ສ້າງຄວາມເຂັ້ມແຂງ ວຽກຕ້ານອາຊະຍາກຳຂ້າມຊາດທີ່ມີການຈັດຕັ້ງ

1.054 28 ກ.ພ. 2018 ຂ່າວໜ້າ​ໜຶ່ງ
ສ້າງຄວາມເຂັ້ມແຂງ ວຽກຕ້ານອາຊະຍາກຳຂ້າມຊາດທີ່ມີການຈັດຕັ້ງ

ອາ​ຊະ​ຍາ​ກຳ​ຂ້າມ​ຊາດ​ທີ່​ມີການຈັດຕັ້ງແມ່ນ​ບັນຫາ ແລະ ສິ່ງ​ທ້າ​ທາຍ​ຕໍ່​ພາກສ່ວນ​ກ່ຽວຂ້ອງ ໂດຍ​ສະເພາະ ໜ່ວຍ​ງານການ​ປົກ​ປ້ອງ​ກົດໝາຍ ແລະ ສັ່ງຟ້ອງ​ຜູ້​ກະທຳ​ຜິດ​ຂຶ້ນ​ສານ​ຕັດສິນອາ​ຊະ​ຍາ​ກຳ​ຂ້າມ​ຊາດ​ ທີ່​ມີ​ການຈັດ​ຕັ້ງຍັງ​ເປັນ​ໄພ​ຂົ່ມຂູ່​ຕໍ່​ການປົກຄອງ​ລັດ​ດ້ວຍ​ກົດໝາຍ​ໃນຂອບ​ເຂດ​ທົ່ວ​ໂລກ ເຊິ່ງ​ເຄືອ​ຄ່າຍອາ​ຊະ​ຍາ​ກຳ ໄດ້​ແຜ່​ລາມ​ອອກກວ້າງຂວາງ ແລະ ເປັນ​ໄພ​ອັນຕະ​ລາຍ​ຕໍ່​ທຸກ​ຄົນ​ໃນ​ສັງຄົມ.

ອົງການ​ໄອ​ຍະ​ການ​ປະຊາຊົນສູງ​ສຸດ ໄດ້​ຮັບ​ການ​ສະໜັບ​ສະໜູນ​ຈາກ​ສະ​ຖາ​ບັນ​ຊ່ວຍເຫຼືອທາງ​ດ້ານ​ກົດໝາຍ ແລະ ວິຊາການ ແຫ່ງ​ຣາ​ຊະ​ອານາຈັກລຸກຊຳ​ບວກ (ILSTA) ຈັດ​ກອງ​ປະຊຸມ​ສ້າງ​ຄວາມ​ເຂັ້ມແຂງ ກ່ຽວກັບ​ການ​ຕ້ານ​ອາ​ຊະ​ຍາ​ກຳ​ຂ້າມຊາດ​ທີ່​ມີ​ການຈັດຕັ້ງ ໂດຍ​ສະເພາະແມ່ນ​ບັນຫາ​ຢາ​ເສບ​ຕິດ ແລະ ການ​ຟອກ​ເງິນ ວັນ​ທີ 27-28 ກຸມພາ 2018 ຢູ່​ທີ່​ໂຮງແຮມດອນ​ຈັນ​ພາ​ເລດ ນະຄອນຫຼວງວຽງ​ຈັນ ໂດຍ​ການ​ເປັນ​ປະທານຂອງ​ທ່ານ ບຸນ​ຍັງ ຈັນ​ດາ​ລະ​ສານ ຮອງ​ຫົວໜ້າ​ອົງການ​ໄອ​ຍະ​ການປະຊາຊົນ​ສູງ​ສຸດ ທ່ານ ໂຄຣ ເຈິນ ເຊັນ ອຸປະ​ທູດ​ແຫ່ງ​ຣາ​ຊະ​ອານາຈັກ​ລຸກ​ຊຳ​ບວກ ປະຈຳ​ລາວ ພ້ອມ​ດ້ວຍ​ບັນດາ​ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ​ທັງ​ສູນ​ກາງ-ທ້ອງຖິ່ນ.

