ຍີ່ປຸ່ນ ມອບເຄື່ອງຖ່າຍພາບລັງສີ ໃຫ້ຄະນະທັນຕະແພດສາດ

182 13 ກ.ພ. 2018 ຂ່າວໜ້າ​ໜຶ່ງ
ຍີ່ປຸ່ນ ມອບເຄື່ອງຖ່າຍພາບລັງສີ ໃຫ້ຄະນະທັນຕະແພດສາດ

ພິທີ​ມອບ-ຮັບ​ເຄື່ອງ​ຖ່າຍ​ພາບລັງສີ (Cone Beam Computed Tomography - CBCT) ຈາກ​ໂຮງຮຽນ​ທັນ​ຕະ​ແພດສາດ ມະຫາວິທະຍາໄລ​ນີ​ຮົງ ປະເທດຍີ່ປຸ່ນ ໃຫ້​ແກ່​ຄະນະ​ທັນ​ຕະ​ແພດສາດ ມະຫາວິທະຍາໄລ​ວິທະຍາສາດ​ສຸຂະພາບ (ມວສ) ມີ​ຂຶ້ນ​ວັນທີ 10 ກຸມພາ 2018 ທີ່​ຄະນະ​ທັນຕະ​ແພດສາດ ມວສ ໂດຍ​ມີ​ທ່ານ ບຸນ​ກອງ ສີ​ຫາ​ວົງ ລັດຖະມົນຕີກະຊວງ​ສາທາລະນະ​ສຸກ ທ່ານ ຮອນ​ດາ ຄາ​ຊູ​ຢາ (Honda Kazuya) ຄະນະບໍດີ​ໂຮງຮຽນ​ທັນ​ຕະ​ແພດສາດ ມະຫາວິທະຍາໄລນີ​ຮົງ ພ້ອມ​ດ້ວຍ​ແຂກ​ຖືກ​ເຊີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ເຄື່ອງ​ຖ່າຍ​ພາບ​ລັງສີ (Cone Beam Computed Tomography (CBCT) ມີ​ມູນຄ່າ 186.413 ໂດ​ລາ​ສະຫະລັດ ປະມານ 1 ຕື້​ກວ່າ​ກີບ ເປັນ​ເຄື່ອງຖ່າຍ​ພາບ​ລັງສີ 3 ມິ​ຕິ ເຊິ່ງ​ສາມາດ​ເບິ່ງ​ສະພາບ​ຂອງ​ແຂ້ວ ກະດູກ ແລະ ອະ​ໄວ​ຍະ​ວະ​ຕ່າງໆ ຢູ່ໃນ​ຜົ້ງ​ປາກ ແລະ ບໍລິເວນຄາງກະໄຕ-ໃບ​ໜ້າ ສາມາດ​ເຫັນ​ໄດ້ທຸກ​ດ້ານ-ທຸກ​ຂ້າງ-ບໍ່​ໃຊ້​ຟິມ ມີຄວາມ​ໄວ​ສູງ ໄດ້​ຮູບ​ພາບ​ຈະແຈ້ງ​ດີ ເພື່ອ​ນຳ​ໃຊ້​ເຂົ້າ​ໃນ​ການປິ່ນປົວ​ຄົນ​ເຈັບ​ກ່ຽວ​ກັບ​ບັນຫາແຂ້ວ ແລະ ຜົ້ງ​ປາກ​ສະເພາະ.

ການ​ຮ່ວມ​ມື​ຂອງ​ໂຮງຮຽນ​ທັນຕະ​ແພດສາດ ມະຫາວິທະຍາໄລນີ​ຮົງ ປະເທດ​ຍີ່ປຸ່ນ ໃຫ້​ແກ່​ຄະນະທັນ​ຕະ​ແພດສາດ ມະຫາ​ວິທະຍາໄລ​ວິທະຍາສາດ​ສຸຂະພາບ (ມວສ) ໄດ້​ມີ​ການ​ເຊັນ​ບົດ​ບັນທຶກຢ່າງ​ເປັນ​ທາງ​ການ​ມາ​ແຕ່ 2007 ແລະ ຕໍ່​ສັນຍາ 2 ຄັ້ງ 2013 ແລະ 2015 ເຊິ່ງ​ເປັນ​ການ​ຮ່ວມ​ມືທີ່​ມີ​ຜົນ​ປະໂຫຍດ​ສູງ​ສຸດ ທັງ​ໃຫ້ການ​ຊ່ວຍເຫຼືອ​ທາງ​ດ້ານ​ວັດຖຸ​ອຸປະກອນ​ແລ້ວ ຍັງ​ຊ່ວຍເຫຼືອ​ທາງດ້ານ​ວິຊາ​ການ ແລະ ການ​ແລກປ່ຽນ​ທັດສະນະ​ສຶກ​ສາ ເພື່ອ​ພັດທະ​ນາ​ວຽກ​ງານ​ທັນ​ຕະ​ແພດລາວ.

ຂ່າວທີ່ກ່ຽວຂ້ອງ