ຂ່າວຫຼ້າສຸດ

ກຽມຈັດຄາລາວານທ່ອງທ່ຽວ ບໍລິເວນຕີນພູເຂົາຄວາຍ

369 14 ກ.ພ. 2018 ຂ່າວໜ້າ​ໜຶ່ງ
ກຽມຈັດຄາລາວານທ່ອງທ່ຽວ ບໍລິເວນຕີນພູເຂົາຄວາຍ

ວັນ​ທີ 12 ກຸມພາ 2018 ທ່ານ ຄຳ​ປະດິດ ເຂັມ​ມານິດ ຫົວໜ້າພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ລົງ​ພົບ​ປະ​ອຳນາດການ​ປົກຄອງ ກຸ່ມ​ບ້ານ​ຊ້າງ ມີບ້ານນາ​ຕານ ບ້ານ​ນາ​ໂງມ​ໃໝ່ ນາ​ໂງມ​ເກົ່າ ນາ​ຄາຍ ນາ​ຄັນ​ທຸງ ຫົວ​ນາ ຫົວ​ຂົວ ແລະ ບ້ານ​ໂພນແພງ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ມີ​ຕາງໜ້າ ຖວທ ເມືອງ ເລຂາ​ພັກ​ບ້ານ ນາຍບ້ານ ພາຍ​ໃນ​ກຸ່ມ​ບ້ານ​ຊ້າງ ​ເຂົ້າ​ຮ່ວມ.

ໃນ​ໂອກາດ​ນີ້ ທ່ານ ຄຳ​ປະດິດ ເຂັມ​ມານິດ ໄດ້​ຮັບ​ຟັງ​ການ​ລາຍງານ​ສະພາບ​ຄວາມ​ເປັນ​ມາ​ຂອງກຸ່ມ​ບ້ານ​ຊ້າງ ແລະ ແຫຼ່ງ​ທ່ອງທ່ຽວ​ທຳ​ມະ​ຊາດ​ບໍລິເວນ​ຕີນ​ພູເຂົາ​ຄວາຍ ແລະ ປຶກສາ​ຫາລືແລກປ່ຽນ​ກ່ຽວ​ກັບ​ທີ່​ຕັ້ງ​ຈຸດ​ພິເສດ​ຄວາມ​ເປັນ​ມາ ການ​ເຮັດ​ກິດ​ຈະກຳ​ຄາ​ລາ​ວານ​ທ່ອງ​ທ່ຽວ​ບໍລິເວນຕີນ​ພູເຂົາ​ຄວາຍ ໃນ​ທ້າຍ​ເດືອນມີນາ​ນີ້ ເຊິ່ງ​ມີ​ຫຼາຍ​ຈຸດ​ຂອງ​ແຫຼ່ງທ່ອງ​ທ່ຽວ ເຊັ່ນ: ບ່ອນ​ຜະລິດກອງ​ກະ​ລໍ​ຂອງ​ບ້ານ​ຫົວ​ຂົວ ແຫຼ່ງທ່ອງ​ທ່ຽວ​ຕາດ​ປາຝາ ຢູ່​ບ້ານ​ຫົວນາ ການ​ຜະລິດ​ເຂົ້າ ຫັດຖະກຳ ຕ່ຳ​ແຜນ ການ​ຈັກສານ ຕະຫຼອດຮອດ​ແຫຼ່ງ​ທ່ອງ​ທ່ຽວ​ຕາດ​ພັກຊອຍ​ວອຍ ພະ​ບາດ​ແອວ​ຂັນ ຫາດ​ຊາຍ​ຂາວ ໜອງ​ໂງມ ນີ້ແມ່ນ​ເປັນ​ແຫຼ່ງ​ທ່ອງ​ທ່ຽວ​ຂອງກຸ່ມ​ບ້ານ​ຊ້າງ ນອກ​ນັ້ນຍັງ​ຈະ​ມີການ​ຈັດ​ຕະຫຼາດນັດ ວາງ​ສະແດງ​ສິນຄ້າ​ຕ່າງໆ ແລະ ເຮັດ​ກິດຈະ​ກຳ​ຕ່າງໆ ທັງ​ນີ້ ເພື່ອ​ເປັນການ​ສືບຕໍ່​ປະຕິບັດ​ແຜນ​ວຽກ​ຈຸດສຸມ​ການ​ເປັນ​ເຈົ້າພາບ​ທີ່​ດີ ປີທ່ອງ​ທ່ຽວ​ລາວ 2018 ຂອງ​ນະຄອນ​ຫຼວງ​ວຽງ​ຈັນ ແລະ ໃຫ້​ນັກທ່ອງ​ທ່ຽວ​ທີ່​ຈະ​ເດີນທາງ​ມາ​ໃຫ້ເຫັນ​ຈຸດ​ທ່ອງ​ທ່ຽວ​ທີ່​ສຳຄັນ​ຂອງແຕ່​ລະ​ບ້ານ ພ້ອມ​ດຽວ​ກັນ​ນັ້ນ ຍັງ​ໄດ້​ມີ​ການ​ສຳ​ຫຼວດ​ແຫຼ່ງ​ທ່ອງທ່ຽວ​ຕີນ​ພູເຂົາ​ຄວາຍ ແລ້ວ​ຈະໄດ້​ມີ​ການ​ສົ່ງເສີມ​ການທ່ອງທ່ຽວຢູ່​ເຂດ​ດັ່ງກ່າວ​ນີ້​ໃຫ້​ມີ​ຄວາມ​ແຂງແຮງ ແລະ ທັງ​ເປັນ​ການ​ດຶງ​ດູດນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ ສ້າງ​ລາຍ​ຮັບ​ໃຫ້​ປະຊາ​ຊົນ​ໃນ​ທ້ອງຖິ່ນ ແລະ ນະຄອນ​ຫຼວງ​ໃຫ້​ນັບ​ມື້​ນັບ​ເພີ່ມ​ຂຶ້ນ.

ຂ່າວທີ່ກ່ຽວຂ້ອງ