ອາຄານໂຮງໝໍນ້ອຍບ້ານຫ້ອມ ເກີດຂຶ້ນໄດ້ຍ້ອນສັດທາຂອງສັງຄົມ

440 13 ກ.ພ. 2018 ຂ່າວໜ້າ​ໜຶ່ງ
ອາຄານໂຮງໝໍນ້ອຍບ້ານຫ້ອມ ເກີດຂຶ້ນໄດ້ຍ້ອນສັດທາຂອງສັງຄົມ

ພິທີ​ມອບ-ຮັບ​ອາຄານ​ໂຮງໝໍນ້ອຍ​ບ້ານ​ຫ້ອມ ເມືອງ​ຫາດຊາຍ​ຟອງ ນະຄອນຫຼວງ​ວຽງ​ຈັນ ໄດ້​ຈັດ​ຂຶ້ນ​ວັນ​ທີ 11 ກຸມພາ 2018 ກ່າວ​ມອບ​ໂດຍ​ພະ​ອາຈານ ໄລ ສຸ​ຣະ​ປັນ​ໂຍ ປະທານ ​ອພສ ເມືອງຫາດ​ຊາຍ​ຟອງ ແລະ ກ່າວ​ຮັບໂດຍ​ທ່ານ ແກ່ນ ວໍລະ​ສານ ຮັກສາ​ການ​ເຈົ້າເມືອງ​ຫາດ​ຊາຍຟອງ ຈາກ​ນັ້ນ ໄດ້​ມອບ​ຕໍ່ໃຫ້​ທ່ານນາງ ຄຳ​ສະໝໍ ວົງ​ຄຳ​ຈັນ ອຳນວຍ​ການ​ໂຮງ​ໝໍນ້ອຍ​ບ້ານ​ຫ້ອມ ເພື່ອ​ຄຸ້ມ​ຄອງ​ນຳ​ໃຊ້​ໃຫ້​ເກີດ​ປະໂຫຍດ​ສູງ​ສຸດ ມີ​ພະ​ເຖ​ລາ​ນຸ​ເຖລະ ທ່ານ ສີ​ຫຸນ ສິດທິ​ລື​ໄຊ ຮອງເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ພອນ​ປະເສີດ ອາ​ນຸ​ພົມ ຫົວໜ້າ​ພະ​ແນກ​ສາທາລະນະ​ສຸກ ນະຄອນຫຼວງ​ວຽງ​ຈັນ ບັນດາ​ຫົວໜ້າ​ຫ້ອງການ ຫົວໜ້າ​ກຸ່ມ​ບ້ານ ອຳນາດ​ການ​ປົກຄອງ​ບ້ານ ແລະ ປະຊາຊົນ​ເຂົ້າ​ຮ່ວມ.

