ຍີ່ປຸ່ນ ໃຫ້ການຊ່ວຍເຫຼືອປັບປຸງໂຮງໝໍ 2 ແຫ່ງ

260 12 ກ.ພ. 2018 ຂ່າວໜ້າ​ໜຶ່ງ
ຍີ່ປຸ່ນ ໃຫ້ການຊ່ວຍເຫຼືອປັບປຸງໂຮງໝໍ 2 ແຫ່ງ

ພິທີ​ເຊັນ​ສັນຍາ​ຊ່ວຍເຫຼືອ​ລ້າ ໂຄງການ​ປັບປຸງ​ໂຮງໝໍ​ເຊດ​ຖາ​ທິຣາດ ແລະ ໂຮງໝໍ​ແຂວງ​ຈຳປາສັກ ມູນ​ຄ່າ 1.940 ລ້ານ​ເຢັນ ຫຼື ປະມານ 17.700.000 ໂດ​ລາ​ສະຫະ​ລັດ ຈັດ​ຂຶ້ນ​ວັນ​ທີ 9 ກຸມພາ 2018 ທີ່​ສຳນັກງານ​ນາຍົກ​ລັດຖະ​ມົນຕີ ຮ່ວມ​ລົງ​ນາມ​ລະຫວ່າງທ່ານ ທາ​ເຄ​ຊິ ຮິ​ຄິ​ຮາ​ຣະ ເອກອັກ​ຄະ​ຣາ​ຊະ​ທູດ​ຍີ່ປຸ່ນ​ປະຈຳ​ລາວ ແລະ ທ່ານ​ນາງ ຄຳ​ເພົາ ເອີນທະ​ວັນ ຮອງ​ລັດຖະມົນຕີ​ກະຊວງການ​ຕ່າງປະເທດ ມີ​ທ່ານ ອາ​ລຸນ ແກ້ວກິດ​ຕິ​ຄຸນ ລັດຖະມົນຕີ​ປະຈຳ​ສຳນັກງານ​ນາຍົກ​ລັດ​ຖະ​ມົນຕີ ທ່ານ ເຄັນ​ທາ​ໂຣ ໂຊ​ໂນ​ອຸ​ຣະ ທີ່​ປຶກສາ​ພິເສດ​ຂອງ​ທ່ານ​ນາຍົກລັດຖະມົນຕີ​ຍີ່ປຸ່ນ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ໂຮງໝໍ​ເຊດ​ຖາ​ທິ​ຣາດ​ເຊິ່ງ​ເປັນ 1 ໃນ 5 ໂຮງໝໍ​ໃຫຍ່​ຢູ່​ໃນ​ນະຄອນຫຼວງ​ວຽງ​ຈັນ ແລະ ໄດ້​ຮັບ​ການສ້າງຕັ້ງ​ຂຶ້ນ​ໂດຍ​ການ​ຊ່ວຍເຫຼືອລ້າ​ຈາກ​ປະເທດ​ຍີ່ປຸ່ນ ​ໃນ​ປີ 2000 ແລະ ແມ່ນ​ໜຶ່ງ​ໃນ​ໂຮງໝໍ​ທີ່​ຕົກຢູ່​ໃນ​ກຸ່ມ​ເປົ້າ​ໝາຍ​ຂອງ​ໂຄງການດັ່ງກ່າວ​ໃນ​ປີ​ທີ່​ຜ່ານ​ມາ ສິ່ງ​ອຳນວຍ​ຄວາມ​ສະດວກ​ຕ່າງໆ​ແມ່ນມີ​ສະພາບ​ທີ່​ຊຸດໂຊມ ເນື່ອງ​ຈາກວ່າ​ຜ່ານ​ການ​ໃຊ້​ງານ​ມາ​ເປັນ​ເວລາ​ດົນ​ນານ ພ້ອມ​ດຽວ​ກັນ​ນັ້ນ ຜູ້​ເຈັບເປັນ​ກໍ່​ມີ​ຈຳນວນ​ເພີ່ມ​ຫຼາຍຂຶ້ນ​ ພາ​ໃຫ້ການ​ວິ​ນິໄສ ແລະ ການຮັກສາ​ປະສົບ​ຄວາມ​ຫຍຸ້ງຍາກ ສ່ວນ​ໂຮງໝໍ​ແຂວງ​ຈຳປາ​ສັກ ແມ່ນ​ຕັ້ງ​ຢູ່​ໃນ​ເມືອງ​ປາກ​ເຊ ແລະ ໄດ້​ຮັບ​ການ​ບໍລິການ​ດ້ານ​ການແພດ​ທຽບ​ເທົ່າ​ກັບ​ລະດັບ​ໂຮງໝໍໃຫຍ່ ເຄື່ອງມື​ທັນ​ສະໄໝ​ແມ່ນ​ມີຄວາມ​ຈຳເປັນ​ຮັບ​ມື​ຈຳນວນ​ເຫດສຸກ​ເສີນ ແລະ ການຜ່າຕັດ​ທີ່ເພີ່ມ​ຂຶ້ນ ຄາດ​ວ່າ​ໂຄງການ​ນີ້​ຈະສາມາດ​ຊ່ວຍເຫຼືອ​ລັດຖະບານລາວ​ ຍົກ​ລະດັບ​ການ​ບໍລິການດ້ານ​ການ​ແພດ​ໃຫ້​ດີ​ຂຶ້ນ.

