ຢາສູບບໍ່ປະຕິບັດຕາມລະບຽບການ ເປັນຜະລິດຕະພັນນອກລະບົບ

454 13 ກ.ພ. 2018 ຂ່າວໜ້າ​ໜຶ່ງ
ຢາສູບບໍ່ປະຕິບັດຕາມລະບຽບການ ເປັນຜະລິດຕະພັນນອກລະບົບ

ກົມ​ອະນາໄມ ແລະ ສົ່ງເສີມສຸຂະພາບ ກະຊວງ​ສາທາລະນະ​ສຸກ ຮຽກຮ້ອງ​ໃຫ້​ສອງ​ບໍລິສັດ​ຜູ້ຜະລິດ​ຢາສູບ​ລາຍ​ໃຫຍ່​ ໃຫ້​ປະຕິບັດ​ຕາມ​ລະບຽບ​ການ ຂະນະ​ທີ່ກະຊວງ​ອຸດສາຫະກຳ ແລະ ການຄ້າ ໄດ້​ອອກ​ແຈ້ງ​ການ​ກ່ຽວ​ກັບຜະລິດ​ຕະ​ພັນ​ຢາສູບ​ທີ່​ຜະລິດພາຍ​ໃນ ແລະ ນຳ​ເຂົ້າ​ເພື່ອ​ຈຳໜ່າຍ ຖ້າ​ບໍ່​ມີ​ສະແຕມ​ພາສີ-ອາກອນ ແລະ ຄຳເຕືອນ​ສຸຂະພາບຮູບ​ແບບ​ເກົ່າ​ແມ່ນ​ຢາສູບ​ນອກລະບົບ.

ທ່ານ ບຸນ​ເພັງ ພິລາ​ວົງ ຫົວໜ້າ​ກົມ​ອະນາໄມ ແລະ ສົ່ງເສີມສຸຂະພາບ ຫົວໜ້າ​ກອງ​ເລຂາ​ຄະນະ​ກຳມະການ​ແຫ່ງ​ຊາດ ເພື່ອການ​ຄວບ​ຄຸມ​ຢາສູບ ໄດ້​ຖະແຫຼງຕໍ່​ສື່​ມວນ​ຊົນ ວັນ​ທີ 8 ກຸມພາ 2018 ວ່າ: ການຈັດຕັ້ງ​ປະຕິບັດຂໍ້​ຕົກລົງ​ກ່ຽວ​ກັບ​ການຈັດຕັ້ງ​ປະຕິ​ບັດ​ກົດໝາຍ​ວ່າ​ດ້ວຍ​ການ​ຄວບຄຸມ​ຢາສູບ ສະບັບ​ເລກ​ທີ 1067/​ສທ ຂອງ​ບັນດາ​ບໍລິສັດ​ຜູ້ຜະລິດ ແລະ ນຳ​ເຂົ້າ​ຢາສູບ​ໃນໄລຍະ​ຜ່ານ​ມາ ເຫັນ​ວ່າ​ບໍລິສັດ​ຜູ້ນຳ​ເຂົ້າ​ສ່ວນ​ໃຫຍ່​ແມ່ນ​ປະຕິບັດໄດ້​ດີ ສ່ວນ​ສອງ​ບໍລິສັດ​ຜູ້​ຜະລິດລາຍ​ໃຫຍ່ ແມ່ນ​ຍັງ​ບໍ່​ທັນ​ຈັດ​ຕັ້ງປະຕິບັດ ປະກອບ​ມີ​ບໍລິສັດ ຢາສູບ​ລາວ ຈຳກັດ ແລະ ບໍລິສັດ ຢາສູບ​ຫົງ​ຖາ​ໂຊກ​ດີ ລາວ-ຈີນ ຈຳກັດ ແມ່ນ​ຍັງ​ບໍ່​ທັນ​ຈັດ​ຕັ້ງ​ປະຕິ​ບັດ ແລະ ໄດ້​ເລື່ອນ​ເວລາ​ມາເປັນ​ຄັ້ງ​ທີ 3 ນັບ​ແຕ່​ໄດ້​ມີ​ຂໍ້​ຕົກລົງ​ສະບັບ​ດັ່ງກ່າວ​ອອກ​ມາ ຄື: ຄັ້ງ​ທີ 1 ເລື່ອນ​ຈາກວັນ​ທີ 11 ພະຈິກ 2016 ມາ​ເປັນ 1 ພຶດສະພາ 2017 ຄັ້ງ​ທີ 2 ຈາກ​ວັນ​ທີ 1 ພຶດສະພາ 2017 ມາ​ເປັນ 31 ສິງຫາ 2017 ແລະ ຄັ້ງ​ຫຼ້າ​ສຸດ​ຈາກ​ວັນທີ 1 ສິງຫາ 2017 ມາ​ເປັນ 1 ມັງກອນ 2018 ດັ່ງນັ້ນ ຮຽກຮ້ອງ​ມາຍັງ​ສອງ​ບໍລິສັດ ​ຈົ່ງ​ພ້ອມ​ກັນ​ຈັດຕັ້ງ​ປະຕິບັດ​ຕາມ​ກົດໝາຍ​ຢ່າງເຂັ້ມ​ງວດ ເພື່ອ​ເຮັດ​ໃຫ້​ວຽກ​ງານຄວບ​ຄຸມ​ຢາສູບ​ມີ​ປະສິດທິພາບ ແລະ ປະ​ສິດທິ​ຜົນ​ສູງ​ສຸດ ສົມ​ກັບເປັນ​ພາຄີ​ກັບ​ສົນທິສັນຍາ​ສາກົນ ວ່າ​ດ້ວຍ​ການ​ຄວບ​ຄຸມ​ຢາສູບ.

