ປະທານປະເທດ ຕ້ອນຮັບທູດປະເທດເພື່ອນມິດ ເຂົ້າຍື່ນສານຕາຕັ້ງ

432 12 ກ.ພ. 2018 ຂ່າວໜ້າ​ໜຶ່ງ
ປະທານປະເທດ ຕ້ອນຮັບທູດປະເທດເພື່ອນມິດ ເຂົ້າຍື່ນສານຕາຕັ້ງ

ວັນ​ທີ 9 ກຸມພາ 2018 ຢູ່​ທີ່ທຳ​ນຽບ​ປະທານ​ປະເທດ ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ​ສປປ ລາວ ໄດ້​ໃຫ້​ກຽດຕ້ອນຮັບ ບັນດາ​ທູຕານຸທູດ​ປະເທດ​ເພື່ອນ​ມິດ​ເຂົ້າ​ຍື່ນ​ສານ​ຕາຕັ້ງ ເພື່ອ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ​ຄົນໃໝ່ ປະຈຳ​ລາວ ລະອຽດ​ດັ່ງນີ້.

ເວລາ 9:00 ໂມງ ຕ້ອນຮັບການ​ເຂົ້າ​ຢ້ຽມ​ຄຳນັບ ແລະ ຍື່ນສານ​ຕາ​ຕັ້ງ​ຂອງ​ທ່ານ ອາ​ເມັດ ອີ​ແດັມ ອາ​ໄກ ເອກ​ອັກ​ຄະ​ລັດ​ຖະທູດ​ວິສາມັນ​ຜູ້​ມີ​ອຳນາດ​ເຕັມ ແຫ່ງ​ປະເທດ​ຕວກ​ກີ ຄົນ​ໃໝ່ ປະຈຳ​ລາວ ມີ​ສຳນັກງານ​ໃຫຍ່​ຕັ້ງຢູ່​ນະຄອນຫຼວງ​ວຽງ​ຈັນ ແລະ ມີສາຍ​ພົວພັນ​ການ​ທູດ​ຮ່ວມ​ກັນ​ແຕ່ປີ 1958 ເປັນຕົ້ນ​ມາ.

ເວລາ 9:30 ໂມງ ຕ້ອນຮັບການ​ເຂົ້າ​ຢ້ຽມ​ຄຳນັບ ແລະ ຍື່ນສານ​ຕາ​ຕັ້ງຂອງ​ທ່ານ ເຈນ ເບີນາດ ຄາ​ລາສ​ໂກ ເອກ​ອັກ​ຄະ​ລັດຖະ​ທູດ​ວິສາມັນ​ຜູ້​ມີ​ອຳນາດ​ເຕັມ ແຫ່ງປະເທດ​ອົດ​ສະ​ຕຣາ​ລີ ຄົນໃໝ່ ປະຈຳ​ລາວ ມີ​ສຳນັກງານໃຫຍ່​ຕັ້ງ​ຢູ່ນະຄອນຫຼວງ​ວຽງ​ຈັນ ແລະ ສ້າງຕັ້ງ​ສາຍ​ພົວພັນ​ການທູດ​ຮ່ວມ​ກັນ ປີ 1952.

ເວລາ​ຕໍ່​ມາ ໄດ້​ຕ້ອນຮັບ​ການເຂົ້າ​ຢ້ຽມ​ຄຳນັບ ແລະ ຍື່ນ​ສານຕາ​ຕັ້ງຂອງ​ທ່ານ ຊິນ​ຊັງ ຊຸນ ເອກ​ອັກ​ຄະ​ລັດ​ຖະ​ທູດ​ວິສາມັນຜູ້​ມີ​ອຳນາດ​ເຕັມ ແຫ່ງ ສ ເກົາຫຼີ ຄົນ​ໃໝ່ ປະຈຳ ​ສປປ ລາວ ມີ​ສຳນັກ​ງານ​ໃຫຍ່​ຕັ້ງ​ຢູ່​ນະຄອນຫຼວງວຽງ​ຈັນ ແລະ ໄດ້​ສ້າງຕັ້ງ​ສາຍພົວພັນ​ການ​ທູດ​ຮ່ວມ​ກັນ​ປີ 1995.

ຕ້ອນຮັບ​ການ​ເຂົ້າ​ຢ້ຽມ​ຄຳນັບ ແລະ ຍື່ນ​ສານ​ຕາ​ຕັ້ງ​ຂອງ​ທ່ານ ເອ​ເມ​ລິ​ໂອ ເດມີ​ເກ​ເບຍ ເອກ​ອັກຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ ແຫ່ງປະເທດ​ແອັດສະ​ປາຍ ​ຄົນ​ໃໝ່ ​ປະຈຳ​ລາວ ມີ​ສຳນັກ​ງານ​ໃຫຍ່​ຕັ້ງ​ຢູ່​ບາງກອກ ປະເທດ​ໄທ ແລະ ສ້າງຕັ້ງ​ສາຍ​ພົວພັນ​ການ​ທູດ​ຮ່ວມ​ກັນ ປີ 1964.

