ຮັບຮອງເອກະສານຄຳຮ້ອງຄຸ້ມຄອງທົ່ງໄຫຫີນ ນຳສະເໜີເປັນມໍລະດົກໂລກ

246 18 ມ.ກ. 2018 ຂ່າວໜ້າ​ໜຶ່ງ
ຮັບຮອງເອກະສານຄຳຮ້ອງຄຸ້ມຄອງທົ່ງໄຫຫີນ ນຳສະເໜີເປັນມໍລະດົກໂລກ

ກອງ​ປະຊຸມ​ລະດັບ​ຊາດ ເພື່ອຮັບຮອງ​ເອກະສານ​ຄຳ​ຮ້ອງ ແລະ ແຜນການ​ຄຸ້ມ​ຄອງ​ແຫຼ່ງ​ມໍລະດົກ ທົ່ງ​ໄຫ​ຫີນ ແຂວງ​ຊຽງ​ຂວາງ ຈັດຂຶ້ນ​ວັນ​ທີ 17 ມັງກອນ 2018 ທີ່​ຫໍວັດທະນະທຳ​ແຫ່ງ​ຊາດ ໂດຍ​ເປັນປະທານ​ຂອງ​ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ​ກະຊວງຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ມີ​ທ່ານ ບົວ​ສອນ ສີນວນ​ທອງ ຮອງ​ເຈົ້າແຂວງ​ຊຽງຂວາງ ພ້ອມ​ດ້ວຍ​ບັນດາ​ຫົວໜ້າກົມ ຮອງ​ກົມ ຫົວໜ້າ​ພະ​ແນກຈາກ​ກະຊວງ​ຕ່າງໆ​ອ້ອມ​ຂ້າງ​ສູນກາງ ແລະ ທ້ອງຖິ່ນ​ກ່ຽວຂ້ອງ ເຂົ້າ​ຮ່ວມ.

ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີກະຊວງ ຖວທ ທັງເປັນ​ປະທານ​ຄະນະ​ກຳມະການລະດັບ​ຊາດ ​ເພື່ອ​ມໍລະດົກ​ໂລກ ກ່າວ​ວ່າ: ຜ່ານ​ມາ​ລັດຖະບານລາວ ແລະ ອົງການ​ອຸຍ​ແນສ​ໂກ ໄດ້​ໃຫ້​ຄວາມ​ສຳຄັນ​ຕໍ່​ແຫຼ່ງ​ມໍ​ລະດົກ​ທົ່ງ​ໄຫ​ຫີນ​ມາ​ເປັນ​ເວລາ​ດົນນານ ໂດຍ​ໄດ້​ດຳເນີນ​ການ​ເກັບກຳ​ສຶກ​ສາ​ຄົ້ນຄວ້າ ວາງ​ແຜນການ​ປົກ​ປັກ​ຮັກສາ​ມໍລະດົກ​ດັ່ງກ່າວ​ໃຫ້​ມີ​ຄວາມ​ຍືນ​ຍົງ ແລະ ເກີດ​ຜົນ​ປະໂຫຍດ​ແກ່​ການ​ທ່ອງທ່ຽວ ເຊິ່ງ​ໄດ້​ນຳ​ສະເໜີ​ເປັນ​ມໍ​ລະດົກ​ໂລກ ເລີ່ມ​ແຕ່​ປີ 1998 ຮອດ​ປີ 2010 ລວມ​ເປັນ 4 ໄລຍະ ແຕ່ແມ່​ບົດ​ຄຸ້ມ​ຄອງ​ທົ່ງ​ໄຫ​ຫີນຍັງ​ບໍ່ທັນ​ໄດ້​ຖືກ​ຮັບຮອງ​ຢ່າງ​ເປັນ​ທາງການ ມາ​ເຖິງ​ປັດຈຸບັນ ເອກະສານ​ຄຳ​ຮ້ອງ ແລະ ແຜນແມ່​ບົດ​ດັ່ງກ່າວ​ກໍ່​ໄດ້​ສຳເລັດ​ຢ່າງສົມບູນ​ຕາມ​ແຜນການ​ກຳນົດ​ໄວ້ ໃນ​ເດືອນ​ມັງກອນ 2018.

