ຄະນະສະເພາະກິດຫາລືຕິດຕາມ-ກວດກາ ໂຄງການກໍ່ສ້າງທາງລົດໄຟ ລາວ-ຈີນ

312 17 ມ.ກ. 2018 ຂ່າວໜ້າ​ໜຶ່ງ
ຄະນະສະເພາະກິດຫາລືຕິດຕາມ-ກວດກາ ໂຄງການກໍ່ສ້າງທາງລົດໄຟ ລາວ-ຈີນ

ອົງການ​ກວດກາ​ລັດຖະບານ ໄດ້​ເປີດ​ກອງ​ປະຊຸມ​ແນະນຳ​ແຜນການເຄື່ອນໄຫວ​ ຂອງ​ຄະນະ​ສະເພາະ​ກິດ​ຕິດຕາມ​ກວດກາ ​ການປະຕິບັດ​ສັນຍາ​ໂຄງການ​ກໍ່ສ້າງທາງ​ລົດໄຟ ລາວ-ຈີນ ຂຶ້ນ​ໃນວັນ​ທີ 15 ມັງກອນ 2018 ທີ່ແຂວງ​ຫຼວງ​ພະ​ບາງ ໂດຍ​ໃຫ້ກຽດ​ເປັນ​ປະທານ​ຂອງ​ທ່ານ ບຸນທອງ ຈິດ​ມະນີ ຮອງ​ນາຍົກ​ລັດຖະ​ມົນຕີ ປະທານ​ອົງການ​ກວດກາ​ລັດຖະບານ ຫົວໜ້າ​ອົງການຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນກາງ ມີ​ທ່ານ​ລັດຖະມົນຕີ ຮອງລັດຖະມົນຕີ ສູນ​ກາງແນວ​ລາວສ້າງ​ຊາດ ແລະ ມີ​ບັນດາ​ພາກສ່ວນ​ກ່ຽວຂ້ອງ ປະທານ​ກວດກາແຂວງ​ຈາກ 4 ແຂວງ (ແຂວງຫຼວງ​ພະ​ບາງ ຫຼວງ​ນ້ຳ​ທາ ອຸດົມໄຊ ວຽງ​ຈັນ ນະຄອນຫຼວງ) ເພື່ອຈັດ​ຕັ້ງ​ຄະນະ​ສະເພາະ​ກິດ ຕິດຕາມ​ກວດກາ​ການ​ປະຕິບັດ​ສັນຍາ​ກໍ່ສ້າງ​ທາງ​ລົດໄຟ ລາວ-ຈີນ ແລະ ຮັບ​ຟັງ​ການ​ເຜີຍແຜ່​ແຜນການເຄື່ອນໄຫວ​ຂອງ​ຄະນະ​ສະເພາະ​ກິດ ການ​ລາຍ​ງານ​ສະພາບ​ຈາກ​ຄະນະ​ຮັບຜິດຊອບ​ຊີ້ນຳ​ໂຄງການ ຈາກ​ບັນດາ​ແຂວງ ນະຄອນຫຼວງ ນອກ​ນີ້ ບັນດາທ່ານ​ທີ່​ເຂົ້າ​ຮ່ວມ​ກອງ​ປະຊຸມ ​ຍັງໄດ້​ພ້ອມ​ກັນ​ປະກອບ​ຄຳ​ຄິດຄຳເຫັນ​ຕໍ່​ບັນຫາ​ຕ່າງໆ ເພື່ອ​ຄວາມເປັນ​ເອກະ​ພາບ​ໃນ​ການຈັດຕັ້ງ​ປະຕິ​ບັດ​ຕົວ​ຈິງ.

ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ໄດ້​ມີ​ຄຳ​ເຫັນຊີ້​ນຳ​ຕໍ່​ກອງ​ປະຊຸມ ໂດຍ​ໄດ້​ເນັ້ນໃຫ້​ຄະນະ​ສະເພາະ​ກິດ​ເອົາໃຈໃສ່ບາງ​ບັນຫາ ເປັນຕົ້ນ ຕ້ອງ​ກຳແໜ້ນ​ໜ້າທີ່-ສິດ ແລະ ຄວາມຮັບຜິດຊອບ​ຂອງ​ຕົນ​ທີ່​ກຳນົດ​ໄວ້ໃນ​ຂໍ້​ຕົກລົງ 86/​ນຍ ແລະ ແຜນດຳເນີນ​ງານ​ຂອງ​ຄະນະ​ສະເພາະກິດ ກຳ​ແໜ້ນ​ບັນດາ​ກົດໝາຍ ແລະ ລະບຽບ​ການ​ຕ່າງໆ​ທີ່​ພົວພັນ​ເຖິງ​ວຽກ​ງານ​ການ​ລົງທຶນ ການ​ກໍ່ສ້າງ​ຕ່າງໆ​ກຳ​ແໜ້ນ​ບັນດາ​ສັນຍາ​ຮັບເໝົາ​ກໍ່ສ້າງ​ໂຄງການ ​ເອກະສານຕ່າງໆ​ທີ່​ກ່ຽວຂ້ອງ​ ເພື່ອ​ເປັນ​ບ່ອນອີງ ແລະ ສາມາດ​ດຳເນີນ​ການຕິດຕາມ​ກວດກາ​ໄດ້​ງ່າຍ ແລະ ສະດວກ ​ຮີບ​ຮ້ອນແຕ່ງຕັ້ງ​ໜ່ວຍງານ​ຮັບຜິດຊອບ ຕິດຕາມ​ກວດກາ​ແຕ່​ລະ​ໄລຍະ​ຂອງ​ໂຄງການຈັດ​ຕັ້ງ​ເຝິກອົບຮົມ ແນະນຳ ແລະ ແບ່ງ​ງານແບ່ງ​ຄວາມ​ຮັບຜິດຊອບ ​ພ້ອມ​ທັງມີ​ລະບອບ​ແບບແຜນ​ເຮັດ​ວຽກ ລະບອບ​ປະຊຸມລະບອບ​ສະຫຼຸບ​ລາຍ​ງານ​ຈະແຈ້ງ​ການ​ເຮັດ​ວຽກ​ຕ້ອງ​ເຄົາລົບ ແລະ ຕົກລົງ​ບັນຫາ​ເປັນ​ໝູ່​ຄະນະ ປະຕິບັດ​ຫຼັກການ​ລວມ​ສູນ​ປະຊາ​ທິ​ປະໄຕ​ຢ່າງ​ເຂັ້ມ​ງວດ.

