ທ່ານຮອງນາຍົກ ຢ້ຽມຢາມວິທະຍາຄານກົມມະດຳ

327 19 ມ.ກ. 2018 ຂ່າວໜ້າ​ໜຶ່ງ
ທ່ານຮອງນາຍົກ ຢ້ຽມຢາມວິທະຍາຄານກົມມະດຳ

ເນື່ອງ​ໃນ​ໂອກາດ​ວັນ​ສ້າງຕັ້ງກອງທັບ​ປະຊາຊົນ ປະຕິວັດ​ລາວ ຄົບຮອບ 69 ປີ (20/01/1959-20/01/2018) ໃນ​ວັນ​ທີ 17 ມັງກອນ 2018 ທ່ານ ສອນ​ໄຊ ສີ​ພັນດອນ ຮອງ​ນາຍົກລັດຖະມົນຕີ ພ້ອມ​ດ້ວຍ​ຄະນະ​ນຳ​ຈາກ​ກະຊວງ​ປ້ອງ​ກັນ​ປະເທດ ແລະ ຄະນະ​ ໄດ້​ເຄື່ອນ​ໄຫວ ແລະ ຢ້ຽມຢາມ​ວິທະຍາຄານ​ກົມ​ມະ​ດຳ ແຂວງ​ວຽງ​ຈັນ ເຊິ່ງ​ມີ​ທ່ານ​ພົນ​ຈັດຕະວາ ບຸນ​ຈັນ ລາດ​ສະ​ວົງ ຫົວໜ້າ​ການ​ທະຫານ ວິທະຍາຄານ​ກົມ​ມະ​ດຳ ພ້ອມ​ດ້ວຍ​ບັນດາ​ຄະນະ​ນຳ​ຂອງວິທະຍາຄານ ທ່ານ​ຮອງ​ເຈົ້າແຂວງ​ວຽງ​ຈັນ ອຳນາດ​ການ​ປົກຄອງ​ທ້ອງຖິ່ນ ຄະນະ​ຮັບຜິດຊອບຈຸດ​ສຸມ ບັນດາ​ຄູ-ອາຈານ ແລະ ນັກຮຽນ ອ້າຍ​ເອື້ອຍ​ນ້ອງ​ທະຫານ​ພາຍ​ໃນ​ວິທະຍາຄານ​ໃຫ້ການ​ຕ້ອນຮັບ.

ໃນ​ການ​ມາ​ເຄື່ອນ​ໄຫວ​ຢ້ຽມຢາມ​ຄັ້ງ​ນີ້ ທ່ານພັນ​ເອກ ຖາວອນ ແກ້ວ​ອິນ​ທະ​ວົງ ຫົວໜ້າການເມືອງ​ວິທະຍາຄານກົມ​ມະດຳ ກໍ່​ໄດ້​ລາຍ​ງານ​ໃຫ້​ຊາບ​ກ່ຽວກັບ​ປະຫວັດ​ຄວາມ​ເປັນ​ມາ ແລະ ການເຄື່ອນໄຫວ​ວຽກ​ງານ​ໃນ​ໄລຍະ​ຜ່ານ​ມາ​ຂອງ​ວິທະຍາຄານ ດັ່ງກ່າວ ເຊິ່ງ​ໄດ້​ສືບ​ທອດ​ມູນເຊື້ອມາ​ຈາກ​ໂຮງຮຽນ​ກົມ​ມະ​ດຳ​ຊັ້ນຕົ້ນ​ໃນ​ເມື່ອ​ກ່ອນ ແລະ ເປັນ​ໂຮງຮຽນ​ຫຼັງ​ທຳ​ອິດ​ຂອງ​ກອງທັບທີ່ປະທານ ໄກສອນ ພົມວິຫານ ໄດ້ປະກາດ​ສ້າງຕັ້ງ​ຂຶ້ນໃນ​ວັນ​ທີ 18 ມິຖຸນາ 1955 ທີ່​ບ້ານ​ກາງ​ໂມງ ເມືອງ​ໂສຍ ແຂວງ​ຫົວພັນ ທີ່​ເປັນເຂດ​ທີ່​ໝັ້ນ​ຂອງ​ການ​ປະຕິວັດ ໃນເວລາ​ນັ້ນ ປັດຈຸບັນ ວິທະຍາຄານກົມ​ມະ​ດຳ ໄດ້​ປະຕິບັດ​ໜ້າທີ່​ພາລະ​ບົດບາດ​ໃນ​ການ​ດຳເນີນການ​ເຝິກອົບຮົມ-ບຳລຸງ​ກໍ່ສ້າງ ນາຍ​ສິບ ແລະ ນາຍ​ທະຫານ​ລຸ້ນສືບ​ທອດ ການ​ປັບປຸງ​ກໍ່ສ້າງ​ກົມກອງ​ປະຕິບັດ​ໜ້າທີ່​ກໍ່ສ້າງ​ຮາກຖານ​ການເມືອງ ພົວພັນ​ປະສານສົມທົບ​ກັບ​ອຳນາດ​ການ​ປົກຄອງອ້ອມ​ຂ້າງ ປະຕິບັດ​ໜ້າທີ່​ຄົ້ນຄວ້າວິທະຍາສາດ ປະຫວັດສາດ​ການທະຫານ-ການເມືອງ.