ບັນຫາ​ອາ​ຊະ​ຍາ​ກຳ​ຂ້າມ​ຊາດ​ທີ່​ແຜ່​ຫຼາຍ​ໃນ​ປັດຈຸບັນ ​ແມ່ນ​ບັນຫາ​ການ​ຄ້າ-ຂາຍ​ຢາ​ເສບ​ຕິດ​ໃນ ​ສປປ ລາວ ຊຸມ​ປີ 2011-2015 ບັນຫາ​ດັ່ງກ່າວ​ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ຮຸນ​ແຮງ​ຈາກ​ການເຄື່ອນ​ໄຫວ​ພາຍ​ໃນ​ປະເທດ​ ສູ່​ການ​ເປັນ​ອາ​ຊະ​ຍາ​ກຳ​ຂ້າມ​ຊາດ ແລະ ມີ​ການຈັດຕັ້ງ​ເຮັດ​ໃຫ້​ສັງຄົມ​ມີ​ຄວາມ​ບໍ່​ສະຫງົບ​ປອດ​ໄພ ລັດຖະບານ​ລາວ ໄດ້​ອອກ​ກົດໝາຍ​ຫຼາຍ​ສະບັບ ແລະ ມີ​ການປັບປຸງ​ໃຫ້​ກົດໝາຍ​ມີ​ຄວາມ​ສອດຄ່ອງ​ທີ່​ສຸດ ເພື່ອ​ການຈັດຕັ້ງ​ປະຕິບັດ​ທີ່​ຮັບປະກັນ​ໄດ້​ຄຸນະພາບ ສຳລັບ​ປີ 2016 ທົ່ວ​ປະເທດ​ສາມາດມ້າງ​ຄະດີ​ຢາ​ເສບ​ຕິດ ທັງ​ໝົດ 3.814 ເລື່ອງ ຈັບ​ກຸມ​ຜູ້​ຖືກ​ຫາໄດ້ 5.811 ຄົນ ຍິງ 784 ຄົນ ຄົນຕ່າງປະເທດ 127 ຄົນ ຍິງ 18 ຄົນ ຢຶດ​ຢາ​ບ້າ 2.552.699 ກິໂລ ເຮ​ໂລ​ອິນ 190,87 ກິ​ໂລ ຄາເຟ​ອິນ 1.875 ກິ​ໂລ ຝິ່ນ 224.169 ກິ​ໂລ ກັນຊາ 5.047,72 ກິ​ໂລ ຢາ​ໄອສ 130.224 ກິ​ໂລ ໂຄ​ເຄນ 0,01 ກິ​ໂລ ແປ້ງ​ຝຸ່ນ​ເພື່ອ​ປະສົມ​ໃນ​ການ​ຜະລິດ​ຢາ​ເສບ​ຕິດ 5.916,19 ກິ​ໂລ ແລະ ໃນ​ປີ 2017 ສາມາດ​ມ້າງ​ຄະດີ​ຢາ​ເສບ​ຕິດ​ໄດ້ 2.770 ເລື່ອງ ຈັບ​ກຸມ​ຜູ້​ຖືກ​ຫາ​ທັງ​ໝົດ 4.241 ຄົນ ຍິງ 526 ຄົນ ຄົນ​ຕ່າງປະເທດ 100 ຄົນ ຍິງ 18 ຄົນ ຢຶດ​ຢາ​ບ້າ​ໄດ້ 1.203 ກິ​ໂລ ເຮ​ໂລ​ອິນ 162,3 ກິ​ໂລ ຄາ​ເຟ​ອິນ 1.875 ກິ​ໂລ ຢາຝິ່ນ 273,12 ກິ​ໂລ ກັນຊາ 4.847,5 ກິ​ໂລ ແລະ ຢາ​ໄອສ 60,04 ກິ​ໂລ.

ຂ່າວທີ່ກ່ຽວຂ້ອງ