ເປັນ​ເວລາ​ຫຼາຍ​ປີ​ແລ້ວ​ທີ່​ລັດຖະ​ບານ​ຍີ່ປຸ່ນ ​ໄດ້​ຍົກ​ສູງ​ວາລະຂອງ​ສາທາລະນະ​ສຸກ​ສາກົນ ໂດຍ​ອີງໃສ່​ຄວາມ​ປອດ​ໄພ​ຂອງ​ຊີວິດ​ມະນຸດ ໂດຍ​ສະເພາະ ການບັນລຸ​ການ​ປະກັນ​ສຸຂະພາບ​ທຸກທົ່ວ​ໜ້າ (UHC) ແມ່ນ​ປັດ​ໄຈໜຶ່ງ​ທີ່​ສຳຄັນ ເພື່ອ​ຈະ​ເຮັດ​ໃຫ້ມະນຸດ​ທຸກ​ຄົນ​ໃນ​ສັງຄົມ​ບໍ່​ຖິ້ມ​ກັນ ແລະ ກັນ ໃຫ້​ປາກົດ​ຜົນ​ເປັນ​ຈິງ ເຊິ່ງ​ເປັນ​ແກນ​ສຳຄັນ​ຂອງ​ເປົ້າໝາຍ​ການ​ພັດທະນາ​ຢ່າງ​ຍືນ​ຍົງ (SDGs) ໂດຍ​ຜ່ານ​ການຈັດຕັ້ງປະຕິບັດ​ໂຄງການ​ນີ້ ປະເທດຍີ່ປຸ່ນ ໄດ້​ສະໜັບສະໜູນ​ຄວາມພະຍາຍາມ​ຂອງ​ປະເທດ​ລາວ ​ໃນການ​ບັນລຸ​ການ​ປະກັນ​ສຸຂະພາບທຸກ​ທົ່ວ​ໜ້າ.

ພ້ອມ​ນີ້ ໃນ​ວັນ​ດຽວ​ກັນ ທ່ານ ເຄັນ​ທາ​ໂຣ ໂຊ​ໂນ​ອຸ​ຣະ ທີ່​ປຶກສາພິເສດ​ຂອງ​ທ່ານ​ນາຍົກ​ລັດ​ຖະມົນຕີ​ຍີ່ປຸ່ນ ແລະ ຄະນະ​ ຍັງ​ໄດ້ເຂົ້າ​ຢ້ຽມ​ຄຳນັບ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ທີ່​ສຳນັກ​ງານ​ນາຍົກລັດຖະມົນຕີ ແລະ ທ່ານພົນ​ໂທ ຈັນ​ສະໝອນ ຈັນຍາ​ລາດ ລັດຖະມົນຕີ​ກະຊວງປ້ອງ​ກັນ​ປະເທດ ທີ່​ກະຊວງ​ປ້ອງກັນ​ປະເທດ​ອີກ​ດ້ວຍ.

ຂ່າວທີ່ກ່ຽວຂ້ອງ