ເພີ່ມທະວີປ້ອງກັນອັກຄີໄພໄລຍະບຸນປີໃໝ່ ຊາວຈີນ-ຫວຽດນາມ

205 12 ກ.ພ. 2018 ຂ່າວໜ້າ​ໜຶ່ງ

ປັດຈຸບັນ ສະພາບ​ອາກາດ​ຢູ່ໃນ​ໄລຍະ​ແຫ້ງແລ້ງ ເຊິ່ງ​ເປັນເງື່ອນໄຂ​ເຮັດ​ໃຫ້​ເກີດ​ອັກຄີ​ໄພ​ໄດ້ງ່າຍ ແລະ ອີກ​ບໍ່​ເທົ່າໃດ​ວັນ​ຂ້າງໜ້າ ກໍ່​ເປັນ​ໄລຍະ​ເທ​ສະການ​ສະຫຼອງ​ບຸນປີໃໝ່​ຂອງ​ພີ່ນ້ອງ​ຊາວຈີນ ແລະ ຫວຽດນາມ ສະນັ້ນ ເພື່ອ​ສະກັດ​ກັ້ນ​ບັນຫາ​ອັກຄີ​ໄພ ພະ​ແນກ​ຕຳຫຼວດ​ປ້ອງ​ກັນ ແລະ ສະກັດ​ກັ້ນ​ອັກຄີ​ໄພ ນະຄອນຫຼວງວຽງ​ຈັນ ໄດ້​ແຈ້ງ​ການ​ໃຫ້​ເພີ່ມທະວີ​ປ້ອງ​ກັນ ຄື: ສຳລັບ​ເຮືອນ​ຢູ່ອາໄສ ​ໃຫ້​ຕິດ​ຕັ້ງ​ລະບົບ​ໄຟຟ້າ​ຖືກຕາມ​ຫຼັກການ​ເຕັກນິກ ຖ້າ​ຫາກເຫັນ​ວ່າອຸປະກອນ​ໄຟຟ້າ​ໃຊ້​ງານມາ​ດົນ​ແລ້ວ ຕ້ອງ​ປ່ຽນ​ຖ່າຍ​ໃຫ້​ໄດ້ມາດຕະຖານ ພ້ອມ​ນັ້ນ ກໍ່​ໃຫ້​ກະກຽມ​ພາຫະນະ​ອຸປະກອນ ແລະ ເງື່ອນໄຂ​ຕ່າງໆ ເພື່ອ​ກຽມພ້ອມສະກັດ​ກັ້ນ​ອັກຄີ​ໄພ.

ສຳລັບ​ບ້ານ ແລະ ເຂດ​ຊຸມຊົນ​ ຕ້ອງ​ຈັດ​ຕັ້ງ​ໜ່ວຍ​ອາສາ​ສະໝັກ​ປ້ອງ​ກັນ​ອັກຄີ​ໄພ​ຂອງ​ຕົນ​ຂຶ້ນ ປະມານ 10 ຄົນ ໂດຍ​ໃຫ້​ໝູນວຽນ​ກັນ​ປະຈຳການ ແລະ ໃຫ້​ພະນັກ​ງານ​ເຫຼົ່ານັ້ນ​ໄປ​ຮັບ​ການ​ເຝິກອົບຮົມ​ຈາກ​ເຈົ້າ​ໜ້າທີ່​ພະ​ແນກຕຳຫຼວດ​ປ້ອງ​ກັນ ແລະ ສະກັດກັ້ນ​ອັກຄີ​ໄພ ນະຄອນຫຼວງ​ວຽງຈັນ ຫ້າມ​ບໍ່​ໃຫ້​ຈູດ​ຂີ້​ເຫຍື້ອ​ຕາມເຮືອນ ແຄມ​ທາງ​ ສວນ​ຄົວ ຫຼື ວັດຖຸ​ທີ່​ເປັນ​ທາດ​ລະເບີດ ທາດ​ໄຟ ຖ້າ​ມີ​ກໍລະນີ​ດັ່ງກ່າວ​ນີ້ຢູ່​ໃສ​ໃຫ້ຄົວ​ເຮືອນ​ທີ່ຢູ່​ໃກ້​ຄຽງ ແລະ ບ້ານຕ້ອງ​ເປັນ​ເຈົ້າ​ການ​ຮັບຜິດຊອບແກ້​ໄຂ​ໃຫ້​ທັນ​ການ ​ໃຫ້​ທຸກ​ພາກສ່ວນ​ທີ່​ອາໄສ​ຢູ່​ໃນ​ອາຄານ​ສູງ ເຮືອນ​ໃຫຍ່ ຄຸ້ມ​ບ້ານ ເຂດ​ຊຸມ​ຊົນ ຫຼື ຫົວໜ່ວຍ​ຫຼັງຄາ​ເຮືອນ ​ໃຫ້​ຈັດຫາ ແລະ ກໍ່ສ້າງ​ອ່າງເກັບນ້ຳ​ໄວ້ໃຕ້​ດິນ 10-20 ພັນ​ແມັດ​ກ້ອນ ໄວ້ຮອງ​ຮັບ​ອັກຄີ​ໄພ​ກັບ​ທີ່ ແລະ ໃຫ້​ຖືເປັນ​ມາດຖານ​ໃໝ່​ໃນ​ການ​ປຸກສ້າງ​ຕຶກ​ອາຄານ​ສຳນັກງານຕ່າງໆ​ໃນ​ນະຄອນຫຼວງ.

ການ​ໃຕ້​ທູບ​ທຽນ​ບູຊາ ຕ້ອງຮັບປະກັນ​ຄວາມ​ປອດ​ໄພ ຮ້ານ​ບູຊາ​ຕ້ອງ​ເຮັດ​ດ້ວຍ​ວັດຖຸ​ທີ່​ບໍ່​ໄວ​ໄຟ ຫ່າງ​ໄກ​ຈາກ​ບ່ອນ​ທີ່​ມີ​ເຊື້ອ​ໄຟ​ທຸກຄັ້ງ​ທີ່​ມີ​ການ​ບູຊາ ຕ້ອງ​ເອົາໃຈໃສ່​ຕິດຕາມ​ຈົນ​ໄຟ​ມອດ​ລະອຽດແລ້ວ​ຈຶ່ງ​ອອກ​ໄປ​ທາງ​ອື່ນ ແລະ ຫ້າມ​ເອົາ​ນ້ຳມັນ​ເຊື້ອ​ໄຟ​ມາ​ໄວ້​ໃນເຮືອນ ຫຼື ຕັ້ງ​ຂາຍ​ແຄມ​ທາງ ແລະ ນຳ​ມາ​ເກັບ​ໄວ້​ຢູ່​ສຳນັກງານ ອົງການ ໂຮງແຮມ ເຮືອນ​ພັກ ຕະຫຼາດ ຫ້າງ​ຮ້ານ​ຕ່າງໆ ກໍລະນີ​ທີ່ເຈົ້າ​ໜ້າທີ່​ກວດ​ພົບ​ເຫັນ​ຈະ​ໄດ້ຢຶດ ແລະ ປັບ​ໃໝ​ພ້ອມ​ທັງ​ດຳເນີນ​ຄະດີ​ຕາມ​ລະບຽບ​ກົດໝາຍ.

ຂ່າວທີ່ກ່ຽວຂ້ອງ