ຄະດີຄ້າຂາຍຢາເສບຕິດ ຍັງເປັນຄະດີພົ້ນເດັ່ນຢູ່ນະຄອນຫຼວງ

496 12 ມ.ກ. 2018 ຂ່າວໜ້າ​ໜຶ່ງ
ຄະດີຄ້າຂາຍຢາເສບຕິດ ຍັງເປັນຄະດີພົ້ນເດັ່ນຢູ່ນະຄອນຫຼວງ

ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ປະຊາຊົນນະຄອນຫຼວງ​ວຽງ​ຈັນ (ນວ) ຊຸດທີ I ໃນ​ວັນ​ທີ 11 ມັງກອນ 2018 ເປັນ​ປະທານ​ໂດຍ​ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນ ນວ ມີ ​ສສຊ ​ສສ.ນວ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ຜູ້​ເຂົ້າ​ຮ່ວມ​ໄດ້​ຮັບຟັງ​ລາຍ​ງານ​ການຈັດຕັ້ງ​ປະຕິບັດ ວຽກ​ງານ​ປີ 2017 ແລະ ທິດ​ທາງແຜນການ​ປີ 2018 ຂອງ​ອົງການໄອ​ຍະ​ການ​ປະຊາຊົນ ແລະ ສານປະຊາຊົນ ນວ ເຊິ່ງ​ເຫັນ​ວ່າ​ຕະຫຼອດ​ໄລຍະ 1 ປີຜ່ານມາ ອົງການໄອ​ຍະ​ການ​ປະຊາຊົນ ນວ ໄດ້​ຮັບສຳນວນ​ຄະດີ​ອາຍາ​ຂັ້ນ​ຕົ້ນ ທັງໝົດ 2.948 ເລື່ອງ ແກ້​ໄຂ​ແລ້ວ 2.744 ເລື່ອງ ໃນ​ນີ້ ໄດ້​ຖະແຫຼງສັ່ງ​ຟ້ອງ​ໃຫ້​ສານ 1.498 ເລື່ອງ ສົ່ງ​ເຈົ້າ​ໜ້າທີ່​ສືບສວນ-ສອບສວນ ເພີ່ມ​ຕື່ມ 1.153 ເລື່ອງ ຊັດມ້ຽນ 80 ເລື່ອງ ແລະ ໂຈະ​ການສືບສວນ-ສອບ​ສວນ 13 ເລື່ອງ ປັດຈຸບັນ ພວມ​ພິຈາລະນາ 204 ເລື່ອງ ຄະດີ​ອາຍາ​ຂັ້ນ​ອຸທອນ ມີທັງ​ໝົດ 31 ເລື່ອງ ຖະແຫຼງ​ສົ່ງສານ 29 ເລື່ອງ ແລະ ຍັງ​ພວມ​ພິຈາລະ​ນາ 2 ເລື່ອງ.

ສ່ວນ​ສານ​ປະຊາຊົນ ນວ ໃນ 1 ປີຜ່ານມາ ໄດ້​ເອົາໃຈໃສ່​ການ​ປະຕິ​ບັດ​ໜ້າທີ່​ວຽກ​ງານ​ວິຊາ​ສະເພາະ ເປັນຕົ້ນ ວຽກ​ງານ​ການ​ໄກ່ເກ່ຍ ແລະ ພິຈາລະນາ​ຕັດສິນ​ຄະດີ​ມີ​ຄວາມ​ວ່ອງໄວ ມີ​ປະ​ສິດທິ​ຜົນດີ​ຂຶ້ນ​ເທື່ອ​ລະ​ກ້າວ ເຊິ່ງ​ມັນ​ໄດ້ສະແດງ​ອອກ​ຄະດີ​ຄ້າງ​ມາ 559 ເລື່ອງ ແລະ ເຂົ້າ​ໃໝ່ 1.259 ເລື່ອງ ລວມ​ທັງ​ໝົດ 1.818 ເລື່ອງ ສາມາດ​ແກ້​ໄຂ​ໄດ້ 1.262 ເລື່ອງ ກຳລັງ​ຄົ້ນຄວ້າ 556 ເລື່ອງ ຄະດີ​ທີ່​ມັກ​ເກີດ​ຂຶ້ນ​ຫຼາຍ​ແມ່ນ​ຄະດີຄ້າຂາຍ​ຢາ​ເສບ​ຕິດ ລະເມີດ​ກົດລະບຽບ​ຈະລາຈອນ ລັກ​ຊັບ​ພົນລະ​ເມືອງ ສໍ້​ໂກງ​ຊັບ​ພົນລະເມືອງ ສັນຍາ​ກູ້​ຢືມ​ຂັດ​ແຍ່ງ​ມູນ​ມໍລະດົກ ຂັດ​ແຍ່ງ​ກຳມະສິດ​ທີ່​ດິນ ແລະ ສາຍ​ຜົວ​ເມຍ.

ຂ່າວທີ່ກ່ຽວຂ້ອງ