ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2

280 11 ມ.ກ. 2018 ຂ່າວໜ້າ​ໜຶ່ງ

ໃນ​ວັນ​ທີ 10-11 ມັງກອນ 2018 ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ໄດ້​ນຳພາ​ຄະນະ​ຜູ້​ແທນ​ເຂົ້າ​ຮ່ວມ​ກອງ​ປະຊຸມ​ຜູ້ນຳ​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 2 ທີ່​ພະນົມ​ເປັນ ລາຊະ​ອານາຈັກກຳປູເຈຍ ພ້ອມ​ທັງ​ຮັບ​ການ​ເປັນ​ປະທານ​ຮ່ວມ​ຈາກ​ກຳປູເຈຍ ໃນ​ສົກ​ປີ 2018-2020 ຢ່າງ​ເປັນ​ທາງ​ການ ກອງ​ປະຊຸມ​ໄດ້​ດຳເນີນ​ພາຍ​ໃຕ້​ຫົວຂໍ້ “ແມ່ນ້ຳ​ແຫ່ງ​ສັນຕິພາບ​ຂອງ​ພວກ​ເຮົາ ແລະ ການ​ພັດທະນາ​ແບບ​ຍືນ​ຍົງ (Our River of Peace and Sustainable Development)” ໂດຍ​ການ​ເປັນ​ປະທານ​ຂອງ​ທ່ານ ລີ ເຄີ້​ສຽງ ນາຍົກລັດຖະມົນຕີ ແຫ່ງ ​ສປ ຈີນ ແລະ ສົມເດັດ ອັກຄະມະຫາເສນາ​ບໍດີ ເຕ​ໂຈ ຮຸນ​ແຊນ ນາຍົກລັດຖະມົນຕີ ແຫ່ງ ລາຊະ​ອານາຈັກ ກຳປູເຈຍ ມີ​ບັນດາ​ການ​ນຳ​ຂັ້ນ​ສູງ ພ້ອມ​ດ້ວຍ​ຄະນະ​ຜູ້​ແທນຈາກ​ປະເທດ​ສະມາຊິກ​ຂອບ​ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ 6 ປະເທດ ຄື: ລາຊະ​ອານາຈັກ​ກຳປູເຈຍ ​ສປ ຈີນ ​ສປປ ລາວ ​ສສ ມຽນ​ມາ ລາຊະ​ອານາຈັກ​ໄທ ແລະ ​ສສ ຫວຽດນາມ ເຂົ້າ​ຮ່ວມ​ຢ່າງ​ພ້ອມພຽງ.

ໃນ​ກອງ​ປະຊຸມ​ຄັ້ງ​ນີ້ ບັນດາ​ຜູ້ນຳ 6 ປະເທດ​ສະມາຊິກ ​ໄດ້​ພ້ອມ​ກັນ​ແລກປ່ຽນ​ຄຳ​ຄິດ​ເຫັນ ແລະ ໃຫ້ທັດສະນະ​ຮ່ວມ​ຕໍ່​ກັບ​ຜົນ​ຂອງ​ການ​ຜັນ​ຂະຫຍາຍ ​ການຈັດຕັ້ງ​ປະຕິບັດ​ບັນດາ​ວຽກ​ງານ​ຕ່າງໆ​ຕາມ​ຖະແຫຼງການ​ຊັນ​ຢາ ທີ່​ໄດ້​ຮັບຮອງ​ເອົາ​ໃນ​ກອງ​ປະຊຸມ​ຜູ້ນຳ​ຂອບ​ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 1 ທີ່​ເມືອງ​ຊັນ​ຢາ ແຂວງ​ໄຫ​ໜານ ​ສປ ຈີນ ແລະ ກອງ​ປະຊຸມ​ລັດຖະມົນຕີ​ຕ່າງປະເທດ​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ຄັ້ງ​ທີ 2 ແລະ 3 ພ້ອມ​ນີ້ ກອງ​ປະຊຸມ​ຍັງ​ໄດ້​ທົບ​ທວນຄືນ​ຄວາມ​ຄືບ​ໜ້າ ແລະ ໝາກຜົນ​ຂອງ​ການຈັດຕັ້ງ​ປະຕິບັດ​ບັນດາ​ແຜນ​ວຽກ ແລະ ໂຄງການ​ຕ່າງໆ ພາຍ​ໃຕ້​ຂອບ​ການ​ຮ່ວມ​ມື​ດັ່ງກ່າວ ໃນ​ໄລຍະ​ຜ່ານ​ມາ ພ້ອມ​ທັງ​ຮ່ວມ​ກັນ​ປຶກສາ​ຫາລື​ກ່ຽວ​ກັບ​ທິດ​ທາງ​ຮ່ວມ​ມື​ໃນຕໍ່ໜ້າ ເພື່ອ​ແນໃສ່​ເຮັດ​ໃຫ້​ຂອບ​ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ເປັນ​ຂອບ​ການ​ຮ່ວມ​ມື​ທີ່​ນຳ​ເອົາ​ຜົນ​ປະໂຫຍດ ​ອັນ​ເປັນ​ຮູບ​ປະ​ທຳ​ມາສູ່ 6 ປະເທດ​ສະມາຊິກ ກໍ່​ຄືພາກ​ພື້ນ​ຢ່າງ​ແທ້​ຈິງ.

ຂ່າວທີ່ກ່ຽວຂ້ອງ