ລັດຖະບານ ພິຈາລະນາຮັບຮອງເອົາຮ່າງກົດໝາຍ 10 ສະບັບ

408 12 ກ.ພ. 2018 ຂ່າວໜ້າ​ໜຶ່ງ
ລັດຖະບານ ພິຈາລະນາຮັບຮອງເອົາຮ່າງກົດໝາຍ 10 ສະບັບ

ກອງ​ປະຊຸມ​ສະໄໝ​ວິສາມັນ ປະຈຳ​ເດືອນ​ກຸມພາ ​ໄດ້​ຈັດ​ຂຶ້ນ​ວັນທີ 8-9 ກຸມພາ 2018 ໂດຍ​ເປັນປະທານ​ຂອງ​ທ່ານ ທອງ​ລຸນ ສີ​ສຸລິດ ນາຍົກລັດຖະມົນຕີ ມີ​ບັນດາທ່ານ​ຮອງ​ນາຍົກລັດຖະມົນຕີ ແລະ ສະມາຊິກ​ລັດຖະບານ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າຮ່ວມ.

ກອງ​ປະຊຸມ​ຄັ້ງ​ນີ້​ ໄດ້​ພ້ອມ​ກັນສຸມ​ໃສ່​ປຶກສາ​ຫາລື ປະກອບ​ຄຳຄິດ​ຄຳ​ເຫັນ ແລະ ພິຈາລະນາຮັບຮອງ​ເອົາ​ການ​ສ້າງ ແລະ ປັບປຸງ​ບັນດາ​ຮ່າງ​ກົດໝາຍ​ຈຳນວນ 10 ສະບັບ ຄື: ຮ່າງ​ກົດໝາຍ​ວ່າດ້ວຍ​ການ​ຄຸ້ມ​ຄອງ​ໜີ້​ສິນ​ສາ​ທາລະນະ (ສະບັບ​ສ້າງ​ໃໝ່) ກົດໝາຍວ່າ​ດ້ວຍ​ອາກອນ​ມູນ​ຄ່າເພີ່ມ (ສະບັບ​ປັບປຸງ) ກົດໝາຍວ່າ​ດ້ວຍ​ທະນາຄານ​ແຫ່ງ ​ສປປ ລາວ (ສະບັບ​ປັບປຸງ) ກົດໝາຍວ່າ​ດ້ວຍ​ການ​ແກ້​ໄຂ​ຂໍ້​ຂັດ​ແຍ່ງທາງ​ດ້ານ​ເສດຖະກິດ (ສະບັບປັບປຸງ) ກົດໝາຍ​ວ່າ​ດ້ວຍ​ປະກັນສັງຄົມ (ສະບັບ​ປັບປຸງ) ກົດໝາຍວ່າ​ດ້ວຍ​ປ້າຍ (ສະບັບ​ສ້າງ​ໃໝ່) ກົດໝາຍວ່າ​ດ້ວຍ​ນາຍ​ທະຫານ ກອງທັບ​ປະຊາຊົນ​ລາວ (ສະບັບປັບປຸງ) ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ (ສະບັບ​ປັບປຸງ) ກົດໝາຍ​ວ່າ​ດ້ວຍ​ແນວ​ລາວ​ສ້າງຊາດ (ສະບັບ​ປັບປຸງ) ແລະ ຮ່າງກົດໝາຍ​ວ່າ​ດ້ວຍ​ສະຫະພັນ​ນັກຮົບ​ເກົ່າ (ສະບັບ​ສ້າງ​ໃໝ່).