ວິທະຍາຄານກົມ​ມະ​ດຳ ປະກອບ​ມີ​ທັງ​ໝົດ 5 ຫຼັກສູດ​ການຮຽນ-ການ​ສອນ ເຊິ່ງ​ຕະຫຼອດຫຼາຍ​ປີ​ທີ່​ຜ່ານ​ມາ ສາມາດ​ບຳລຸງກໍ່ສ້າງ​ພະນັກງານ ແລະ ນາຍສິບ ອອກ​ຮັບ​ໃຊ້​ຊາດ​ໄດ້​ຫຼາຍກວ່າ 10 ພັນ​ຄົນ ຊຶ່ງ​ລ້ວນ​ແຕ່ເປັນ​ຜູ້​ທີ່​ມີ​ຄວາມ​ຮູ້​ຄວາມ​ສາມາດ ມີ​ຄວາມ​ຈົງ​ຮັກ​ພັກດີ ຊື່ສັດບໍລິສຸດ​ຕໍ່​ພັກ-ລັດ ແລະ ປະເທດຊາດ ມີ​ຫຼາຍ​ສະຫາຍ ໄດ້​ກາຍເປັນ​ນັກຮົບ​ແຂ່ງຂັນ ເປັນ​ວິລະ​ຊົນແຫ່ງ​ຊາດ ເປັນ​ພະນັກງານ​ຂັ້ນສູງ​ຂອງ​ພັກ ລັດ ແລະ ກອງທັບ.

ໂອກາດ​ນີ້ ທ່ານ​ຮອງ​ນາຍົກ ກໍ່​ໄດ້​ໂອ້​ລົມ​ຕໍ່​ຄະນະ​ພັກ-ຄະນະນຳ ຄູ-ອາຈານ ແລະ ນັກຮຽນການ​ທະຫານ​ຂອງ​ວິທະຍາຄານດັ່ງກ່າວ ເຊິ່ງ​ທ່ານ​ໄດ້​ນຳ​ເອົາຄວາມ​ຢ້ຽມຢາມ​ຖາມ​ຂ່າວ​ອັນ​ອົບອຸ່ນ ຄວາມ​ຮັກແພງ​ອັນ​ສະໜິດສະໜົມຈາກ​ສູນ​ກາງ​ພັກ ແລະ ລັດຖະບານ ມາ​ຍັງ​ບັນດາ​ອ້າຍນ້ອງ​ທະຫານ ແລະ ຜ່ານ​ບັນດາສະຫາຍ ໄປ​ຍັງ​ບັນດາ​ຄອບຄົວ​ຜູ້ທີ່​ໄດ້​ສະຫຼະ​ຊີວິດ ຜູ້​ບາດເຈັບ ຜູ້ເຈັບ​ປ່ວຍ ທີ່​ກຳລັງ​ພະຍາບານຕົນ ບັນດາ​ນາຍ ແລະ ພົນ​ທະຫານ ທີ່​ອອກ​ໄປ​ປະຕິບັດ​ໜ້າທີ່​ຢູ່ເຂດ​ທຸລະກັນດານ ແລະ ບັນດາສະຫາຍ​ທີ່​ອອກ​ພັກຜ່ອນ​ບຳນານ ພ້ອມ​ທັງ​ສະແດງ​ຄວາມ​ຍ້ອງຍໍສັນລະເສີນ​ມາ​ຍັງ​ບັນດາ​ສະຫາຍ ພະນັກງານ ແລະ ນັກຮົບ​ທົ່ວ​ກົມກອງ ທີ່​ໄດ້​ພ້ອມ​ກັນ​ຕັ້ງໜ້າ​ເຮັດສຳເລັດ​ໜ້າທີ່​ອັນ​ມີ​ກຽດ​ສະຫງ່າ​ຂອງ​ຕົນ ນອກຈາກ​ນີ້ ຕໍ່​ກັບຄວາມ​ຫຍຸ້ງຍາກ ແລະ ສິ່ງ​ທ້າທາຍ​ຫຼາຍ​ປະການ ທ່ານ​ຮອງ​ນາຍົກ​ຍັງ​ໄດ້​ຍົກ​ໃຫ້​ເຫັນ​ສະພາບການ​ພົ້ນ​ເດັ່ນ​ທີ່​ເກີດ​ຂຶ້ນ​ໃນ​ພາກພື້ນ ແລະ ສາກົນ ກໍ່​ຄືໃນ ​ສປປ ລາວ ພວກ​ເຮົາ​ທີ່​ຍັງ​ສືບຕໍ່​ຜັນ​ແປຢ່າງ​ສະຫຼັບ​ສັບ​ຊ້ອນ ການ​ເກີດ​ໄພພິບັດ​ທຳ​ມະ​ຊາດ ອິດ​ທິ​ກຳລັງ​ປໍລະ​ປັກ ແລະ ພວກ​ກຸ່ມ​ຄົນ​ບໍ່​ດີ ຍັງສືບຕໍ່​ຍູ້​ແຮງ​ການເຄື່ອນໄຫວ​ທຳລາຍ​ມ້າງເພ​ຢ່າງຮອບດ້ານ ດ້ວຍຫຼາຍ​ຮູບ-ຫຼາຍ​ສີ ແລະ ເລິກແລບ​ກວ່າ​ເກົ່າ.