ໃນ​ພິທີ​ທ່ານ ບົວ​ໃສ ລຸນ​ນະວົງສາ ຫົວໜ້າ​ຫ້ອງ​ວ່າການ​ປົກຄອງ​ເມືອງ​ຫາດ​ຊາຍ​ຟອງ ໄດ້​ຂຶ້ນລາຍ​ງານ​ໂຄງການ​ກໍ່ສ້າງ​ໂຮງໝໍນ້ອຍ​ບ້ານ​ຫ້ອມ ເຊິ່ງ​ເຫັນ​ວ່າກ່ອນ​ໜ້າ​ນີ້ເອີ້ນ​ວ່າສຸກສາລາບ້ານ​ຫ້ອມ​ຫຼັງ​ເກົ່າ ສ້າງ​ຂຶ້ນ​ປີ 1968 ມີ​ຫ້ອງ​ຮັບ​ໃຊ້​ບໍລິການ 5 ຫ້ອງ ແລະ ຖືກ​ສ້ອມແປງ 1 ຄັ້ງ ປີ 2000 ອີງໃສ່​ອາຍຸ​ການ​ໃຊ້ງານ​ເຫັນ​ວ່າ​ຍາວ​ນານ​ເກົ່າ​ແກ່ຊຸດໂຊມ​ ການ​ນຳ​ໃຊ້​ບໍ່​ສະດວກ​ ບໍ່ຮັບປະກັນ ແລະ ບໍ່​ຕອບ​ສະໜອງໄດ້​ກັບ​ຄວາມ​ຮຽກຮ້ອງ​ຕ້ອງການຂອງ​ການ​ຂະຫຍາຍຕົວ​ຂອງ​ສັງຄົມ ກໍ່​ຄືການ​ບໍລິການ​ຮັບ​ໃຊ້​ປະຊາ​ຊົນ ແຕ່​ອີງໃສ່​ນະໂຍບາຍຂອງພັກ-ລັດ ກໍ່​ຄືກະຊວງ​ສາທາ​ລະນະ​ສຸກ ການ​ບໍລິການ​ຮັກສາ​ສຸຂະພາບພໍ່​ແມ່​ປະຊາຊົນ ເຫັນ​ວ່າ​ມີ​ຄວາມ​ຈຳເປັນ​ຕ້ອງ​ໄດ້ປັບປຸງ​ພັດທະນາ​ໃຫ້​ດີ​ຂຶ້ນ​ເປັນກ້າວໆ ເພື່ອ​ສ້າງ​ເງື່ອນໄຂ​ອຳນວຍ​ຄວາມ​ສະດວກ​ໃຫ້​ທຸກ​ຊັ້ນຄົນ ​ໄດ້​ເຂົ້າ​ເຖິງ​ການ​ບໍລິການ​ທີ່ຮັບປະກັນ​ທັນ​ສະໄໝ ເຮັດ​ໃຫ້​ອາຍຸ​ຍືນ​ສະເລ່ຍ​ນັບ​ມື້​ສູງ​ຂຶ້ນ ດັ່ງນັ້ນ ຄະນະ​ຮັບຜິດຊອບ​ປຸກລະດົມ​ທຶນ ໄດ້​ຕົກລົງ​ຈັດ​ຜ້າປ່າ​ສາມັກຄີ​ຂຶ້ນອີກ 1 ປາງ ທີ່​ສະໂມສອນ​ປົກຄອງເມືອງ​ຫາດ​ຊາຍ​ຟອງ ເພື່ອ​ລະດົມ​ທຶນ​ຕື່ມ​ຈາກ​ທຸກ​ພາກສ່ວນ​ສັງຄົມ ແລະ ຜ່ານ​ການ​ລະດົມ​ສອງຄັ້ງ ໄດ້​ຮັບ​ເງິນສົດ​ທັງ​ໝົດ 784.177.000 ກີບ ໄດ້​ຮັບ​ວັດຖຸຕຽງ​ນອນ​ເຫຼັກ 10 ໜ່ວຍ ລໍ້​ຍູ້ຄົນ​ເຈັບ 1 ເຄື່ອງ ມູນ​ຄ່າ 37,5 ລ້ານ​ກີບ ຕູ້ເຢັນ 8 ໜ່ວຍ ມູນ​ຄ່າ 13,2 ລ້ານ​ກີບ ຈັກຊັກເຄື່ອງ 1 ໜ່ວຍ ມູນ​ຄ່າ 3,2 ລ້ານ​ກີບ ລວມ​ມູນ​ຄ່າ​ທີ່​ປຸກລະດົມ​ໄດ້​ທັງວັດຖຸ ແລະ ເງິນສົດ​ທັງ​ໝົດ 838.077.000 ກີບ.

ໂຄງການ​ກໍ່ສ້າງ​ໄດ້​ເລີ່ມ​ຈັດຕັ້ງ​ປະຕິບັດ​ເດືອນ​ພຶດສະພາ 2015 ແລະ ສຳເລັດ​ເດືອນ​ກັນຍາ 2017 ເປັນ​ອາຄານ​ຊັ້ນ​ດຽວ ຂະໜາດ​ຍາວ 28 ແມັດ ແລະ ກວ້າງ 12 ແມັດ ປະກອບ​ມີ 12 ຫ້ອງ​ເຮັດ​ວຽກ 1 ຫ້ອງໂຖງ​ໃຊ້​ເປັນ​ບ່ອນ​ຮັບ​ຕ້ອນ ຫ້ອງສຸກ​ເສີນ 1 ຫ້ອງ ຫ້ອງ​ກວດ​ຄົນເຈັບ​ເຂດ​ນອກ 1 ຫ້ອງ ຫ້ອງ​ວິເຄາະ 1 ຫ້ອງ ຫ້ອງ​ປິ່ນປົວ​ແຂ້ວ 1 ຫ້ອງ ຫ້ອງ​ກວດ​ຄື້ນ​ສຽງ (ເອ​ໂກ) 1 ຫ້ອງ ຫ້ອງ​ຊ່ວຍ​ເກີດ​ລູກ 1 ຫ້ອງ ຫ້ອງ​ນອນ​ແມ່​ຫຼັງ​ຄອດ 1 ຫ້ອງ ແລະ ຫ້ອງ​ນອນ​ຄົນ​ເຈັບທົ່ວ​ໄປ 4 ຫ້ອງ.

ຂ່າວທີ່ກ່ຽວຂ້ອງ