ສັ່ງປິດຫ້ອງກວດພະຍາດເອກະຊົນ ບໍລິການບໍ່ສອດຄ່ອງ

2.175 26 ກ.ພ. 2018 ຂ່າວໜ້າ​ໜຶ່ງ

ປັດຈຸບັນເຫັນວ່າມີຫ້ອງກວດພະຍາດເອກະຊົນ ໄດ້ເກີດຂຶ້ນຈຳນວນຫຼາຍສົມຄວນ ເພື່ອປິ່ນປົວຄົນເຈັບຈາກພະຍາດໂຣກໄພຕ່າງໆ ຫຼາຍແຫ່ງກໍ່ມີການບໍລິການທີ່ດີ ມີໜັງສືອະນຸຍາດເປີດຢ່າງຖືກຕ້ອງ ແລະ ເກັບຄ່າບໍລິການທີ່ເປັນທຳ ແຕ່ກໍ່ມີຫ້ອງກວດພະຍາດຈຳນວນໜຶ່ງ ຍັງເປີດໃຫ້ບໍລິການບໍ່ຖືກຕາມລະບຽບຂອງກະຊວງສາທາລະນະສຸກ ມີການບໍລິການບໍ່ສອດຄ່ອງກັບວິຊາຊີບທີ່ຂໍອະນຸຍາດ ຮ້າຍແຮງໄປກວ່ານັ້ນແມ່ນເອົາລັດເອົາປຽບຄົນເຈັບ ຜູ້ມາໃຊ້ບໍລິການອັນເຮັດໃຫ້ຄົນເຈັບ ທີ່ເຂົ້າປິ່ນປົວຕ້ອງເຈັບກາຍ ແລະ ບໍ່ສະບາຍໃຈຕື່ມອີກ.

ວັນທີ 22 ກຸມພາ 2018 ຢູ່ຫ້ອງການປົກຄອງບ້ານໜອງຈັນ ເມືອງສີສັດຕະນາກ ນະຄອນຫຼວງວຽງຈັນ ກົມປິ່ນປົວ ແລະ ຟື້ນຟູໜ້າທີ່ການ ຮ່ວມກັບພະແນກສາທາລະນະສຸກນະຄອນຫຼວງ ແລະ ພາກສ່ວນກ່ຽວຂ້ອງ ໄດ້ຮ່ວມກັນປຶກສາຫາລື ແລະ ສັງປິດກິດຈະການຂອງຫ້ອງກວດພະຍາດເອກະຊົນ ຄຣີນິກຝຣັ່ງ ດຣ ສະຫງວນ ສຸລິຍະວົງສາ ສືບເນື່ອງຈາກຫ້ອງກວດພະຍາດດັ່ງກ່າວ ໃຫ້ການບໍລິການບໍ່ສອດຄ່ອງ ເກັບຄ່າບໍລິການແພງເກີນຈິງ ຈາກນັ້ນ ເຈົ້າໜ້າທີ່ກ່ຽວຂ້ອງໄດ້ລົງເກັບກຳຂໍ້ມູນແຕ່ຫ້ອງກວດພະຍາດບໍ່ໃຫ້ການຮ່ວມມື ເວົ້າຈາບໍ່ສຸພາບ ແລະ ຂັບໄລ່ເຈົ້າໜ້າທີ່ອອກຈາກຫ້ອງກວດ ເມື່ອເປັນແນວນັ້ນ ພາກສ່ວນກ່ຽວຂ້ອງຈິ່ງປຶກສາຫາລື ແລະ ເຫັນດີປິດກິດຈະການຫ້ອງກວດພະຍາດດັ່ງກ່າວຢ່າງເປັນທາງການ.

ສຳລັບ ຫ້ອງກວດພະຍາດ ຄຣິນິກຝຣັ່ງ ດຣ ສະຫງວນ ສຸລິຍະວົງສາ ດຳເນີນກິດຈະການມາກວ່າ 10 ປີ ໂດຍຫ້ອງກວດພະຍາດແຫ່ງນີ້ ບໍ່ໄດ້ຮັບໃບຢັ້ງຢືນຜູ້ປະກອບວິຊາຊີບປິ່ນປົວ ແລະ ບໍ່ໄດ້ຮັບອະນຸຍາດໃຫ້ດຳເນີນກິດຈະການຫ້ອງກວດພະຍາດເອກະຊົນ ຈາກກະຊວງສາທາລະນະສຸກ ເຊິ່ງໃນປີ 2011 ຫ້ອງກວດພະຍາດແຫ່ງນີ້ ໄດ້ຖືກສັ່ງໃຫ້ປິດກິດຈະການ ແລະ ລັກລອບເປີດອີກໃນປີ 2013 ຄະນະກຳມະການ ແລະ ພາກສ່ວນກ່ຽວຂ້ອງສັ່ງປິດອີກ ແລະ ມາຮອດປີ 2014 ລັກລອບເປີດບໍລິການອີກ ຈົນຮອດເດືອນ 5 ປີ 2017 ຈິ່ງຖືກສັ່ງປິດອີກຄັ້ງ ລວມແລ້ວຫ້ອງກວດພະຍາດດັ່ງກ່າວມີການສັ່ງປິດທັງໝົດ 3 ຄັ້ງ ໃນຕະຫຼອດ 7 ປີຜ່ານມາ.

ຂ່າວທີ່ກ່ຽວຂ້ອງ