ຄບຕ ຈະໃຊ້ງົບ 2 ຕື້ກວ່າ ບຳລຸງຮັກສາສວນສາທາລະນະ

132 13 ກ.ພ. 2018 ຂ່າວໜ້າ​ໜຶ່ງ

ຫ້ອງການ​ຄຸ້ມ​ຄອງ ແລະ ບໍ​ລິການ​ຕົວ​ເມືອງ​ວຽງ​ຈັນ (​ຄບຕ) ຈັດ​ກອງ​ປະຊຸມ​ສະຫຼຸບ​ວຽກ​ງານຮອບດ້ານ​ ປະຈຳ​ປີ 2017 ແລະ ວາງ​ທິດ​ທາງ​ແຜນການ​ປີ 2018 ໃນ​ວັນ​ທີ 9 ກຸມພາ 2018 ຢູ່​ທີ່ ​ຫຄບ ໂດຍ​ການ​ເປັນ​ປະທານຂອງ​ທ່ານ​ນາງ ວິໄລ​ວອນ ຈັນທະລາຕີ ຫົວໜ້າ​ຫ້ອງການ​ຄຸ້ມ​ຄອງ ແລະ ບໍລິການ​ຕົວ​ເມືອງ​ວຽງ​ຈັນ ໃຫ້​ກຽດ​ເຂົ້າ​ຮ່ວມໂດຍ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງເຈົ້າ​ຄອງ ພ້ອມ​ດ້ວຍ​ພະນັກງານຫຼັກ​ແຫຼ່ງ ແລະ ຜູ້ຕາງໜ້າ​ຈາກ ​ຫຄບ 9 ຕົວ​ເມືອງ​ອ້ອມ​ຂ້າງ​ນະຄອນ​ຫຼວງ​ວຽງ​ຈັນ.

