ສະກັດກວດກາລົດວີໂກ້ ພົບຢາບ້າ 36 ພັນເມັດ

184 09 ກ.ພ. 2018 ຂ່າວໜ້າ​ໜຶ່ງ

ເຈົ້າ​ໜ້າທີ່​ໜ່ວຍ​ງານ​ຕຳຫຼວດສະກັດ​ກັ້ນ ແລະ ຕ້ານ​ຢາ​ເສບ​ຕິດ ເມືອງ​ຮ້ຽມ ແຂວງ​ຫົວພັນ ໄດ້ຈັດ​ກຳລັງ​ຕັ້ງ​ດ່ານ​ສະກັດ​ກວດກາລົດ​ກະບະ​ວີ​ໂກ້​ສີ​ປອນ ໝາຍເລກ​ທະບຽນ ​ກດ 4800 ກຳແພງ​ນະຄອນ ຢູ່​ສາຍ​ກວດ​ເຂດບ້ານ​ດອນ​ຄູນ ເມືອງ​ຮ້ຽມ ພົບເຫັນ​ຢາ​ບ້າ ຈຳນວນ 36.000 ເມັດ ສາມາດ​ກັກ​ຕົວ​ຜູ້​ຖືກ​ຫາ​ໄດ້ 2 ຄົນ ໃນ​ວັນ​ທີ 10 ມັງກອນ 2018 ເພື່ອ​ໄປ​ສອບ​ສວນ​ຂະຫຍາຍ​ຜົນ.

ເຈົ້າ​ໜ້າທີ່​ເມືອງ​ຮ້ຽມ ໃຫ້​ຮູ້ວ່າ: ໃນ​ວັນ​ທີ 10 ມັງກອນ 2018 ໄດ້​ຮັບ​ລາຍ​ງານຈາກ​ພົນ​ລະເມືອງ​ດີ​ວ່າມີ​ກຸ່ມ​ຄົນ​ບໍ່​ດີ​ຈຳນວນ​ໜຶ່ງ ຈະ​ມີ​ການ​ຂົນສົ່ງ​ຢາເສບ​ຕິດ​ຜ່ານ​ເສັ້ນທາງ​ເຂດ​ເມືອງຮ້ຽມ ໄປແຂວງ​ຫົວພັນ ໂດຍພວກ​ເຂົາ​ນຳ​ໃຊ້​ລົດ​ກະບະ​ວີ​ໂກ້ສີ​ປອນ ໝາຍ​ເລກ​ທະບຽນ ​ກດ 4800 ກຳແພງ​ນະຄອນ ຈາກນັ້ນ ຈຶ່ງ​ໄດ້​ກຳລັງ​ວິຊາ​ສະເພາະລົງ​ຕິດຕາມ​ຢູ່​ເຂດ​ບ້ານ​ດອນ​ຄູນ ເມືອງ​ຮ້ຽມ ຜ່ານ​ການ​ຕິດຕາມກວດກາ​ໄລຍະ​ໜຶ່ງ ​ຈຶ່ງ​ພົບ​ເຫັນລົດ​ກະບະ​ເປົ້າ​ໝາຍ​ແລ່ນ​ດ້ວຍຄວາມ​ໄວ ຈຶ່ງ​ໄດ້​ສະກັດກວດ​ຄົ້ນພົບ​ເຫັນ​ຢາ​ບ້າ ຈຳນວນ 6 ແພັກ ເທົ່າ​ກັບ 36.000 ເມັດ ເງິນ​ກີບ 1.000.000 ກີບ ເງິນ​ໂດ​ລາ 103 ໂດ​ລາ ເງິນ​ບາດ 120 ບາດ ແລະ ໂທລະສັບ 3 ໜ່ວຍ ຈຶ່ງ​ໄດ້​ກັກ​ຕົວຜູ້​ຂັບ​ຂີ່​ລົດ​ຄັນ​ດັ່ງກ່າວ 2 ຄົນ ຊື່ທ້າວ ຈັນ​ມະນີ ອາຍຸ 28 ປີ ຢູ່ບ້ານ​ພູ​ຂຽວ ເມືອງ​ໄຊ ແຂວງ​ອຸດົມ​ໄຊ ແລະ ທ້າວ ຊົງ ຈ່າ​ວາ ອາຍຸ 32 ປີ ຢູ່​ບ້ານ​ຫ້ວຍ​ແຊວ ເມືອງ​ວຽງ​ຄຳ ແຂວງ​ຫຼວງ​ພະບາງ.

ຜ່ານ​ການ​ສອບ​ສວນ ພວກກ່ຽວ​ຮັບ​ສາລະພາບວ່າ: ຢາ​ບ້າຈຳນວນ​ດັ່ງກ່າວ​ແມ່ນ​ຂອງ​ຕົນແທ້ ເຊິ່ງ​ພວກ​ກ່ຽວ​ໄດ້​ຊື້​ຢາ​ບ້ານຳ​ຜູ້​ຮ່ວມ​ຂະ​ບວນ​ການ ຢູ່​ແຂວງຫຼວງ​ພະ​ບາງ ເພື່ອ​ຈະ​ນຳໄປ​ສົ່ງໃຫ້​ຜູ້​ສັ່ງ​ຊື້ ຢູ່​ແຂວງ​ຫົວພັນ ແຕ່ຖືກ​ເຈົ້າ​ໜ້າທີ່​ກັກ​ຕົວ​ກ່ອນ ປັດ​ຈຸບັນ​ຄະດີ​ລາຍ​ນີ້​ຍັງ​ຢູ່​ໃນ​ຂັ້ນ​ຕອນການ​ສືບສວນ-ສອບ​ສວນ ຂະຫຍາຍ​ຜົນ​ຫາ​ຜູ້​ຮ່ວມ​ຂະ​ບວນການ ແລະ ສະຫຼຸບ​ສຳນວນ​ຄະດີສົ່ງ​ໄອ​ຍະ​ການ​ສັ່ງ​ຟ້ອງ​ສານ​ດຳເນີນ​ຄະດີ ຕາມ​ຂັ້ນ​ຕອນ​ຂອງກົດໝາຍ.

ຂ່າວທີ່ກ່ຽວຂ້ອງ