ເຈົ້າໜ້າທີ່ຈັບຂະບວນການຄ້າຂາຍເຮໂຣອິນລາຍໃຫຍ່

320 08 ກ.ພ. 2018 ຂ່າວໜ້າ​ໜຶ່ງ

ຫຼັງ​ຈາກ​ເຈົ້າ​ໜ້າ​ຕຳຫຼວດ​ສືບ​ຮູ້​ວ່າ ຈະ​ມີ​ການ​ນັດ​ຊື້-ຂາຍ​ຢາ​ເສບ​ຕິດ​ຢູ່​ເຂດ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໃນ​ວັນ​ທີ 30 ມັງກອນ 2018 ກົມ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ກຳລັງ​ເຈົ້າ​ໜ້າທີ່​ວິຊາ​ສະເພາະ ເຂົ້າ​ປິດ​ລ້ອມ​ຈັບ​ເປົ້າ​ໝາຍ​ຄ້າຂາຍ​ຢາ​ເສບ​ຕິດ ຜ່ານ​ການ​ປະຕິບັດແກ້​ໄຂ​ລາຍ​ຄະດີ​ດັ່ງກ່າວ ສາມາດ​ຈັບ​ຜູ້​ຖືກ​ຫາ​ໄດ້ 3 ຄົນ ພ້ອມ​ຂອງ​ກາງ​ເຮ​ໂຣ​ອິນ 26 ແທ່ງ ນ້ຳໜັກ 10 ກິ​ໂລ ລົດ​ໃຫຍ່ 1 ຄັນ ໄປ​ສອບສວນ​ຂະຫຍາຍ​ຜົນ.

ເຈົ້າ​ໜ້າທີ່ ​ປກສ ໃຫ້​ຮູ້​ວ່າ: ຜູ້​ຖືກ​ຫາ 3 ຄົນ ຊື່​ທ້າວ ຫຼິ​ເຈຍ​ໝີງ ຫຼື ອາ​ມີງ ອາຍຸ 24 ປີ ຢູ່​ບ້ານ​ລາ​ຊີວ ເມືອງ​ລາ​ຊີວ ແຂວງ​ລາ​ຊີວ ທ້າວ ໄຊ​ສາມ​ຕິບ ອາຍຸ 29 ປີ ຢູ່​ບ້ານ​ຈຽງ​ຕຸງ ເມືອງ​ຈຽງ​ຕຸງ ແຂວງ​ຈຽງ​ຕຸງ ປະເທດ​ມຽນ​ມາ ແລະ ທ້າວ ໄຊ ກູ່​ເລົາ ອາຍຸ 43 ປີ ຢູ່​ບ້ານ​ກາງ​ໃໝ່ ເມືອງ​ສິງ ແຂວງ​ຫຼວງ​ນ້ຳ​ທາ.

ຜ່ານ​ການ​ສືບສວນ-ສອບ​ສວນຂອງ​ເຈົ້າ​ໜ້າທີ່​ໃນ​ເບື້ອງ​ຕົ້ນ ພວກ​ກ່ຽວ​ສາລະພາບ​ວ່າ: ຢາ​ເຮໂຣ​ອິນ​ຈຳນວນ​ດັ່ງກ່າວ​ແມ່ນ​ຂອງພວກ​ກ່ຽວ​ແທ້ ເຊິ່ງ​ໄດ້​ຊື້​ມາ​ເພື່ອຈະ​ເອົາ​ມາ​ຂາຍ​ໃຫ້​ຜູ້​ສັ່ງ​ຊື້​ໂດຍນັດຊື້-ຂາຍ ໃຫ້​ກັນ​ຢູ່​ເຂດ​ຕະຫຼາດ​ຊັງ​ຈຽງ ແຕ່​ບໍ່​ທັນ​ໄດ້​ຂາຍ ຖືກ​ເຈົ້າ​ໜ້າທີ່​ຈັບ​ຕົວ​ພ້ອມ​ຂອງກາງ​ຈຳນວນ​ດັ່ງກ່າວ ປັດຈຸບັນ ຄະດີ​ນີ້ຍັງ​ຢູ່​ໃນ​ຂັ້ນ​ຕອນ​ການສອບ​ສວນ​ຂະຫຍາຍ​ຜົນ​ຫາ​ພັກ ພວກ​ຜູ້​ທີ່​ເປັນ​ເຄືອ​ຄ່າຍ​ກຸ່ມ​ແກ້ງ ແລະ ຜູ້​ເປັນ​ຫົວ​ໂປ່​ໂຕ​ການ ເພື່ອຕິດຕາມ​ຈັບ​ຕົວ​ໄປ​ດຳເນີນ​ຄະດີຕາມ​ກົດໝາຍ.

ຂ່າວທີ່ກ່ຽວຂ້ອງ