ຂ່າວຫຼ້າສຸດ

ງານຕະຫຼາດນັດໄຊທານີ ມີຜະລິດຕະພັນສິນຄ້າເຂົ້າຮ່ວມ 84 ຫົວໜ່ວຍ

1.502 01 ມີ.ນ. 2018 ຂ່າວໜ້າ​ໜຶ່ງ
ງານຕະຫຼາດນັດໄຊທານີ ມີຜະລິດຕະພັນສິນຄ້າເຂົ້າຮ່ວມ 84 ຫົວໜ່ວຍ

ງານ​ຕະຫຼາດນັດ​ປະຈຳ​ປີ 2018 ຂອງ​ເມືອງ​ໄຊ​ທານີ ນະຄອນ​ຫຼວງ​ວຽງ​ຈັນ ຈັດ​ພິທີ​ເປີດງານ​ຢ່າງ​ເປັນ​ທາງ​ການ ວັນ​ທີ 28 ກຸມພາ 2018 ທີ່​ບ້ານ​ຊ້າງ​ຄູ ໂດຍການ​ເປັນ​ປະທານ​ຂອງ​ທ່ານ ວັນເພັງ ອິນ​ທະ​ວົງ ຮອງ​ເຈົ້າເມືອງໄຊ​ທານີ ມີ​ທ່ານ ເບີ​ລິນ ເພັດ​ຈັນທະ​ຣາດ ຫົວໜ້າ​ພະ​ແນກ​ອຸດ​ສາຫະ​ກຳ ແລະ ການ​ຄ້ານະຄອນຫຼວງ ແຂກ​ຖືກ​ເຊີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ປະສິດ ເທບ​ປະທຸມ ຫົວໜ້າ​ຫ້ອງການ​ອຸດສາຫະກຳ ແລະ ການ​ຄ້າ​ເມືອງ​ໄຊ​ທານີ ກ່າວ​ວ່າ: ເນື່ອງ​ໃນ​ໂອກາດ​ປີທ່ອງ​ທ່ຽວ​ລາວ ທັງ​ເປັນ​ການ​ສ້າງຂະ​ບວນ​ການ​ຕ້ອນຮັບ​ວັນ​ສຳຄັນຂອງ​ພັກ ຂອງ​ຊາດ ແລະ ສົ່ງເສີມ​ການ​ຜະລິດ​ເປັນ​ສິນຄ້າ ຄອບຄົວ​ຕົວ​ແບບ ແລະ ການ​ຜະລິດ​ພາຍ​ໃນ ປະກອບສ່ວນ​ອັນ​ສຳຄັນ​ໃນ​ການ​ພັດທະນາ​ເສດຖະກິດພາຍ​ໃນ​ເມືອງ ໃຫ້​ມີ​ບາດກ້າວອັນ​ໃໝ່ ສະເພາະ​ການ​ຈັດ​ງານປີ​ນີ້ ມີ​ຫົວໜ່ວຍ​ທຸລະ​ກິດ​ທາງດ້ານ​ກະສິກຳ​ທັງ​ໝົດ 25 ຫົວໜ່ວຍ ນອກ​ນັ້ນມີ​ປະເພດ​ພືດ​ຜັກສະອາດ ພືດ​ຜັກ​ກຸ່ມ​ອີນ​ຊີ​ບ້ານໂນນ​ແຕ້ ພິເສດ​ມີ​ຜັກ​ປອດ​ສານພິດ​ຈາກ​ກຸ່ມ​ບ້ານ​ທ່າ​ຊ້າງ ເມືອງປາກ​ງື່ມ ມີ​ໄຂ່​ໄກ່ ຜະລິດ​ຕະ​ພັນຂອງ​ບໍລິສັດ ຊີ​ພີ ແລະ ອື່ນໆ ນອກ​ນີ້ກໍ່​ຍັງ​ມີ​ສິນຄ້າ​ປະເພດ​ອຸດສາ​ຫະ​ກຳ ຫັດຖະກຳ ສິນຄ້າ​ໂອດ໋ອບ​ຕ່າງ​ເມືອງ ຕ່າງ​ແຂວງ ເຂົ້າຮ່ວມ​ງານ​ຄັ້ງ​ນີ້​ທັງ​ໝົດ 84 ຫົວໜ່ວຍ ເຊິ່ງ​ງານ​ຄັ້ງ​ນີ້​ຈະ​ດຳເນີນໄປ​ເຖິງ​ວັນ​ທີ 5 ມີນາ 2018.

ໂອກາດ​ນີ້ ຂໍ​ເຊີນຊວນ​ພໍ່​ແມ່ປະຊາຊົນທັງ​ພາຍ​ໃນ ນວ ແລະ ເຂດ​ໃກ້​ຄຽງ ເຂົ້າ​ຮ່ວມ​ຊົມ ແລະ ເລືອກ​ຊື້​ຜະລິດ​ຕະ​ພັນ​ຂອງ​ພໍ່​ແມ່ປະຊາຊົນ ເພື່ອ​ສົ່ງເສີມ​ການ​ຜະລິດ ລາວ​ເຮັດ ລາວ​ໃຊ້ ສົ່ງເສີມການ​ຜະລິດ​ພາຍ​ໃນ ເພື່ອ​ກ້າວ​ໄປໃນ​ລະດັບ​ສາກົນ ນອກຈາກ​ທ່ານຈະ​ໄດ້​ຊົມ​ຜະລິດ​ຕະ​ພັນຜົນ​ຜະລິດ​ຕ່າງໆ ແລະ ພາຍ​ໃນ​ງານ​ຍັງມີ​ການ​ຄົບງັນ ແລະ ກິດຈະກຳອື່ນໆ​ອີກ​ຫຼາຍ​ຢ່າງ.

ຂ່າວທີ່ກ່ຽວຂ້ອງ