ລາວ-ໄທ ຮ່ວມກັນພັດທະນາວຽກງານ ICT

145 13 ກ.ພ. 2018 ຂ່າວໜ້າ​ໜຶ່ງ
ລາວ-ໄທ ຮ່ວມກັນພັດທະນາວຽກງານ ICT

ໃນ​ວັນ​ທີ 12 ກຸມພາ 2018 ທີ່​ສຳນັກງານ​ນາຍົກລັດຖະມົນຕີ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ໃຫ້​ກຽດ​ຕ້ອນຮັບການ​ເຂົ້າ​ຢ້ຽມ​ຄຳນັບ​ຂອງ​ທ່ານ ພົນ​ເອກ ປຣະ​ວິດ ວົງ​ສຸວັນ ຮອງນາຍົກລັດຖະມົນຕີ ລັດຖະມົນຕີກະຊວງ​ປ້ອງ​ກັນ​ປະເທດ ແຫ່ງ ຣາ​ຊະ​ອານາຈັກ​ໄທ ພ້ອມ​ດ້ວຍຄະນະ ເນື່ອງ​ໂອກາດ​ເດີນທາງມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຢ່າງ​ເປັນ​ທາງ​ການ.

ໃນ​ໂອກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຕ້ອນຮັບ ແລະ ຕີ​ລາຄາ​ສູງ​ຕໍ່​ການ​ເດີນທາງ​ມາ​ເຄື່ອນ​ໄຫວ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຂອງ​ທ່ານ​ພົນ​ເອກ ປຣະ​ວິດ ວົງ​ສຸວັນ ອັນ​ເປັນ​ການ​ປະກອບສ່ວນສຳຄັນ ໃນ​ການ​ເສີມ​ຂະຫຍາຍສາຍ​ພົວພັນ​ຮ່ວມ​ມື​ຂອງ​ສອງ​ປະເທດ​ໃຫ້​ຈະເລີນ​ງອກ​ງາມ​ຍິ່ງໆຂຶ້ນ ໂດຍ​ສະເພາະແມ່ນ​ການ​ພົວພັນ​ຮ່ວມ​ມື​ທາງ​ດ້ານ​ວຽກ​ງານໂທລະ​ຄົມມະນາຄົມ ແລະ ເຕັກໂນ​ໂລ​ຊີຂໍ້​ມູນ (ICT) ຂອງ​ສອງປະເທດ ການ​ພັດທະນາ​ຊັບ​ພະຍາ​ກອນ​ມະນຸດ ແລະ ການ​ແລກປ່ຽນ​ບົດຮຽນ​ເຊິ່ງ​ກັນ ແລະ ກັນ ຕະຫຼອດ​ມາ ໂອກາດ​ນີ້ ທ່ານ​ນາຍົກ​ຍັງ​ໄດ້​ແຈ້ງ​ໃຫ້​ທ່ານ ພົນ​ເອກ ປຣະ​ວິດ ວົງ​ສຸວັນ ຊາບ​ວ່າ: ປັດ​ຈຸບັນ ​ສປປ ລາວ ພວມ​ສຸມ​ໃສ່​ນຳໃຊ້​ວຽກ​ງານ ICT ເຂົ້າ​ໃນ​ການຄຸ້ມ​ຄອງ ແລະ ພັດທະນາ​ເສດ​ຖະກິດ-ສັງຄົມ ນັບ​ມື້​ສູງ​ຂຶ້ນ ພ້ອມດຽວ​ກັນ​ນັ້ນ ທ່ານ​ນາຍົກຍັງ​ໄດ້ເນັ້ນ​ໜັກ​ໃຫ້​ຂະແໜງ​ໄປສະນີ ໂທລະ​ຄົມມະນາຄົມ ແລະ ການສື່ສານ​ຂອງ​ສອງ​ປະເທດ ຈົ່ງ​ສືບຕໍ່​ໃຫ້ການ​ພົວພັນ​ຮ່ວມ​ມື​ຊ່ວຍເຫຼືອ​ເຊິ່ງ​ກັນ ແລະ ກັນ ໃນ​ດ້ານຕ່າງໆ​ຕໍ່​ໄປ ເພື່ອ​ເຮັດ​ໃຫ້​ວຽກງານ​ດັ່ງກ່າວ ໄດ້​ຮັບ​ການ​ພັດ​ທະນາ​ດີ​ຂຶ້ນ​ເລື້ອຍໆ ໂດຍ​ສະເພາະແມ່ນ​ການ​ຕິດ​ຕັ້ງ​ໂປຣ​ແກຣມ​ລົງທະບຽນ​ໝາຍ​ເລກໂທລະສັບ​ມື​ຖື ໃຫ້​ແກ່​ກະຊວງ​ໄປສະນີ ໂທລະຄົມມະນາຄົມ ແລະ ສື່ສານ​ຂອງລາວ ການ​ຈັດ​ສັນ​ຄື້ນ​ຄວາມ​ຖີ່ຕາມ​ເຂດ​ຊາຍ​ແດນ​ຂອງ​ສອງ​ປະເທດ ລາວ-ໄທ ໃຫ້​ໄດ້​ຮັບ​ການແກ້​ໄຂ​ເປັນ​ຢ່າງ​ດີ ທັງ​ນີ້ກໍ່​ເພື່ອເປັນ​ການ​ນຳ​ຜົນ​ປະໂຫຍດ​ມາສູ່ປະຊາຊົນ​ສອງ​ປະເທດ​ຢ່າງ​ແທ້ຈິງ ນອກ​ນັ້ນ ທ່ານ​ນາຍົກ​ຍັງໄດ້​ຝາກ​ຄວາມ​ຢື້​ຢາມ​ຖາມ​ຂ່າວໄປ​ຍັງ​ທ່ານ ພົນ​ເອກ ປະ​ຢຸດ ຈັນໂອຊາ ນາຍົກລັດຖະມົນຕີ ແຫ່ງ ຣາ​ຊະ​ອານາຈັກ​ໄທ ອີກ​ດ້ວຍ.

ພ້ອມ​ນີ້ ທ່ານ​ພົນ​ເອກ ປຣະ​ວິດ ວົງ​ສຸວັນ ໄດ້​ສະແດງ​ຄວາມ​ຂອບໃຈ​ຕໍ່​ທ່ານ ທອງ​ລຸນ ສີ​ສຸ​ລິດ ທີ່​ໄດ້ເສຍສະຫຼະ​ເວລາ​ອັນ​ລ້ຳ​ຄ່າ​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ພ້ອມທັງ​ແຈ້ງ​ຈຸດປະສົງ​ຂອງ​ການ​ເດີນທາງ​ມາ​ເຄື່ອນ​ໄຫວ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ໃນຄັ້ງ​ນີ້ ແລະ ສັນຍາ​ວ່າ​ຈະ​ສືບຕໍ່ໃຫ້ການ​ຊ່ວຍເຫຼືອ ​ສປປ ລາວ ໃນ​ດ້ານ​ຕ່າງໆ​ຕໍ່​ໄປ ໂດຍ​ສະເພາະ​ຂະແໜງ​ໄປສະນີ ໂທລະຄົມມະນາຄົມ ແລະ ການ​ສື່ສານຂອງ​ລາວ ແນໃສ່​ເພື່ອ​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື​ຂອງສອງ​ປະເທດ ທີ່​ມີ​ມາ​ແຕ່​ດົນ​ນານແລ້ວ​ນັ້ນ ໃຫ້​ຈະເລີນ​ງອກ​ງາມຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