ພາຍຫຼັງ​ເຮັດ​ວຽກ​ນຳ​ທຸກ​ເປົ້າໝາຍ​ແລ້ວ ​ຕ້ອງ​ລົງ​ຕິດຕາມ​ກວດກາ​ຢູ່​ພາກ​ສະໜາມ​ຕົວ​ຈິງ ປະຕູນຳ​ເຂົ້າ​ວັດ​ສະ​ດຸ ແຮງ​ງານ ແລະ ອື່ນໆ ເມື່ອ​ພົບ​ເຫັນ​ບັນຫາ​ທີ່​ບໍ່​ຖືກຕ້ອງ​ຕາມ​ລະບຽບ​ກົດໝາຍ ຕາມສັນຍາ​ຕາມ​ການ​ຕົກລົງ​ຂອງ​ລັດຖະ​ບານ ແຕະຕ້ອງ​ຮ້າຍ​ແຮງເຖິງ​ຮີດຄອງ​ປະເພນີ-ວັດທະນະທຳ​ ຕ້ອງ​ໄດ້​ສະເໜີ​ສົມທົບ​ກັບທ້ອງຖິ່ນ​ຄົ້ນຄວ້າ​ ແລ້ວ​ປຶກສາ​ຫາລື​ນຳ​ຜູ້​ຮັບ​ເໝົາ ແລະ ເຈົ້າ​ຂອງໂຄງການ​ແກ້​ໄຂ ຫຼື ສະເໜີ​ຂັ້ນເທິງ​ພິຈາລະນາ​ແກ້​ໄຂ​ຢ່າງ​ທັນການ.

ທ່ານ​ຮອງ​ນາຍົກ ​ຍັງ​ໄດ້​ເນັ້ນໃຫ້​ບັນດາ​ພາກສ່ວນ​ກ່ຽວຂ້ອງ ຍົກ​ສູງ​ຄວາມ​ຮັບຜິດຊອບ​ເປັນເຈົ້າ​ການ​ຕິດຕາມ​ຊີ້​ນຳ​ຕາມ​ໜ້າທີ່ ແລະ ຄວາມ​ຮັບຜິດຊອບ​ຂອງຕົນ ​ໃນ​ການ​ເປັນ​ເຈົ້າ​ຂອງ​ໂຄງການ ຝ່າຍ​ລາວ​ຕ້ອງ​ໃຫ້ການຮ່ວມ​ມື​ກັບ​ຄະນະ​ສະເພາະ​ກິດ ເຮັດ​ແນວໃດ​ເພື່ອ​ໃຫ້​ຜູ້​ຮັບ​ເໝົາປະຕິບັດ​ຖືກຕ້ອງ​ຕາມ​ສັນຍາ ແລະ ໃຫ້ການ​ຮ່ວມ​ມື​ໃນ​ການຕິດຕາມ​ກວດກາ​ໃຫ້​ສົມທົບ​ກັບແຂວງ​ກ່ຽວຂ້ອງ ຄົ້ນຄວ້າ​ເອົາ​ບໍລິ​ສັດ​ຂອງ​ລາວ ​ຜູ້​ຮັບ​ເໝົາ​ວຽກປິ່ນ​ອ້ອມ​ໂຄງການ​ໃຫ້​ໄດ້​ມາດ​ຕະຖານ ພ້ອມ​ທັງ​ສົມທົບ​ກັບ​ຝ່າຍຈີນ​ໃຫ້​ເປັນ​ເອກະ​ພາບ ແລະ ມີການ​ຄຸ້ມ​ຄອງ​ໃຫ້​ແທດ​ເຖິງ ຢູ່​ຂັ້ນທ້ອງຖິ່ນ​ກໍ່​ມີ​ຄວາມ​ຮັບຜິດຊອບ ຫຼື​ເອີ້ນ​ວ່າຄະນະ​ປະສານ​ງານ​ຂັ້ນແຂວງ ນະຄອນຫຼວງ​ວຽງ​ຈັນ ມີເຈົ້າແຂວງ ເຈົ້າ​ຄອງ​ນະຄອນຫຼວງ​ວຽງ​ຈັນ ເປັນ​ຫົວໜ້າ​ຊີ້​ນຳ ກໍ່​ຕ້ອງ​ໄດ້​ມີ​ການ​ປະສານ​ສົມທົບໃຫ້ການ​ຮ່ວມ​ມື​ກັບ​ຄະນະ​ສະເພາະ​ກິດ​ເປັນ​ປົກກະຕິ ເພື່ອ​ພ້ອມກັນ​ແກ້​ໄຂ​ບັນຫາ​ຕ່າງໆ​ໃຫ້​ຖືກຕ້ອງ ແລະ ທັນ​ການ.

ຂ່າວທີ່ກ່ຽວຂ້ອງ