ຕັດສິນປະຫານຊີວິດ 2 ຄະດີຄ້າຢາເສບຕິດ

1.340 28 ກ.ພ. 2018 ຂ່າວໜ້າ​ໜຶ່ງ

ຄະນະ​ສານ​ອາຍາ ສານ​ປະຊາຊົນ​ຂັ້ນ​ຕົ້ນ​ແຂວງ​ຫຼວງ​ນ້ຳ​ທາ ໄດ້​ພິຈາລະນາ​ຕັດສິນ​ປະຫານ​ຊີວິດ​ຜູ້​ຖືກ​ຫາຄະດີ​ຄ້າຂາຍ​ຢາ​ເສບ​ຕິດ ຈຳນວນ 2 ເລື່ອງ ໂດຍ​ມີ​ຈຳເລີຍ 2 ຄົນ ໃນ​ວັນ​ທີ 15 ກຸມພາ 2018 ເຊິ່ງ​ທັງ​ສອງ​ຄະດີ ຖືກ​ເຈົ້າ​ໜ້າທີ່​ມ້າງ​ໄດ້​ໃນ​ປີ 2017.

ຄະດີ​ທີ 1 ໃນ​ສຳນວນ​ຄະດີ ເລກ​ທີ 013/​ຂຕອ ຈຳເລີຍ​ຊື່​ທ້າວ ຈຳ​ໂບ້ ອາຍຸ 22 ປີ ສັນຊາດ​ລາວ ອາຊີບ​ເຮັດ​ໄຮ່ ຢູ່​ບ້ານ​ຈ່າ​ຍີ ເມືອງລອງ ແຂວງ​ຫຼວງ​ນ້ຳ​ທາ ມີ​ຄວາມ​ຜິດ​ໃນ​ຖານ​ຄ້າ​ຢາ​ເສບ​ຕິດ ປະເພດ​ຢາ​ບ້າ ທີ່​ເຈົ້າ​ໜ້າທີ່​ຕຳຫຼວດ​ສະກັດ​ຈັບ​ໄດ້​ໃນ​ກາງ​ປີ 2017 ພ້ອມ​ຢາ​ບ້າ ຈຳນວນ 9,4 ກິ​ໂລກ​ຣາມ ດັ່ງນັ້ນ ສານ​ປະຊາຊົນ​ແຂວງ​ຫຼວງ​ນ້ຳ​ທາ ຈຶ່ງ​ໄດ້​ຕັດສິນ​ລົງໂທດ​ປະຫານ​ຊີວິດ ແລະ ຮິບ​ຢາ​ບ້າ ຈຳນວນ​ດັ່ງກ່າວ ​ໄປ​ທຳລາຍ​ຖິ້ມ ຮິບ​ເງິນ​ຈຳນວນ 2.000 ຢວນ ໂທລະສັບ​ມື​ຖື 1 ໜ່ວຍ.

ສ່ວນ​ຄະດີ​ທີ 2 ແມ່ນ​ຄະດີ ເລກ​ທີ 014/​ຂຕອ ຈຳເລີຍ​ຊື່​ທ້າວ ໄໝ່​ບຸນ​ນ້ອຍ ອາຍຸ 58 ປີ ສັນຊາດ​ລາວ ອາຊີບ​ເຮັດ​ນາ ຢູ່​ບ້ານນາ​ໃໝ່ ເມືອງ​ສິງ ແຂວງ​ຫຼວງນ້ຳ​ທາ ຖືກ​ຂໍ້​ຫາ​ຄ້າ​ຢາ​ເສບ​ຕິດ ປະເພດ​ເຮ​ໂຣ​ອິນ ຖືກ​ເຈົ້າ​ໜ້າທີ່ຈັບ​ຕົວ​ໄດ້​ໃນ​ວັນ​ທີ 7 ມິຖຸນາ 2017 ພ້ອມ​ເຮ​ໂຣ​ອິນ ຈຳນວນ 12 ຫໍ່ ລວມ​ນ້ຳໜັກ 4,5 ກິ​ໂລກຣາມ ສະນັ້ນ ຄະນະ​ສານ​ອາຍາ ໄດ້​ພິຈາລະນາ​ຕາມ​ສຳນວນ​ຄະດີ ແລະ ຄຳ​ຮັບ​ສາລະພາບ​ຂອງ​ຈຳເລີຍ ເຫັນ​ຄວນ​ຕັດສິນ​ປະຫານຊີວິດ​ຈຳເລີຍ ພ້ອມ​ທັງ​ຮິບ​ເຮ​ໂຣອິນ ນ້ຳໜັກ 4,5 ກິ​ໂລກ​ຣາມ ໄປທຳລາຍ​ຖິ້ມ ຮິບ​ລົດ​ຕູ້​ສະ​ຕາ​ແລັກ ໝາຍ​ເລກ​ທະບຽນ ​ກກ 1916 ຫຼວງ​ພະ​ບາງ ຈຳນວນ 1 ຄັນ ແລະ ໂທລະສັບ 1 ໜ່ວຍ.

ຂ່າວທີ່ກ່ຽວຂ້ອງ