ນະຄອນຫຼວງ ສູ້ຊົນຂຸດຄົ້ນລາຍຮັບງົບປະມານໃຫ້ໄດ້ 1.212 ຕື້ກວ່າກີບ

351 17 ມ.ກ. 2018 ຂ່າວໜ້າ​ໜຶ່ງ

ອີງ​ຕາມ​ບົດ​ລາຍ​ງານ​ການ​ຈັດຕັ້ງ​ປະຕິບັດ​ແຜນ​ພັດທະນາ​ເສດຖະ​ກິດ-ສັງຄົມ ປະຈຳ​ປີ 2017 ແລະ ທິດ​ທາງ​ແຜນການ​ປີ 2018 ທີ່​ສະເໜີ​ໂດຍ​ທ່ານ ພູ​ຂົງ ບັນ​ນາວົງ ຫົວໜ້າ​ພະ​ແນກ​ແຜນການ ແລະ ການ​ລົງທຶນ ນວ ວ່າ: ນວ ໄດ້​ວາງ​ຄາດໝາຍ​ສູ້​ຊົນ​ຕົ້ນຕໍແຜນ​ພັດທະນາ​ເສດຖະກິດ-ສັງຄົມ ປີ 2018 ລວມ​ທັງ​ໝົດ 13 ຄາດໝາຍ ໃນ​ນັ້ນ ສູ້​ຊົນ​ຂຸດ​ຄົ້ນແຫຼ່ງ​ລາຍ​ຮັບ​ງົບປະມານ​ໃຫ້​ໄດ້ 1.212,24 ຕື້​ກີບ ດ້ວຍ​ການ​ນຳໃຊ້​ລະບົບ ICT ເຂົ້າ​ໃນ​ການ​ຄຸ້ມຄອງ​ວຽກ​ງານ​ການ​ເງິນໃຫ້​ໄດ້ 40% ການ​ບໍລິການ​ອີ​ເລັກ​ໂຕຣນິກໃນ​ທົ່ວ​ນະຄອນຫຼວງ​ວຽງ​ຈັນ ໃຫ້​ກວມ​ເອົາ 75% ຂະຫຍາຍຕົວ​ໜ່ວຍ​ທຸລະ​ກິດ​ຜູ້​ປະກອບ​ການໃນ​ຂະແໜງການ​ທຸລະ​ກິດ ແລະ ກາຍເປັນ​ຫົວໜ່ວຍ​ບໍ່​ຫຼຸບ​ທຶນ​ພັດທະ​ນາ​ດີ ເປັນ​ຫົວໜ່ວຍ​ເສຍ​ພັນທະ​ດີ ແລະ ຂະຫຍາຍ​ຫົວໜ່ວຍ​ຖືບັນຊີ​ຕາມ​ກົດໝາຍ​ໃຫ້​ໄດ້ 50% ພົນລະເມືອງ​ໃນ​ເກນ​ອາຍຸ​ຮຽນ​ມີລະດັບ​ການ​ສຶກ​ສາ​ຈົບ​ມັດທະຍົມຕອນ​ປາຍ​ໂດຍ​ພື້ນຖານ ຮູ້​ພາສາສາກົນ 20% ຮູ້​ນຳ​ໃຊ້​ຄອມ​ພິວເຕີ 35% ສົ່ງເສີມ​ດ້ານ​ໂພຊະ​ນາການ ແລະ ການ​ຮັກສາ​ສຸ​ຂະພາບ​ຂອງ​ພົນລະເມືອງ ຮອດ​ປີ 2020 ອາຍຸ​ຍືນ​ສະເລ່ຍ​ຂອງ​ພົນລະ​ເມືອງ​ໃຫ້​ບັນລຸ​ໄດ້​ຫຼາຍ​ກວ່າ 75 ປີ ອັດຕາ​ການ​ຕາຍ​ຂອງ​ເດັກໃຫ້​ເຫຼືອ​ພຽງ 25/1.000 ຄົນ ກຳຈັດ ແລະ ແກ້​ໄຂ​ພະຍາດ​ອັນ​ຕະລາຍ 6 ປະການ ຄື: ພະຍາດເອດ ມະ​ເຮັງ ໄຂ້​ຫວັດ​ສັດ​ປີກ ໄຂ້ເລືອດ​ອອກ ພະຍາດ​ຖອກທ້ອງ ແລະ ພະຍາດຫົວໃຈ​ໃຫ້​ໄດ້​ໃນເກນ​ສູງ​ສຸດ.

ຂ່າວທີ່ກ່ຽວຂ້ອງ