ທ່ານ ສົມບູນ ອາ​ຄະ​ວົງສາ ຮອງ​ຫົວໜ້າ​ຫ້ອງການ ​ຄບຕ ໄດ້ຜ່ານ​ບົດ​ລາຍ​ງານ​ປະຈຳ​ປີ 2017 ແລະ ທິດ​ທາງ​ແຜນການ 2018 ເຊິ່ງ​ໃນ​ປີຜ່ານມາ ຫ້ອງການ ​ຄບຕ ໄດ້​ເປັນ​ເຈົ້າ​ການ​ຢ່າງ​ຕັ້ງໜ້າ ​ເຂົ້າ​ໃນ​ການຈັດຕັ້ງ​ປະຕິບັດວຽກ​ງານ​ວິຊາ​ສະເພາະ​ຂອງ​ຕົນ ດ້ວຍ​ຄວາມ​ຮັບຜິດຊອບ​ສູງ ເຮັດໃຫ້​ຫຼາຍ​ວຽກ​ງານ​ປະສົບ​ຜົນ​ສຳເລັດ​ຕາມ​ແຜນການ​ວາງ​ໄວ້ ສ້າງ​ໃຫ້ນະຄອນຫຼວງ​ວຽງ​ຈັນ ມີຄວາມ​ສວຍ​ງາມ ສະອາດ ແລະ ເປັນ​ລະບຽບ​ຮຽບ​ຮ້ອຍ ໂດຍ​ໃນ​ປີ 2017 ຫ້ອງການ ​ຄບຕ ໄດ້​ຕັດແຕ່ງ​ຕົ້ນໄມ້​ຕາມ​ເສັ້ນທາງ​ສາຍຫຼັກ ໃນ​ນະຄອນຫຼວງ​ວຽງ​ຈັນ ຈຳນວນ 6 ເສັ້ນທາງ ປູກ​ຕົ້ນໄມ້ຕາມ​ເສັ້ນທາງ ແລະ ສວນ​ໄຊເຊດ​ຖາ ສວນ​ດາວ​ແດງ ແລະ ສວນ​ເຈົ້າ​ອະນຸວົງ ໄດ້​ຫຼາຍ​ກວ່າ 1 ພັນ​ຕົ້ນ ເອົາໃຈໃສ່​ຕິດຕາມ​ກວດກາ​ວຽກ​ງານ​ຄຸ້ມ​ຄອງ​ຮ່ອງ​ລະບາຍ​ນ້ຳ​ໃນ​ຕົວ​ເມືອງໄດ້​ເຖິງ 30.831 ແມັດ ແລະ ຕາມ​ແຄມທາງ 22 ເສັ້ນທາງ ສ້ອມແປງ ແລະ ປ່ຽນ​ຖ່າຍ​ຝາ​ປິດ​ຮ່ອງ​ລະບາຍ​ນ້ຳ​ໄດ້ 25 ຝາ​ມົນ ວາງ​ທໍ່ໃໝ່ ຈຳນວນ 6 ຈຸດ ລົງ​ເກັບ​ກຳຂໍ້​ມູນ​ກ່ຽວ​ກັບ​ຄວາມ​ບໍ່​ເປັນ​ລະບຽບ​ຮຽບ​ຮ້ອຍ​ຕາມ​ເສັ້ນ​ທາງ ໂດຍ​ສະເພາະແມ່ນເທີບ ເງີບ ສາຍ​ໄຟຟ້າ ປ້າຍ​ໂຄສະນາ​ຕ່າງໆ ເພື່ອ​ນຳ​ມາ​ແກ້​ໄຂ​ໃຫ້​ເຂົ້າ​ສູ່​ລະບົບ ວຽກ​ງານ​ການ​ເກັບ​ມ້ຽນ​ຂີ້ເຫຍື້ອ​ໃນ​ສຳນັກງານ ແລະ ຄອບຄົວ ໄດ້​ຈຳນວນ 11.933 ຖ້ຽວ ນ້ຳໜັກ 69.704 ໂຕນ ຕາມ​ເສັ້ນທາງ​ສາທາລະນະໄດ້ 560 ຖ້ຽວ ນ້ຳໜັກ 107.549 ໂຕນ ພ້ອມ​ດຽວ​ກັນ​ນັ້ນ ຫ້ອງການ ​ຄບຕ ຍັງ​ເປັນ​ເຈົ້າ​ການ​ຢ່າງໃກ້ຊິດ ປະສານ​ສົມທົບ​ກັບ ​ຄບຕ ຂອງ 9 ຕົວ​ເມືອງ ໂດຍ​ສະເພາະແມ່ນ 4 ຕົວ​ເມືອງ​ໃນ ເພື່ອ​ພ້ອມກັນ​ສ້າງ​ໃຫ້​ຕົວ​ເມືອງ​ມີ​ຄວາມເປັນ​ລະບຽບ​ຮຽບ​ຮ້ອຍ ສວຍ​ງາມ ປະຊາຊົນ​ມີ​ສະພາບ​ແວດ​ລ້ອມ​ທີ່ດີ ສຸ​ຂະ​ອະນາໄມ​ທີ່​ຖືກຕ້ອງ ແລະ ຊຸກຍູ້​ວຽກ​ງານ​ຮັກສາ​ຄວາມ​ສະອາດ ຄຽງ​ຄູ່​ກັບ​ການ​ເປັນ​ເຈົ້າພາບ​ທີ່​ດີ​ໃນ​ປີ​ທ່ອງ​ທ່ຽວ​ລາວ 2018 ໃຫ້​ປະສົບ​ຜົນສຳເລັດ​ຕາມຄາດໝາຍ​ວາງ​ໄວ້.

ສຳລັບທິດ​ທາງ​ແຜນການ​ປີ 2018 ຫ້ອງການ ​ຄບຕ ຈະ​ໄດ້​ສືບຕໍ່​ຈັດ​ຕັ້ງ​ປະຕິບັດ​ວຽກ​ງານ​ວິຊາສະເພາະ​ຂອງ​ຕົນ ເພື່ອ​ໃຫ້​ນະຄອນ​ຫຼວງ​ວຽງ​ຈັນ ເປັນ​ເມືອງ​ທີ່ສວຍ​ງາມ ແລະ ໜ້າ​ຢູ່ ເຊິ່ງ​ໃນນັ້ນ ຫ້ອງການ ​ຄບຕ ໄດ້​ຂຶ້ນ​ແຜນງົບປະມານ​ບຳລຸງ​ຮັກສາ​ສວນ​ສາທາລະນະ​ສຳຄັນ​ໃນ​ຕົວ​ເມືອງ ເພື່ອ​ຕ້ອນຮັບ​ວັນ​ສຳຄັນ​ຕ່າງໆຂອງ​ຊາດ ມູນ​ຄ່າ 2.494.289.136 ຕື້​ກີບ.

ຂ່າວທີ່ກ່ຽວຂ້ອງ