ຕໍ່​ກັບ​ບັນດາ​ຮ່າງ​ກົດໝາຍ​ດັ່ງກ່າວ ​ກອງ​ປະຊຸມ​ໄດ້​ປະກອບ​ຄຳຄິດ​ຄຳ​ເຫັນ​ຢ່າງ​ເລິກເຊິ່ງ ແລະ ຊີ້​ນຳ​ໃຫ້​ບັນດາ​ກະຊວງ​ທີ່​ກ່ຽວຂ້ອງ​ນຳໄປ​ປັບປຸງ​ຕື່ມ ຕາມ​ການປະກອບ​ຄຳ​ເຫັນ​ຂອງ​ສະມາຊິກລັດຖະບານ ເປັນຕົ້ນ ເອົາໃຈໃສ່ປັບປຸງ​ເນື້ອ​ໃນ​ບັນດາ​ຄຳ​ສັບ ສຳນວນ​ທີ່​ກຳນົດ​ໃນ​ບາງ​ໝວດ-ບາງ​ມາດຕາ ຊື່​ຂອງ​ກົດໝາຍ ແລະ ອື່ນໆ ເພື່ອ​ເຮັດ​ໃຫ້​ບັນດາຮ່າງ​ກົດໝາຍ​ດັ່ງກ່າວ​ມີ​ເນື້ອ​ໃນເລິກເຊິ່ງ ຄົບ​ຖ້ວນ ຊັດ​ເຈນ ຈະແຈ້ງ ຮັດກຸມ ແລະ ສອດຄ່ອງກັບ​ສະພາບ​ການ​ຕົວ​ຈິງ ກ່ອນ​ຈະນຳ​ສະເໜີ​ສະພາ​ແຫ່ງ​ຊາດ​ພິ​ຈາລະ​ນາ​ຮັບຮອງ​ເອົາ ໃນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງສະພາ​ແຫ່ງ​ຊາດ ຊຸດ​ທີ VIII ໃນເດືອນ​ເມສາ 2018 ທີ່​ຈະ​ເຖິງ​ນີ້.

ຕອນ​ທ້າຍ​ກອງ​ປະຊຸມ ​ທ່ານນາຍົກລັດຖະມົນຕີ ​ໄດ້​ຊີ້​ນຳ​ໃຫ້​ສະມາ​ຊິກ​ລັດຖະບານ ຕ້ອງ​ເພີ່ມ​ທະວີຄວາມ​ຮັບຜິດຊອບ​ໜ້າທີ່​ຂອງ​ຕົນ ແລະ ລວມ​ໝູ່ ພ້ອມ​ທັງ​ຮຽກຮ້ອງໃຫ້​ສະມາຊິກ​ພັກ ພະນັກງານ-ລັດຖະກອນ ທະຫານ ຕຳຫຼວດ ນັກຮຽນ ນັກ​ສຶກ​ສາ ກຳມະກອນ ນັກທຸລະກິດ​ທັງ​ພາກ​ລັດ ແລະ ເອກະ​ຊົນ ບັນດາ​ຊັ້ນ​ຄົນ ແລະ ປະຊາຊົນ​ລາວ​ບັນດາເຜົ່າ ​ຈົ່ງ​ຍົກສູງ​ນ້ຳໃຈ​ເປັນ​ເຈົ້າ​ປະເທດ​ຊາດ ຕັ້ງໜ້າ​ປະຕິບັດ​ສິດ ແລະ ພັນທະຂອງ​ຕົນ​ໃຫ້​ຄົບ​ຖ້ວນ​ຕາມ​ທີ່​ໄດ້​ກຳນົດ​ໄວ້​ໃນ​ລັດ​ຖະ​ທຳ​ມະນູນ ແລະ ກົດໝາຍ ເພີ່ມ​ທະວີ​ຄວາມ​ສາມັກ​ຄີ​ເປັນ​ປຶກ​ແຜ່ນ​ໃນ​ທົ່ວ​ວົງສາຄະນາ​ຍາດ​ແຫ່ງ​ຊາດ ຕັ້ງໜ້າ​ປະຕິ​ບັດ​ໜ້າທີ່​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ຕາມ​ແນວທາງ​ປ່ຽນແປງ​ໃໝ່ຮອບດ້ານ​ທີ່​ມີ​ຫຼັກການ​ຂອງ​ພັກ.

ຂ່າວທີ່ກ່ຽວຂ້ອງ