ບັນດາ​ສະຫາຍ​ໃນ​ກຳລັງ​ປະກອບ​ອາວຸດ ຕ້ອງ​ໄດ້​ອອກແຮງ ແລະ ສຸມ​ທຸກ​ຄວາມ​ສາມາດເຂົ້າ​ໃນ​ການຈັດຕັ້ງ​ປະຕິບັດ​ສອງໜ້າທີ່​ຍຸດ​ທະ​ສາດ ໃນ​ເງື່ອນໄຂໃໝ່ ຊຶ່ງ​ກ່ອນ​ອື່ນ​ໝົດ ຕ້ອງ​ເຊີດຊູ​ສະຕິ​ລະວັງ​ຕົວ ມີ​ສະຕິ​ໃນ​ການປົກ​ປັກ​ຮັກສາ​ແນວທາງ​ນະ​ໂຍບາຍ​ຂອງ​ພັກ ແລະ ລັດ ປົກ​ປັກຮັກສາ​ໝາກຜົນ​ຂອງ​ການ​ປະຕິວັດ ປົກ​ປັກ​ຮັກສາ​ລະບອບ​ໃໝ່ ປະຊາທິປະໄຕ ປະຊາຊົນ ໄວ້​ໃຫ້ໝັ້ນຄົງ ສົມທົບ​ແໜ້ນ​ວຽກ​ງານ ​ປກຊ-​ປກສ ກັບ​ການ​ສ້າງສາ​ພັດທະ​ນາ​ເສດຖະກິດ-ສັງຄົມ ​ປັບປຸງພາຍ​ໃນ​ໃຫ້​ໜັກ​ແໜ້ນ ເຂັ້ມແຂງ ແລະ ເດັດຂາດ ສືບຕໍ່​ປົກ​ປັກ​ຮັກສາ ແລະ ເສີມ​ຂະຫຍາຍ​ມູນເຊື້ອອັນ​ດີງາມ​ຂອງ​ຕົນ ຕັ້ງໜ້າ​ປະກອບ​ສ່ວນ​ເຂົ້າ​ໃນ​ການ​ຊ່ວຍເຫຼືອກຳລັງ​ທ້ອງຖິ່ນ​ຢູ່​ຮາກ​ຖານ ສຸມທຸກ​ເງື່ອນໄຂ​ຄວາມ​ສາມາດ ເພື່ອກ້າວ​ໄປ​ເຖິງ​ການ​ກຸ້ມ​ຕົນ​ເອງ​ຢ່າງຮອບດ້ານ ດ້ວຍ​ການ​ສ້າງ​ວຽກງານ​ພະລາທິການ​ກັບ​ທີ່ ເປັນວຽກ​ງານ​ຕົ້ນຕໍ ແລະ ສືບຕໍ່​ເປີດກວ້າງ​ການ​ພົວພັນ​ສາມັກຄີ​ສາກົນ ຕາມ​ແນວທາງ​ການ​ຕ່າງ​ປະເທດ​ຂອງ​ພັກ.

ຂ່າວທີ່ກ່ຽວຂ້ອງ