ພາຍຫຼັງ​ທີ່​ສຳເລັດ​ກອງ​ປະຊຸມດັ່ງກ່າວ​ຢູ່​ຂັ້ນ​ສູນ​ກາງ​ຄັ້ງ​ນີ້ ຄະນະ​ວິຊາ​ການ​ຈາກ​ສູນ​ກາງ ໂດຍສະເພາະ ກົມ​ມໍລະດົກ ​ຍັງ​ຈະ​ໄດ້ເປັນໃຈ​ກາງ​ສືບຕໍ່​ສົມທົບ​ກັບ​ພະແນກ ຖວທ ແຂວງ​ຊຽງ​ຂວາງ ວາງ​ແຜນ​ວຽກ​ງານ​ອະນຸ​ຮັກ​ມໍ​ລະດົກ​ຢູ່​ພື້ນ​ທີ່​ແຫຼ່ງ​ໄຫ​ຫີນ 11 ແຫ່ງ ທີ່​ນຳ​ສະເໜີ​ເປັນ​ມໍລະດົກ​ໂລກ ​ໃຫ້ເປັນ​ລະບົບ​ສາມາດ​ຮັບ​ໃຊ້​ການທ່ອງ​ທ່ຽວ​ໄດ້​ເປັນ​ຢ່າງ​ດີ ສ້າງ​ສິ່ງອຳນວຍ​ຄວາມ​ສະດວກ​ເຂົ້າ​ເຖິງສະຖານທີ່ ສະໜອງ​ຂໍ້​ມູນ ສ້າງຫ້ອງ​ຂໍ້​ມູນ​ແຕ່​ລະ​ສະຖານທີ່​ໄຫຫີນ ຈຸດ​ຊົມ​ພູມີ​ທັດ ບ່ອນ​ຈອດລົດ ຈຸດ​ຂາຍເຄື່ອງ​ທີ່​ລະນຶກ ຮ້ານກິນ​ດື່ມ ຫ້ອງ​ນ້ຳ ແລະ ອື່ນໆ ເພື່ອ​ບໍລິການ​ນັກ​ທ່ອງ​ທ່ຽວ​ທີ່ເຂົ້າ​ມາ​ທ່ຽວ​ໃນ​ສະຖານທີ່​ໃຫ້ເໝາະ​ສົມ ໂດຍ​ປະສານ​ສົມທົບກັບ​ຂະແໜງ​ທ່ອງ​ທ່ຽວ​ແຂວງ ແລະ ອຳນາດ​ການ​ປົກຄອງ​ຢູ່​ຂັ້ນທ້ອງຖິ່ນ ພິຈາລະນາ​ກົນ​ໄກ​ຄຸ້ມຄອງ ລາຍ​ຮັບ-ລາຍ​ຈ່າຍ ແຫຼ່ງມໍລະດົກ​ໄຫ​ຫີນ​ໃຫ້​ເປັນ​ລະບົບ ສຶກ​ສາ​ຄວາມ​ເປັນ​ໄປ​ໄດ້​ໃນ​ການສ້າງ​ກອງ​ທຶນ​ອະນຸ​ຮັກ​ມໍລະດົກໄຫ​ຫີນ ຫຼື ກອງ​ມໍລະດົກ​ຂັ້ນແຂວງ ເພື່ອ​ເປັນ​ແຫຼ່ງ​ທຶນ​ບູ​ລະນະ​ຮັກສາ​ມໍລະດົກ​ວັດທະນະທຳໃຫ້​ມີ​ຄວາມ​ຍືນ​ຍົງ.

ຂ່າວທີ່ກ່ຽວຂ້ອງ