ETL ຈະຂະຫຍາຍເຄືອຄ່າຍການບໍລິການ 4G ທົ່ວປະເທດ

1.211 28 ກ.ພ. 2018 ຂ່າວໜ້າ​ໜຶ່ງ

ບໍລິສັດ ອີ​ທີ​ແອລ ຈຳກັດ (ETL) ຈັດ​ກອງ​ປະຊຸມ​ປະຈຳ​ປີ 2017 ຂຶ້ນ​ໃນ​ວັນ​ທີ 22 ກຸມພາ 2018 ຜ່ານ​ມາ ທີ່​ສຳນັກງານໃຫຍ່​ບໍລິສັດ ນະຄອນຫຼວງ​ວຽງຈັນ ພາຍ​ໃຕ້​ການ​ເປັນ​ປະທານຂອງ​ທ່ານ ຫວູ ຈຽງ ເຊິງ ຜູ້​ອຳນວຍ​ການ​ໃຫຍ່​ບໍລິສັດ ອີ​ທີ​ແອລ ຈຳກັດ ເປັນ​ກຽດ​ເຂົ້າ​ຮ່ວມ​ຂອງທ່ານ ທັນ​ສະໄໝ ກົມ​ມະ​ສິດ ລັດຖະ​ມົນຕີ​ກະຊວງ​ໄປສະນີ ໂທລະຄົມມະນາຄົມ ແລະ ການ​ສື່ສານ ມີ​ບັນດາ​ຫົວໜ້າ​ກົມ​ຈາກ​ກະຊວງ​ທີ່​ກ່ຽວຂ້ອງ ຜູ້ອຳນວຍການ​ສາຂາ ແລະ ພະນັກງານ​ຂັ້ນ​ນຳ​ຈາກທົ່ວ​ປະເທດ​ເຂົ້າ​ຮ່ວມ.

ທ່ານ ຫວູ ຈຽງ ເຊິງ ໄດ້ກ່າວ​ວ່າ: ໃນ​ປີ 2017 ຜ່ານ​ມາ ETL ມີ​ສະຖານ​ນີ​ໂທລະ​ສັບ​ມື​ຖື​ຫຼາຍ​ກວ່າ 1.400 ສະຖາ​ນີ ສັນຍານ​ໂທລະສັບ​ມື​ຖືຄວບ​ຄຸມ 18 ແຂວງ 148 ເມືອງ 8.500 ກວ່າ​ບ້ານ ປັດ​ຈຸ​ບັດ​ມີ​ລູກ​ຄ້າ​ໂທລະສັບ​ມື​ຖື​ຫຼາຍ​ກວ່າ 9 ແສນ​ລູກ​ຄ້າ ແລະ ລູກ​ຄ້າ​ອິນ​ເຕີເນັດ​ຫຼາຍ​ກວ່າ 8 ພັນ​ລູກ​ຄ້າ ສຳລັບ​ປີ 2018 ບໍລິສັດ ອີ​ທີ​ແອລ ຈະ​ລົງທຶນ 110 ລ້ານ​ໂດ​ລາ​ສະຫະລັດ ຫຼື ປະມານ 900 ຕື້​ກີບ ເພື່ອຂະຫຍາຍ​ເຄືອ​ຄ່າຍ ແລະ ການ​ບໍລິ​ການ​ໂທລະສັບ​ມື​ຖື​ລະບົບ 4G ຈຳນວນ 1.300 ສະຖານີ​ທົ່ວ​ປະເທດ ເພື່ອ​ປັບປຸງ​ຄຸນະພາບ​ການໂທ ແລະ ການ​ນຳ​ໃຊ້​ດາ​ຕ້າ​ຂອງລູກ​ຄ້າ​ໂທລະສັບ​ຂອງ​ຕົນ​ໃຫ້​ສະດວກ ແລະ ດີ​ຂຶ້ນ​ຕາມ​ລຳດັບ ພ້ອມ​ທັງ​ຂະຫຍາຍ​ເຄືອ​ຄ່າຍ​ອິນເຕີ​ເນັດ​ຜ່ານ​ລະບົບ​ສາຍ​ໃຍ​ແກ້ວ ບໍລິສັດ​ໄດ້​ວາງ​ເປົ້າ​ໝາຍ​ຮັກສາລູກ​ຄ້າ​ທີ່​ມີ​ຢູ່ ແລະ ຂະຫຍາຍ​ລູກຄ້າ​ໃໝ່ ເພື່ອ​ບັນລຸ​ເປົ້າ​ໝາຍສ້າງລາຍ​ຮັບ​ໃຫ້​ໄດ້​ຫຼາຍ​ກວ່າ 380 ຕື້​ກີບ ທຽບໃສ່​ປີ 2017 ເພີ່ມ​ຂຶ້ນ 50% ແລະ ມອບ​ພັນທະ​ໃຫ້​ລັດໄດ້​ຢ່າງ​ໜ້ອຍ 78 ຕື້​ກີບ.

ກອງ​ປະຊຸມ​ຄັ້ງ​ນີ້ ແມ່ນ​ເພື່ອຊອກ​ຫາ​ວິທີ​ການ​ພັດທະນາ ໃຫ້ບໍລິການ​ທີ່​ດີ​ແກ່​ລູກ​ຄ້າ​ຂອງ​ບໍ​ລິສັດ ເພື່ອ​ການ​ຂະຫຍາຍ​ຈຳນວນລູກ​ຄ້າ ແລະ ເພື່ອ​ເປັນ​ການ​ບັນລຸເປົ້າ​ໝາຍ​ການ​ເຕີບ​ໂຕ​ດ້ານ​ລາຍໄດ້ ວຽກ​ງານ​ຕົ້ນຕໍ​ແມ່ນ​ການ​ພັດທະ​ນາ​ເປັນ​ບຸລິມະສິດ​ອັນ​ທຳ​ອິດ ທີ່​ຈະ​ບັນລຸ​ເປົ້າ​ໝາຍ​ວຽກ​ງານ​ປີ 2018 ເພື່ອ​ສ້າງ​ຍຸດ​ທະ​ສາດ​ການຕະຫຼາດ​ ໂດຍ​ຖື​ເອົາ​ລູກ​ຄ້າ​ເປັນສູນ​ກາງ ແລະ ເປົ້າ​ໝາຍ​ຕົ້ນຕໍ ເພື່ອ​ພັດທະນາ​ການ​ຄວາມ​ອາດສາມາດ​ໃນ​ການ​ແຂ່ງຂັນ ແລະ ສ້າງ​ຄວາມ​ໄດ້​ປຽບ​ໃນ​ການ​ບໍ​ລິການ ການ​ສ້າງ​ລະບົບ ການ​ກຳນົດ​ຊັບພະຍາກອນ ດ້ວຍ​ການພັດທະນາ​ຕາມ​ຄວາມ​ຕ້ອງການຂອງ​ຕະຫຼາດ ເພື່ອ​ເສີມ​ສ້າງຄວາມ​ສາມາດ​ໃນ​ການ​ດຳເນີນງານ ໃນ​ເວລາ​ດຽວ​ກັນ​ ກໍ່​ສຸມ​ໃສ່ການ​ພັດທະນາ​ເຄືອ​ຄ່າຍ ແລະ ການ​ຄົ້ນ​ຫາ​ຊ່ອງ​ທາງ​ການ​ຂາຍທີ່​ມີ​ຫຼາຍ​ແບບ.

ຂ່າວທີ່ກ່ຽວຂ້ອງ