ກົມພາສີ ຈະນຳໃຊ້ເຄື່ອງມືທັນສະໄໝ ຮອງຮັບນັກທ່ອງທ່ຽວຢູ່ດ່ານສາກົນຕ່າງໆ

316 18 ມ.ກ. 2018 ຂ່າວໜ້າ​ໜຶ່ງ

ກົມ​ພາສີ ກະຊວງ​ການ​ເງິນ​ ໄດ້​ເປີດເຜີຍ​ອາທິດ​ນີ້​ວ່າ: ພວມ​ຫ້າງ​ຫາ​ກະກຽມ​ຕິດ​ຕັ້ງ ແລະ ນຳ​ໃຊ້ລະບົບ​ເອ​ເລັກ​ໂຕຣ​ນິກ​ທັນ​ສະໄໝ ຕາມ​ດ່ານ​ສາກົນ​ຕ່າງໆ​ທີ່​ມີ​ເງື່ອນໄຂ ເພື່ອ​ອຳນວຍ​ຄວາມ​ສະດວກ​ສະບາຍ ແລະ ວ່ອງໄວ​ທັນໃຈ​ຕໍ່​ແຂກ​ພາຍ​ໃນ-ຕ່າງປະເທດ ເດີນທາງ​ເຂົ້າ-ອອກ ພາຍຫຼັງ​ລັດຖະບານ​ໄດ້ປະກາດ​ໄຂ​ປີ​ທ່ອງ​ທ່ຽວ 2018 ຢ່າງ​ເປັນ​ທາງ​ການ​ ໃນ​ທ້າຍ​ປີ 2017 ຜ່ານ​ມາ ຂະນະ​ທີ່​ພາກ​ລັດ​ຕັ້ງ​ເປົ້າ​ໝາຍ​ສູ້​ຊົນ​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄດ້ 5 ລ້ານ​ກວ່າ​ຄົນ ກັບ​ການ​ສ້າງ​ລາຍ​ຮັບ 900 ລ້ານ​ກວ່າ​ໂດ​ລາ​ສະຫະລັດ.

ທ່ານ ບຸນ​ປະເສີດ ສີ​ກຸນລະບຸດ ຮັກສາ​ການ​ຫົວໜ້າ​ກົມ​ພາສີ ກະຊວງ​ການ​ເງິນ​ໃຫ້​ຮູ້​ວ່າ: ພາຍຫຼັງ​ທີ່​ລັດຖະ​ບານ​ໄດ້​ປະກາດ​ເປີດ​ປີ​ທ່ອງ​ທ່ຽວ​ຢ່າງ​ເປັນ​ທາງ​ການ​ ໃນ​ທ້າຍ​ປີ 2017 ຜ່ານ​ມາ ຫຼາຍ​ຂະແໜງການທັງ​ພາກ​ລັດ ແລະ ເອກະ​ຊົນ ​ກໍ່​ໄດ້​ຫ້າງ​ຫາ​ກະກຽມ​ຫຼາຍໆ​ປັດ​ໄຈ ເພື່ອ​ອຳນວຍ​ຄວາມ​ສະດວກ ແລະ ເຮັດ​ໃຫ້​ປີ​ທ່ອງ​ທ່ຽວ ປີ 2018 ນີ້​ໃຫ້​ມີ​ບັນຍາກາດ​ຟົດຟື້ນ ແລະ ສາມາດ​ດຳເນີນ​ໄປ​ດ້ວຍ​ດີ ທັງ​ເປັນການ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ປະເທດ​ລາວ​ ໃຫ້​ບັນລຸ​ຕົວ​ເລກ​ທີ່​ລັດຖະບານ​ໄດ້​ກຳນົດ​ໄວ້ ໃນ​ນີ້ ກົມ​ພາສີ​ກໍ່​ໄດ້​ມີ​ທິດ​ທາງ ແລະ ແຜນການ​ຢ່າງ​ເປັນ​ລະບົບ ​ໃນ​ການ​ຫ້າງ​ຫາ​ກະກຽມ​ຫຼາຍ​ປັດ​ໄຈ ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ຜູ້ໂດຍສານ ກໍ່​ຄື​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ ໂດຍ​ໄດ້​ສົມທົບ​ກັບ​ທາງ​ທະນາຄານ​ການ​ຄ້າ​ຕ່າງປະເທດ​ລາວ ທົດ​ລອງ​ນຳ​ໃຊ້​ເຄື່ອງ​ຈັກ​ເອ​ເລັກ​ໂຕຣ​ນິກ​ທັນ​ສະໄໝ ເກັບ​ຄ່າ​ທຳນຽມ​ຜູ້ໂດຍສານ ລົດ​ທີ່​ຜ່ານ​ບັນດາ​ດ່ານ​ສາກົນ ເປັນຕົ້ນແມ່ນ​ດ່ານ​ສາກົນ​ມິດຕະພາບ​ໜຶ່ງ​ ໃຫ້​ມີ​ຄວາມ​ສະດວກ​ວ່ອງໄວ​ຂຶ້ນ ເຊິ່ງ​ລະບົບ​ດັ່ງກ່າວ​ເຮັດ​ໜ້າທີ່​ກວດກາ ຫຼື ສະ​ແກນ​ໜັງສືຜ່ານແດນ ແລະ ກຳນົດ​ລາຄາ​ອອກ​ມາ ໂດຍ​ຈະ​ຜ່ານ 3 ຊ່ອງ​ທາງ ຄື: ຊ່ອງ​ທາງ​ໜຶ່ງ​ຜ່ານ​ບັດ​ເອ​ທີ​ເອັມ (ຕູ້​ວີ​ອອດ) ຊ່ອງ​ທາງ​ສອງ​ຊຳລະ​ຜ່ານ​ມື​ຖື (ວີ​ຊີ​ແອວ​ວັນ) ຂອງ​ທະນາຄານ​ການ​ຄ້າ​ຕ່າງປະເທດ​ລາວ ແລະ ຊ່ອງ​ທາງ​ຊຳລະ​ດ້ວຍ​ເງິນສົດ ຜ່ານ​ຕູ້​ວີ​ອອດ ເຊິ່ງ​ຈະ​ມີ​ໃບ​ບິນ​ເພື່ອ​ນຳໄປ​ເປີດ​ໄມ້​ກ້ານ ໂດຍ​ເຄື່ອງມື​ທັນ​ສະໄໝ​ເປັນ​ໂຕ​ອະນຸຍາດ​ເປີດ-ປິດ ເຊິ່ງ​ຈະ​ສ້າງ​ຄວາມ​ສະດວກ​ວ່ອງໄວ ແລະ ທັນໃຈ​ໃຫ້​ຜູ້ໂດຍສານ​ຫຼາຍ​ຂຶ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