ກຸ່ມບໍລິສັດດອກງີ້ວຄຳຕອບໂຕ້ອາເມຣິກາ

302 08 ກ.ພ. 2018 ຂ່າວໜ້າ​ໜຶ່ງ

ເມື່ອ​ບໍ່​ດົນ​ນີ້ ທ່ານ ຈ້າວ ເຫວີຍ ປະທານ​ສະພາ​ບໍລິຫານ​ເຂດ​ເສດຖະກິດ​ພິເສດສາມ​ລ່ຽມ​ຄຳ ປະທານ​ກຸ່ມ​ບໍລິສັດ ​ດອກ​ງີ້ວ​ຄຳ ຈຳກັດ ໄດ້​ອອກ​ມາ​ຖະແຫຼງ​ຂ່າວ​ຕໍ່​ກັບ​ຂໍ້​ກ່າວ​ອ້າງ​ຂອງ​ຫ້ອງການ​ຄຸ້ມ​ຄອງ​ຊັບ​ສິນ​ຕ່າງປະເທດ ຂອງ​ກະຊວງ​ການ​ເງິນສະຫະລັດ​ອາ​ເມ​ຣິ​ກາ ໃນ​ວັນ​ທີ 30 ມັງກອນ 2018 ຜ່ານ​ມາ​ນີ້​ວ່າ ເປັນ​ຜູ້​ຄ້າຂາຍ​ຢາ​ເສບ​ຕິດການ​ຄ້າ​ມະນຸດ ການ​ຟອກ​ເງິນ ການ​ໃຫ້​ສິນ​ບົນ ແລະ ການ​ຄ້າຂາຍ​ສັດປ່າ ແມ່ນ​ກຸ່ມ​ອາ​ຊະ​ຍາ​ກອນ​ຂ້າມ​ຊາດ ທີ່​ຈະ​ດຳເນີນ​ມາດ​ຕະການ​ປິດ​ລ້ອມ.

ທ່ານ ຈ້າວ ເຫວີຍ ໄດ້​ກ່າວ​ວ່າ: ຂໍ້​ຫາ​ທີ່​ກ່າວ​ມາ​ຂ້າງ​ເທິງ​ນັ້ນ​ ແມ່ນ​ການ​ປັ້ນ​ແຕ່ງ​ເລື່ອງ​ທີ່​ບໍ່​ມີ​ມູນ​ຄວາມ​ຈິງ ລັດຖະບານ​ສະຫະລັດ​ອາ​ເມ​ຣິ​ກາ ດຳເນີນ​ການ​ຂວ້ຳ​ບາດ​ຝ່າຍ​ດຽວ​ຕໍ່​ປະເທດ​ອື່ນ ກໍ່​ຄືຂົງເຂດ​ອື່ນ​ແມ່ນ​ພຶດຕິ​ກຳ​ບໍ່​ມີ​ເຫດຜົນ ແລະ ໄຮ້​ສາລະ ແມ່ນ​ມີ​ຈຸດປະສົງ​ອື່ນ ພຶດຕິ​ກຳ​ນີ້​ແມ່ນ​ກໍ່ໃຫ້ເກີດ​ຄວາມ​ເຂົ້າໃຈ​ຜິດ​ຢ່າງ​ໜັກໜ່ວງ​ ຕໍ່​ສາທາລະນະ​ສັງຄົມ​ໃນ​ສາກົນ ອັນ​ໄດ້​ກໍ່ໃຫ້ເກີດ​ມີ​ຄວາມ​ກັງວົນ​ທີ່​ບໍ່​ຈຳເປັນ​ໃຫ້​ແກ່​ນັກ​ລົງທຶນ ແລະ ນັກ​ທ່ອງ​ທ່ຽວ​ຈຳນວນ​ຫຼາຍ ເຂດ​ເສດຖະກິດ​ພິເສດ​ສາມ​ລ່ຽມ​ຄຳ ແລະ ກຸ່ມ​ບໍລິສັດ ​ດອກ​ງີ້ວ​ຄຳ ຈຳກັດ ຄັດຄ້ານ​ຢ່າງ​ເດັດຂາດ ຂໍ​ໃຫ້​ທຸກ​ທ່ານ​ຢຶດ​ຖື​ໃນ​ຄວາມ​ເປັນ​ຈິງ ບໍ່​ຫຼົງ​ເຊື່ອ​ຄຳ​ເວົ້າ​ທີ່​ເປັນ​ການ​ຊ່າ​ລື ໃນ​ນາມ​ນັກ​ລົງທຶນ​ສ່ວນ​ຕົວ​ຂອງ​ຂ້າພະເຈົ້າ ແລະ ພະນັກງານ​ທີ່​ກ່ຽວຂ້ອງ ລວມ​ທັງ​ບໍ​ລິສັດ​ທີ່​ໄດ້​ດຳເນີນ​ທຸລະ​ກິດ​ຢູ່​ທຸກໆ​ປະເທດ ແລະ ຂົງເຂດ ພວກ​ເຮົາ​ລ້ວນ​ແຕ່​ມີ​ພຶດຕິ​ກຳ ແລະ ການ​ດຳເນີນ​ທຸລະ​ກິດ​ທີ່​ຖືກຕ້ອງ ແລະ ປົກກະຕິ ໂດຍ​ມີ​ຂະແໜງການຕຸລາການ ກໍ່​ຄືຂະແໜງການ​ກ່ຽວຂ້ອງ​ປະເທດ​ນັ້ນ ​ເປັນ​ຜູ້​ກວດກາ​ຕິດຕາມບໍ່​ເຄີຍ​ໄດ້​ສ້າງ​ຜົນ​ເສຍ​ຫາຍ​ຕໍ່​ຜົນ​ປະໂຫຍດ​ຂອງ​ປະເທດ​ໃດ ແລະ ບຸກຄົນ​ໃດ.

ກຸ່ມ​ບໍລິສັດ​ ດອກ​ງີ້ວ​ຄຳ ຈຳກັດ ໄດ້​ດຳເນີນ​ການເຄື່ອນໄຫວ​ລົງທຶນ​ພັດທະນາ ພາຍ​ໃຕ້​ລະບຽບ​ກົດໝາຍ ແລະ ສັນຍາ​ຢ່າງ​ເຂັ້ມ​ງວດ ບໍ່​ມີ​ເຫດຜົນ ແລະ ແຮງ​ຈູງ​ໃຈ​ໃດໆ ຍິ່ງ​ເປັນ​ໄປ​ໄດ້​ທີ່​ຈະ​ເຄື່ອນ​ໄຫວ​ໃນ​ທາງ​ຜິດ​ກົດໝາຍ ແຕ່​ໄດ້​ຮ່ວມ​ມື​ກັບ​ລັດຖະບານ​ລາວ ເພື່ອ​ຕໍ່ຕ້ານ ແລະ ສະກັດ​ກັ້ນ​ພຶດຕິ​ກຳ​ທີ່​ຜິດ​ຕໍ່​ກົດໝາຍ​ຢ່າງ​ເຂັ້ມ​ງວດ.

ຂ່າວທີ່ກ່ຽວຂ້ອງ