ລາວ-ໄທ ຮ່ວມມືຍົກລະດັບວິຊາການ ອາຍຸລະສາດ

159 09 ກ.ພ. 2018 ຂ່າວໜ້າ​ໜຶ່ງ

ສະມາຄົມ​ແພດ​ພາຍ​ໃນ​ລາວ ຮ່ວມ​ກັບ​ຣາດ​ວິທະຍາໄລ​ອາຍຸລະ​ແພດ​ແຫ່ງ​ປະເທດ​ໄທ ໄດ້​ຈັດກອງ​ປະຊຸມ​ວິຊາ​ອາຍຸ​ລະ​ສາດຮ່ວມ ລາວ-ໄທ ຄັ້ງ​ທີ 4 ແລະ ກອງ​ປະຊຸມ​ທົບ​ທວນ​ວິຊາ​ການ ອາຍຸ​ລະ​ສາດ ຄັ້ງ​ທີ 15 ຂຶ້ນ​ວັນ​ທີ 8-9 ກຸມພາ 2018 ທີ່​ໂຮງແຮມຄຣາວ​ພລາ​ຊາ ນະຄອນຫຼວງວຽງ​ຈັນ ເປັນ​ປະທານ​ຮ່ວມ​ຂອງທ່ານ ບົວ​ຈັນ ຣາຊ​ຈັກ ປະທານສະມາຄົມ​ແພດ​ພາຍ​ໃນ​ລາວ ແລະ ທ່ານ ອາ​ມອນ ລີລາ​ລັດ​ສະໝີ ປະທານ​ຣາດ​ວິທະຍາໄລ​ອາຍຸ​ລະ​ແພດ ແຫ່ງ​ປະເທດ​ໄທ ມີ​ບັນດາ​ແພດ​ໂຮງໝໍ​ແຫ່ງ​ຕ່າງໆ​ທົ່ວປະເທດ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ເປັນ​ການ​ສືບຕໍ່​ຮ່ວມ​ມື​ທາງ​ດ້ານ​ວິຊາ​ການ ເພື່ອ​ຍົກ​ລະດັບ​ຄວາມ​ຮູ້​ຄວາມສາມາດ​ໃຫ້​ບັນດາ​ແພດ​ໝໍ​ ໃນຂອບ​ເຂດ​ທົ່ວ​ປະເທດ ກ່ຽວ​ກັບການບົ່ງມະຕິ​ການ​ປິ່ນປົວ ແລະ ການ​ປ້ອງ​ກັນ​ພະຍາດ​ພາຍ​ໃນ ທັງ​ເປັນ​ການ​ຮ່ວມ​ມື​ແລກປ່ຽນບົດຮຽນ​ເຊິ່ງ​ກັນ ແລະ ກັນ ກ່ຽວກັບ​ພະຍາດ​ໃນ​ຂົງເຂດ​ພາກ​ພື້ນ ໃນ​ການຈັດຕັ້ງ​ປະຕິບັດ​ຕົວ​ຈິງ ພ້ອມ​ທັງ​ປຶກສາ​ຫາລື​ສອງ​ຝ່າຍ ເພື່ອ​ຮ່ວມ​ມື​ຊ່ວຍເຫຼືອ​ທາງ​ດ້ານວິຊາ​ການ​ໃນ​ການ​ເຝິກອົບຮົມຂອງ​ໜ່ວຍ​ວິຊາ​ຕ່າງໆ ນອກ​ນີ້ ວິທະຍາກອນ​ຍັງ​ໄດ້​ນຳ​ເອົາຄວາມ​ຮູ້​ໃໝ່ໆ​ໃນ 19 ຫົວຂໍ້​ມາສະເໜີ​ໃຫ້​ສຳ​ມະ​ນາ​ກອນ​ໄດ້​ຟັງ ແລະ ຮັບ​ຮູ້ ເພື່ອ​ເຮັດ​ໃຫ້ການ​ເບິ່ງແຍງ​ຮັກສາ​ສຸຂະພາບ​ຂອງ​ປະຊາ​ຊົນ​ບັນດາເຜົ່າ ​ໃຫ້​ນັບ​ມື້​ນັບ​ດີຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