ເພີ່ມທະວີການຮ່ວມມືວຽກປ້ອງກັນຊາດ ເພື່ອຄວາມໝັ້ນຄົງ

342 17 ມ.ກ. 2018 ຂ່າວໜ້າ​ໜຶ່ງ
ເພີ່ມທະວີການຮ່ວມມືວຽກປ້ອງກັນຊາດ ເພື່ອຄວາມໝັ້ນຄົງ

ສະຫາຍ ພົນ​ເອກ ໂງ​ຊວນ​ລິກ ກຳມະການ​ກົມ​ການເມືອງ​ສູນກາງ​ພັກ​ກອມ​ມູ​ນິດ​ຫວຽດນາມ ລັດຖະມົນຕີ​ກະຊວງ​ປ້ອງ​ກັນ​ປະເທດ ​ສສ ຫວຽດນາມ ພ້ອມ​ຄະນະ ແລະ ສົມເດັດ ປີ​ໄຈ​ເສນາ ເຕຍ​ບັນ ຮອງ​ນາຍົກລັດຖະມົນຕີລັດຖະມົນຕີ​ກະຊວງ​ປ້ອງ​ກັນ​ປະເທດ ແຫ່ງ ຣາ​ຊະ​ອານາຈັກ​ກຳປູ​ເຈຍ​ ພ້ອມ​ຄະນະ ​ໄດ້​ເດີນທາງມາ​ຢ້ຽມຢາມ ແລະ ເຮັດ​ວຽກຮ່ວມ​ກັບ​ກະຊວງ​ປ້ອງ​ກັນ​ປະເທດ ແຫ່ງ ​ສປປ ລາວ ຢ່າງ​ເປັນ​ທາງການ ລະຫວ່າງ​ວັນ​ທີ 12-17 ມັງກອນ​ນີ້ ເພື່ອ​ຮັດ​ແໜ້ນ​ການຮ່ວມ​ມື ແລະ ພ້ອມ​ກັນ​ສ້າງຄວາມ​ສະຫງົບ ແລະ ຄວາມ​ເປັນລະບຽບ​ຮຽບ​ຮ້ອຍ​ຕາມ​ຊາຍ​ແດນ ໃຫ້​ນັບ​ມື້​ສູງ​ຂຶ້ນ​ເປັນ​ກ້າວໆ.

ວັນ​ທີ 16 ມັງກອນ 2018 ຢູ່​ທີ່​ທຳ​ນຽບ​ປະທານ​ປະເທດ ສະຫາຍ ບຸນ​ຍັງ ວໍລະ​ຈິດ ເລຂາ​ທິການ​ໃຫຍ່ ຄະນະ​ບໍລິຫານ​ງານສູນ​ກາງ​ພັກ ປະຊາຊົນ ປະຕິວັດລາວ ປະທານ​ປະເທດ ໄດ້​ໃຫ້ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ສະຫາຍ ໂງ​ຊວນ​ລິກ ພ້ອມ​ຄະນະ ໂອກາດ​ນີ້ ສະຫາຍເລຂາທິການ​ໃຫຍ່ ​ໄດ້​ສະແດງຄວາມ​ຊົມເຊີຍ ແລະ ຕີ​ລາຄາສູງ​ຕໍ່​ການ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຄັ້ງ​ນີ້ ຖື​ເປັນ​ການ​ປະກອບສ່ວນສຳຄັນ​ ເຂົ້າ​ໃນ​ການ​ເສີມ​ສ້າງສາຍ​ພົວພັນ​ການ​ຮ່ວມ​ມືສອງຊາດ ລາວ-ຫວຽດນາມ ທີ່​ມີ​ມາແຕ່​ດົນ​ນານ​ແລ້ວ​ນັ້ນ ໃຫ້​ນັບ​ມື້ແຕກ​ດອກ​ອອກ​ຜົນ​ຍິ່ງໆ​ຂຶ້ນ ໂດຍສະເພາະແມ່ນ​ແນວທາງ​ປ່ຽນແປງ​ໃໝ່​ຂອງ​ພັກ-ລັດຖະບານສອງ​ປະເທດ ໄດ້​ເອົາໃຈໃສ່​ເພີ່ມທະວີ​ການ​ຮ່ວມ​ມື​ທາງ​ດ້ານ​ວຽກງານ​ປ້ອງ​ກັນ​ຊາດ-ປ້ອງ​ກັນຄວາມ​ສະຫງົບ ແນໃສ່​ຮັບປະກັນໄດ້​ຄວາມ​ເຂັ້ມແຂງ​ທາງ​ດ້ານການເມືອງ​ທີ່​ໜັກ​ແໜ້ນ ເສດ​ຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່ເນື່ອງ ແລະ ສັງຄົມ​ມີ​ຄວາມ​ສະຫງົບ​ປອດ​ໄພ ປະຊາຊົນ​ສອງຊາດ​ມີ​ການ​ໄປ​ມາ​ພົວພັນ​ກັນຢ່າງ​ໃກ້ຊິດ ຖານ​ມິດ​ອ້າຍ​ນ້ອງ ສ້າງ​ໃຫ້​ເຂດ​ຊາຍ​ແດນ​ມີ​ບັນ​ຍາກາດ ການ​ຄ້າ-ການ​ລົງທຶນທີ່​ດີ ແລະ ຊີວິດ​ການ​ເປັນ​ຢູ່​ຂອງ​ປະຊາ​ຊົນ​ສອງ​ຊາດ ​ນັບ​ມື້​ດີ​ຂຶ້ນ​ເປັນລຳດັບ.