ອີງ​ຕາມ​ແຈ້ງ​ການ​ຂອງ​ຫ້ອງການ​ກະຊວງ​ອຸດສາຫະກຳ ແລະ ການ​ຄ້າ ສະບັບ​ເລກ​ທີ 0153/​ຫອຄ.​ກຄພນ ລົງ​ວັນ​ທີ 18 ມັງກອນ 2018 ຢາສູບ​ທັງ​ຜະລິດຢູ່​ພາຍ​ໃນ ແລະ ນຳ​ເຂົ້າ​ຈາກຕ່າງປະເທດ ເພື່ອ​ມາ​ຈຳໜ່າຍ​ຢູ່ໃນ​ລາວ ນອກຈາກ​ເສຍ​ພັນທະຕ່າງໆ​ໃຫ້​ລັດ​ຕາມ​ລະບຽບ​ການຂອງ​ກະຊວງ​ການ​ເງິນ​ແລ້ວ ຕ້ອງໄດ້​ພິມ​ຄຳເຕືອນ​ສຸຂະພາບ​ເປັນຮູບ​ພາບ​ກວມ 75% ແລະ ຂໍ້ຄວາມ​ໂຕ​ໜັງສື​ທີ່​ເປັນ​ພາສາລາວ​ຢູ່​ຂ້າງ​ຊອງ-ຕຸດ​ຂອງ​ຜະລິດຕະ​ພັນ​ຢາສູບ ​ຕາມ​ກຳນົດ​ຂອງ​ກະຊວງ​ສາທາລະນະ​ສຸກ ແລະ ຕາມຂໍ້​ຕົກລົງ​ກ່ຽວ​ກັບ​ການຈັດຕັ້ງ​ປະຕິ​ບັດ​ກົດໝາຍ​ວ່າ​ດ້ວຍ​ການ​ຄວບຄຸມ​ຢາສູບ ສະບັບ​ເລກ​ທີ 1067/​ສທ ລົງ​ວັນ​ທີ 23 ພຶດ​ສະພາ 2016 ໂດຍ​ມອບ​ໃຫ້​ພະ​ແນກອຸດສາຫະກຳ ແລະ ການ​ຄ້າ ແຂວງນະຄອນຫຼວງ ສົມທົບ​ກັບຂະແໜງການ​ກ່ຽວຂ້ອງ​ ລົງ​ຕິດຕາມ​ກວດກາ​ການຈຳໜ່າຍ​ຢາສູບ​ທີ່​ບໍ່​ຖືກຕ້ອງ.

ນອກ​ນັ້ນ ໃນ​ແຈ້ງ​ການ​ສະບັບນີ້​ຍັງ​ລະບຸ​ວ່າ: ສຳລັບ​ຜະລິດ​ຕະພັນ​ຢາສູບ​ທີ່​ຜະລິດ​ຢູ່​ພາຍ​ໃນ ແລະ ນຳ​ເຂົ້າ​ຈາກ​ຕ່າງປະເທດ ກ່ອນ​ວັນ​ທີ 1 ມັງກອນ 2018 ທີ່​ມີສະແຕມ​ພາສີ-ອາກອນ ແລະ ຄຳເຕືອນ​ສຸຂະພາບ​ຮູບ​ແບບ​ເກົ່າແມ່ນ​ໃຫ້​ເຮັດ​ບົດ​ບັນທຶກ​ກ່າວເຕືອນ ແລະ ອະນຸຍາດ​ຈຳໜ່າຍໃຫ້​ໝົດ ໃນ​ເວລາ 1 ເດືອນ ຖ້າຄົບ​ກຳນົດ​ຖື​ວ່າ​ເປັນ​ຢາສູບ​ນອກລະບົບ​ ໃຫ້​ຢຶດ ແລະ ໃຊ້​ມາດ​ຕະການ​ຕາມ​ກົດໝາຍ ແລະ ລະບຽບ​ການ​ທີ່​ກຳນົດ​ໄວ້ ສ່ວນ​ຜະລິດ​ຕະ​ພັນ​ຢາສູບ​ທີ່​ບໍ່​ມີ​ສະແຕມພາສີ-ອາກອນ ຫຼື ບໍ່​ມີ​ສະຫຼາກຄຳເຕືອນ​ສຸຂະພາບ​ເປັນ​ພາສາລາວ ​ຖື​ວ່າ​ເປັນ​ຢາສູບ​ນອກ​ລະບົບ (ເຖື່ອນ) ໃຫ້​ນຳ​ໃຊ້​ມາດ​ຕະການຕາມ​ກົດໝາຍ ແລະ ລະບຽບການ​ທີ່​ໄດ້​ກຳນົດ​ໄວ້​ຢ່າງ​ເຂັ້ມງວດ.

ຂ່າວທີ່ກ່ຽວຂ້ອງ