ເຈົ້າຄອງ ເນັ້ນກອງພັນ 512 ປັບປຸງກໍ່ສ້າງກົມກອງໃຫ້ມີຄວາມໜັກແໜ້ນເຂັ້ມແຂງ

253 19 ມ.ກ. 2018 ຂ່າວໜ້າ​ໜຶ່ງ
ເຈົ້າຄອງ ເນັ້ນກອງພັນ 512 ປັບປຸງກໍ່ສ້າງກົມກອງໃຫ້ມີຄວາມໜັກແໜ້ນເຂັ້ມແຂງ

ເນື່ອງ​ໃນ​ໂອກາດ​ວັນ​ສ້າງຕັ້ງກອງທັບ​ປະຊາຊົນ​ລາວ ຄົບຮອບ 69 ປີ (20/1/1949-20/1/2018) ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງຈັນ ພ້ອມ​ດ້ວຍ​ຄະນະ ໄດ້​ລົງ​ຢ້ຽມຢາມ ແລະ ພົບ​ປະ​ໂອ້​ລົມ​ນາຍ ແລະ ພົນທະຫານ ກອງພັນ 512 ໃນ​ວັນ​ທີ 18 ມັງກອນ 2018 ໂດຍການ​ຕ້ອນຮັບ​ຂອງ​ທ່ານ ພົນ​ຈັດຕະ​ວາ ສີ​ພອນ ຈັນ​ສົມ​ວົງ ຄະນະປະຈຳ​ພັກ ນວ ຫົວໜ້າ​ການເມືອງ​ກອງ​ບັນຊາ​ການ​ທະຫານນະຄອນຫຼວງ ພ້ອມດ້ວຍ​ນາຍ ແລະ ພົນທະຫານ​ເຂົ້າຮ່ວມ.

ໂອກາດ​ນີ້ ທ່ານ ​ພັທ ສະກຸນ ສະແຫວງ​ສຸກ ໄດ້​ຂຶ້ນ​ລາຍ​ງານຫຍໍ້​ກ່ຽວ​ກັບ​ຈຸດ​ພິເສດ​ທີ່​ຕັ້ງ​ພາ ລະ​ບົດບາດ​ໜ້າທີ່​ການເມືອງ ແລະ ການ​ປັບປຸງ​ກໍ່ສ້າງ​ກົມ​ກອງ ເຊິ່ງ​ໄດ້​ຍົກ​ໃຫ້​ເຫັນ​ໝາກຜົນ​ການເຄື່ອນ​ໄຫວ​ປະຕິບັດ​ໜ້າທີ່​ຂອງກົມ​ກອງ ໂດຍ​ຕະຫຼອດ​ໄລຍະຜ່ານ​ມາ ຄະນະ​ພັກ-ຄະນະ​ບັນຊາ ໄດ້​ເອົາໃຈໃສ່​ຊີ້​ນຳ-ນຳພາ​ວຽກງານ​ແຕ່​ລະ​ດ້ານ​ຢ່າງ​ຕັ້ງໜ້າ ເປັນຕົ້ນແມ່ນ​ການ​ປະຕິບັດ​ໜ້າທີ່​ມີ​ຜົນສຳເລັດ​ອັນ​ໃຫຍ່​ຫຼວງ ເຮັດ​ໃຫ້ ນວ ມີ​ຄວາມ​ສະຫງົບ​ປອດ​ໄພ ເອົາໃຈໃສ່​ເຮັດ​ໜ້າທີ່​ພາລາ​ທິ​ການ ແກ້​ໄຂ​ຊີວິດ​ການເປັນ​ຢູ່​ພາຍ​ໃນ ດ້ວຍ​ການ​ອອກແຮງ​ແຂ່ງຂັນ​ເພີ່ມ​ພູນ​ຜະລິດຜົນ ເພື່ອ​ສ້າງ​ໃຫ້​ກົມ​ກອງ​ສາມາດລ້ຽງ​ກຸ້ມ​ຕົນ​ເອງ ເພິ່ງ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍຕົນ​ເອງ ເຮັດ​ໃຫ້​ປັດຈຸບັນ​ກົມ​ກອງມີ​ຄວາມ​ເຂັ້ມແຂງ​ຂຶ້ນ​ເທື່ອ​ລະກ້າວ.