ຕ້ອນຮັບ​ການ​ເຂົ້າ​ຢ້ຽມ​ຄຳນັບ ແລະ ຍື່ນ​ສານ​ຕາ​ຕັ້ງຂອງ​ທ່ານນາງ ເອ​ວາ ເຮີ​ເກີ ເອກ​ອັກ​ຄະ​ລັດຖະ​ທູດ​ວິສາມັນ​ຜູ້​ມີ​ອຳນາດ​ເຕັມ ແຫ່ງ ສ.ໂອ​ຕຣິດ ຄົນ​ໃໝ່​ ປະຈຳລາວ ມີ​ສຳນັກງານ​ໃຫຍ່​ຕັ້ງ​ຢູ່ບາງກອກ​ປະເທດ​ໄທ ແລະ ມີການ​ສ້າງຕັ້ງ​ສາຍ​ພົວພັນ​ການທູດ​ຮ່ວມ​ກັນ ປີ 1967.

ພ້ອມ​ນີ້ ຕ້ອນຮັບ​ການ​ເຂົ້າຢ້ຽມ​ຄຳນັບ ແລະ ຍື່ນ​ສານ​ຕາ​ຕັ້ງຂອງທ່ານ ວາລ​ເດ​ມາ ດູ​ບາ​ນີອົບ​ສະ​ກີ ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ ແຫ່ງ ສ.ໂປ​ໂລຍ ຄົນ​ໃໝ່ ປະຈຳ​ລາວ ມີ​ສຳນັກງານ​ໃຫຍ່​ຕັ້ງ​ຢູ່​ນະຄອນຫຼວງ​ວຽງ​ຈັນ ແລະ ສ້າງຕັ້ງ​ສາຍພົວພັນ​ການ​ທູດ​ຮ່ວມ​ກັນແຕ່​ປີ 1962 ເປັນຕົ້ນ​ມາ.

ໂອກາດ​ນີ້ ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ​ສປປ ລາວ ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຕີ​ລາຄາ​ສູງ​ຕໍ່ບັນດາ​ທ່ານ​ທູດ​ປະເທດ​ເພື່ອນ​ມິດ ທີ່​ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈຈາກ​ລັດຖະບານ ແລະ ປະຊາຊົນໃຫ້​ມາ​ດຳລົງ​ຕຳແໜ່ງ​ສຳຄັນ ແລະ ມີ​ກຽດ​ຄັ້ງ​ນີ້ ຖື​ເປັນ​ຂີດໝາຍ​ສຳຄັນ​ໃນ​ການ​ເພີ່ມ​ທະວີສາຍ​ພົວພັນ​ການ​ຮ່ວມ​ມື​ທີ່​ມີ​ມາແຕ່​ດົນ​ນານ​ແລ້ວ​ນັ້ນ ໃຫ້​ນັບ​ມື້ສືບຕໍ່​ໜັກ​ແໜ້ນ ແລະ ເຂັ້ມແຂງຍິ່ງ​ຂຶ້ນ ພ້ອມ​ນີ້ ທ່ານ​ປະທານ​ປະເທດ ຍັງ​ຖື​ໂອກາດ​ແຈ້ງ​ສະພາບການ​ພັດທະນາ​ບັນດາ​ພື້ນຖານໂຄງ​ລ່າງ​ຂອງ​ລາວ ໃຫ້​ແກ່​ບັນດາ​ທ່ານ​ທູດ​ໄດ້​ຮັບ​ຊາບ ແລະ ຫວັງ​ວ່າຕະຫຼອດ​ໄລຍະ​ຂອງການ​ປະຕິບັດ​ໜ້າທີ່​ການ​ທູດ​ຢູ່ລາວ ບັນດາ​ທ່ານ​ທູດ​ຈະ​ປະກອບ​ສ່ວນ​ເສີມ​ສ້າງ​ສາຍ​ພົວພັນ ແລະ ການ​ຮ່ວມ​ມື​ທີ່​ມີ​ຢູ່​ແລ້ວ ໃຫ້ນັບ​ມື້​ຂະຫຍາຍຕົວ​ເປັນ​ກ້າວໆ ແລະ ຕໍ່​ເນື່ອງ.

ຂ່າວທີ່ກ່ຽວຂ້ອງ