ສະຫາຍ ພົນ​ໂທ ໂງ​ຊວນ​ລິກ ໄດ້​ສະແດງ​ຄວາມ​ຂອບໃຈ​ຕໍ່​ການຕ້ອນຮັບ​ອັນ​ອົບ​ອຸ່ນ ພ້ອມ​ທັງລາຍ​ງານ​ຫຍໍ້​ຜົນສຳເລັດ​ການເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຮ່ວມ​ກັບ​ຄະນະ​ນຳ​ກະຊວງ​ປ້ອງ​ກັນ​ປະເທດ​ຂອງ ​ສປປ ລາວ ໂດຍ​ສອງ​ຝ່າຍ​ໄດ້​ພົບ​ປະຫາລື ແລະ ແລກປ່ຽນ​ບົດຮຽນເຊິ່ງ​ກັນ ແລະ ກັນ ໃນ​ຂົງເຂດວຽກ​ງານ​ຕ່າງໆ ສອງ​ຝ່າຍ​ຍັງ​ລົງເລິກ​ຫາລື​ການ​ເພີ່ມ​ທະວີ ແລະ ຮັດ​ແໜ້ນ​ຄວາມ​ສາມັກຄີ​ຮອບດ້ານ ​ພ້ອມ​ກັບ​ຮ່ວມ​ລົງ​ນາມ​ການຮ່ວມ​ມື​ໃນ​ຊຸມ​ປີ​ຕໍ່ໜ້າ ລະຫວ່າງສອງ​ກອງທັບ ລາວ-ຫວຽດນາມ ຕື່ມ​ອີກ.

ພ້ອມ​ນີ້ ໃນ​ວັນ​ດຽວ​ກັນ​ຢູ່​ທີ່ທຳ​ນຽບ​ປະທານ​ປະເທດ ສະຫາຍ ບຸນ​ຍັງ ວໍລະ​ຈິດ ກໍ່​ໄດ້​ໃຫ້ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ສົມເດັດ ປີ​ໄຈ​ເສນາ ​ເຕຍບັນ ຮອງ​ນາຍົກລັດຖະມົນຕີ​ລັດຖະ​ມົນຕີ​ກະຊວງ​ປ້ອງ​ກັນ​ປະເທດ ແຫ່ງ ຣາ​ຊະ​ອານາຈັກ​ກຳປູເຈຍ ພ້ອມ​ຄະນະ ໂດຍ​ສະຫາຍ​ເລຂາທິ​ການ​ໃຫຍ່ ​ໄດ້​ສະແດງ​ຄວາມຊົມເຊີຍ ແລະ ຕີ​ລາຄາ​ສູງ​ຕໍ່ການ​ເດີນທາງ​ມາ​ຢ້ຽມຢາມ-ເຮັດວຽກ​ຂອງ​ຄະນະ​ຜູ້​ແທນ​ຂັ້ນ​ສູງກຳປູເຈຍ​ຄັ້ງ​ນີ້ ເຊິ່ງ​ຖື​ເປັນ​ການປະກອບສ່ວນ​ສຳຄັນ ​ເຂົ້າ​ໃນ​ການຮັດ​ແໜ້ນ​ການ​ຮ່ວມ​ມື​ສອງ​ຊາດ ລາວ-ກຳປູເຈຍ ກໍ່​ຄືການ​ຮ່ວມມື​ວຽກ​ງານ​ປ້ອງ​ກັນ​ຊາດ ສອງປະເທດ​ໃຫ້​ນັບ​ມື້​ກ້າວ​ສູ່​ລວງ​ເລິກຍິ່ງ​ຂຶ້ນ ພ້ອມ​ນັ້ນ ສະຫາຍ ບຸນຍັງ ວໍລະ​ຈິດ ຍັງ​ຮຽກຮ້ອງ​ໃຫ້​ກຳລັງ​ປ້ອງ​ກັນ​ຊາດ​ສອງ​ຝ່າຍ ​ເອົາໃຈ​ໃສ່​ແກ້​ໄຂ​ບັນຫາ​ຕາມ​ຊາຍແດນ​ດ້ວຍ​ຄວາມ​ຮັບຜິດຊອບ​ສູງ ບົນ​ພື້ນຖານ​ຄວາມ​ເຂົ້າ​ອົກ​ເຂົ້າໃຈ​ເຊິ່ງ​ກັນ ແລະ ກັນ ເປັນ​ເຈົ້າການ​ສ້າງ​ເງື່ອນໄຂ​ສະດວກ​ໃຫ້ແກ່​ການ​ສຳ​ຫຼວດ​ປັກ​ຫຼັກ​ໝາຍຊາຍ​ແດນ ຄຽງ​ຄູ່​ກັບ​ການ​ປະສານ​ສົມທົບ​ກັນ​ຢ່າງ​ໃກ້ຊິດ ​ເຂົ້າໃນ​ການຈັດຕັ້ງ​ປະຕິບັດ​ຕິດຕາມ-ກວດກາ​ສະກັດ​ກັ້ນ​ກຸ່ມ​ຄົນ​ບໍ່​ດີ ເຄື່ອນ​ໄຫວ​ສ້າງ​ຄວາມ​ບໍ່​ສະຫງົບຕາມ​ຊາຍ​ແດນ ​ໃຫ້​ນັບ​ມື້​ຫຼຸດໜ້ອຍ​ຖ້ອຍ​ລົງ​ເປັນ​ກ້າວໆ.

ຂ່າວທີ່ກ່ຽວຂ້ອງ