ຈາກ​ນັ້ນ ທ່ານ ສິນ​ລະ​ວົງ ຄຸດໄພທູນ ໄດ້​ໃຫ້​ກຽດ​ໂອ້​ລົມ​ກ່ອນ ອື່ນ​ທ່ານ​ໄດ້​ຕາງໜ້າ​ໃຫ້​ກົມ​ການເມືອງ​ສູນ​ກາງ​ພັກ ແລະ ອຳນາດການ​ປົກຄອງ ນະຄອນຫຼວງ​ວຽງຈັນ​ ຢ້ຽມຢາມ​ຖາມ​ຂ່າວ​ເຖິງ​ນາຍ ແລະ ພົນທະຫານ​ທີ່​ປະຈຳ​ຢູ່​ກົມກອງ​ໃນ​ການ​ປະຕິບັດ​ໜ້າທີ່​ປ້ອງກັນ​ຊາດ ເຮັດ​ໃຫ້​ມີ​ຄວາມ​ສະຫງົບ​ສ້າງ​ເງື່ອນໄຂ​ທຸກ​ຢ່າງ​ ໃນການ​ສ້າງສາ​ພັດທະນາ​ປະເທດຊາດ ພ້ອມ​ນີ້ ທ່ານ​ຍັງ​ຖື​ໂອກາດນີ້​ເນັ້ນ​ໃຫ້​ນາຍ ແລະ ພົນທະຫານ ກອງພັນ 512 ຈົ່ງ​ສືບຕໍ່​ເສີມ​ຂະຫຍາຍ​ມູນເຊື້ອ​ອັນ​ດີງາມ​ຂອງກອງທັບ​ປະຊາຊົນ​ລາວ ກໍ່​ຄືກົມກອງ​ຂອງ​ຕົນ ເອົາໃຈໃສ່​ຕໍ່​ລະບຽບ​ວິໄນ​ຂອງ​ກອງທັບ​ ຕັ້ງໜ້າເຝິກຝົນ​ຫຼໍ່​ຫຼອມ​ຕົນ​ເອງ​ທາງ​ດ້ານຄຸນສົມບັດ​ສິນ​ທຳ​ປະຕິວັດ ພ້ອມທັງ​ກໍ່ສ້າງ​ພາລາ​ທິ​ການ​ກັບ​ທີ່ ເພື່ອ​ປັບປຸງ​ກໍ່ສ້າງ​ກົມ​ກອງ​ໃຫ້​ມີຄວາມ​ໜັກ​ແໜ້ນ​ເຂັ້ມແຂງ ​ຕາມທິດ​ສ້າງ​ກົມ​ກອງ​ໃຫ້​ກາຍເປັນ​ກົມກອງ ແລະ ນັກຮົບ​ວັດທະນະທຳທີ່​ມີ​ແບບແຜນ​ທັນ​ສະໄໝ ພ້ອມກັນ​ເຮັດ​ສຳເລັດ​ໜ້າທີ່​ທີ່​ພັກ-ລັດ ມອບ​ໝາຍ​ໃນ​ພາລະກິດ​ປົກ​ປັກຮັກສາ​ປະເທດ​ຊາດ.

ໃນ​ໂອກາດ​ຢ້ຽມຢາມ​ກອງພັນ 512 ຄັ້ງ​ນີ້ ທ່ານ​ເຈົ້າ​ຄອງ​ນະຄອນ​ຫຼວງ​ວຽງ​ຈັນ ຍັງ​ໄດ້​ມອບເງິນ​ຈຳນວນ 11 ລ້ານ​ກີບ ແລະ ເຄື່ອງ​ບໍລິໂພກ-ອຸປະໂພກຈຳນວນ​ໜຶ່ງ ມູນ​ຄ່າ 14 ລ້ານ​ກວ່າກີບ ໃຫ້​ກົມ​ກອງ​ດັ່ງ​ກວ່າ​ຕື່ມ​ອີກ.

ຂ່າວທີ່ກ່ຽວຂ້ອງ