ພະລັງ​ແຮງ​ການ​ດຳລົງ​ຊີວິດ​ໃຫ້​ແກ່ເດັກນ້ອຍ ໃຫ້​ເຂົາເຈົ້າ​ຮູ້ຈັກຄວາມ​ສາມັກຄີ ການ​ໃຊ້​ຊີວິດ​ຢູ່ຮ່ວມ​ໝູ່ ເອື້ອເຟື້ອ​ແບ່ງປັນ​ຮັກແພງ​ຊ່ວຍເຫຼືອ​ເຊິ່ງ​ກັນ ແລະ ກັນ ເຊິ່ງ​ໂຮງຮຽນ​ເລີ່ມ​ຮັບ​ເດັກນ້ອຍແຕ່ 1 ປີ 3 ເດືອນຫາ 6 ປີ ສ່ວນຫຼັກສູດ​ການ​ຮຽນ-ການ​ສອນ​ເປັນຫຼັກສູດ​ປະສົມ​ປະສານ​ລາວ-ຍີ່ປຸ່ນ ແລະ ປະຕິບັດ​ຕາມ​ຫຼັກສູດຂອງ​ກະຊວງ​ສຶກ​ສາ​ທິ​ການ ແລະ ກີລາ​ວາງ​ອອກ.

ຂ່າວທີ່ກ່ຽວຂ້ອງ