ປະເມີນວຽກງານເພື່ອບັນລຸເປົ້າໝາຍ ການພັດທະນາແບບຍືນຍົງ

418 17 ມ.ກ. 2018 ຂ່າວໜ້າ​ໜຶ່ງ
ປະເມີນວຽກງານເພື່ອບັນລຸເປົ້າໝາຍ ການພັດທະນາແບບຍືນຍົງ

ວັນ​ທີ 16 ມັງກອນ 2018 ຢູ່ກະຊວງ​ແຜນການ ແລະ ການລົງທຶນ (​ຜທ) ຈັດ​ກອງ​ປະຊຸມ​ທົບທວນ​ປະຈຳ​ປີ 2017 “ແຜນ​ງານສະໜັບສະໜູນ​ໃຫ້​ແກ່​ກະຊວງ ​ຜທ ແລະ ກະຊວງ​ການ​ຕ່າງ​ປະເທດ ໃນ​ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມແຫ່ງ​ຊາດ 5 ປີ ຄັ້ງ​ທີ VIII ເພື່ອ​ນຳພາ​ປະເທດ​ຊາດ​ຫຼຸດ​ພົ້ນອອກ​ຈາກ​ສະຖານະ​ພາບ​ດ້ອຍພັດທະນາ​ ກ້າວ​ໄປ​ຢູ່​ໃນ​ປະເທດ​ທີ່ມີ​ລາຍ​ຮັບ​ປານ​ກາງ ແລະ ບັນລຸເປົ້າ​ໝາຍ​ການ​ພັດທະນາ​ແບບຍືນ​ຍົງ (2017-2021)” ໂດຍເປັນ​ປະທານ​ຮ່ວມ​ຂອງ​ທ່ານ ກິແກ້ວ ຈັນທະ​ບູ​ຣີ ຮອງ​ລັດ​ຖະ​ມົນຕີ​ກະຊວງ ​ຜທ ທ່ານ​ນາງ ຄາ​ຣີນາ ອິມ​ໂມ​ເນັມ ຜູ້​ປະສານ​ງານຂອງ​ອົງການ​ສະຫະ​ປະຊາ​ຊາດ ທັງ​ເປັນ​ຜູ້ຕາງໜ້າ​ຂອງ​ອົງການສະຫະ​ປະຊາ​ຊາດ ເພື່ອ​ການ​ພັດທະ​ນາ​ປະຈຳ​ລາວ ເຊິ່ງ​ມີ​ຫົວໜ້າກອງ​ເລຂາ​ໜ່ວຍ​ງານ ຂະແໜງການ ແລະ ຕາງໜ້າ​ຄູ່​ຮ່ວມ​ພັດທະ​ນາ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ແມ່ນ​ໄດ້​ທົບທວນຄືນ ແລະ ລາຍ​ງານ​ຄວາມຄືບ​ໜ້າ​ຜົນສຳເລັດ ແລະ ສິ່ງ​ທ້າທາຍ​ທີ່​ຕິດ​ພັນ​ກັບ​ການຈັດຕັ້ງ​ປະຕິ​ບັດ​ແຜນການ​ໄລຍະປີ 2017 ຜ່ານ​ມາ ເຊິ່ງ​ເປັນ​ແຜນ​ງານ​ທີ່​ໄດ້ຮັບ​ທຶນ​ສະໜັບສະໜູນ​ຈາກ​ລັດຖະ​ບານ​ລຸກ​ຊຳ​ບວກ ແລະ ອົງການ​ສະຫະ​ປະຊາ​ຊາດ ເພື່ອ​ການພັດທະນາ​ໃຫ້​ແກ່​ກະຊວງ ​ຜທ ແລະ ກະຊວງ​ການ​ຕ່າງປະເທດ ເພື່ອ​ການ​ບັນລຸ​ເປົ້າ​ໝາຍ​ໃນ​ການຫຼຸດ​ພົ້ນ​ອອກ​ຈາກ​ສະຖານະ​ພາບດ້ອຍ​ພັດທະນາ ການ​ກ້າວ​ໄປ​ຢູ່ໃນ​ປະເທດ​ທີ່​ມີ​ລາຍ​ຮັບ​ປານ​ກາງ ແລະ ບັນລຸ​ເປົ້າ​ໝາຍ​ການ​ພັດທະ​ນາ​ແບບ​ຍືນ​ຍົງ ພ້ອມ​ນີ້ ກອງປະຊຸມ​ຍັງ​ໄດ້​ສຸມ​ໃສ່​ຕົກລົງ​ເຫັນ​ດີເປັນ​ເອກະ​ພາບ​ກັນ ລະຫວ່າງຄະນະ​ບໍລິຫານ​ແຜນ​ງານ ເພື່ອຮັບຮອງ​ເອົາ​ແຜນ​ວຽກ ປະຈຳ​ປີ 2018.

ທ່ານ​ຮອງ​ລັດຖະມົນຕີ​ກະຊວງ ​ຜທ ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຜົນສຳເລັດ ແລະ ບົດຮຽນ​ທີ່ຖອດ​ຖອນ​ໄດ້​ ຈາກ​ການຈັດຕັ້ງ​ປະຕິ​ບັດ​ແຜນ​ງານ​ໃນ​ປີ​ທີ່​ຜ່ານ​ມາ ເຊິ່ງ​ທ່ານ​ໄດ້​ກ່າວ​ວ່າ: ຈຸດ​ຫຼັກຂອງ​ແຜນ​ງານ​ຄັ້ງ​ໃໝ່​ນີ້​ແມ່ນເພື່ອ​ສ້າງ ແລະ ເພີ່ມ​ທະວີ​ຄວາມເຂັ້ມແຂງ​ໃຫ້​ພະນັກງານ ກໍ່​ຄືອົງການຈັດຕັ້ງ​ທີ່​ກ່ຽວຂ້ອງ​ຂອງ​ລັດ ໃນ​ການຈັດຕັ້ງ​ປະຕິບັດ​ແຜນ​ພັດທະ​ນາ​ເສດຖະກິດ-ສັງຄົມແຫ່ງຊາດ 5 ປີ ຄັ້ງ​ທີ VIII ເພື່ອ​ນຳພາປະເທດ​ຊາດ​ໃຫ້​ຫຼຸດ​ພົ້ນ​ອອກ​ຈາກສະຖານະ​ພາບ​ດ້ອຍ​ພັດທະນາ ກ້າວ​ໄປ​ຢູ່​ໃນ​ປະເທດ​ທີ່​ມີ​ລາຍ​ຮັບປານ​ກາງ ແລະ ບັນລຸ​ເປົ້າ​ໝາຍການ​ພັດທະນາ​ແບບ​ຍືນ​ຍົງ ສະນັ້ນ ໃນ​ການ​ຕິດຕາມ​ກວດກາ ແລະ ລາຍ​ງານ​ການຈັດຕັ້ງ​ປະຕິບັດ​ແຜນ​ງານ​ພວກ​ເຮົາ ຈະ​ໄດ້​ສຸມໃສ່​ຜົນ​ໄດ້​ຮັບ ແລະ ໝາກຜົນຂອງ​ແຜນ​ງານ.

ຂ່າວທີ່ກ່ຽວຂ້ອງ