ຄະນະບໍລິຫານງານສູນກາງພັກ ກຳນົດຈຸດສຸມການນຳພາໃນຕໍ່ໜ້າ

157 10 ພ.ພ. 2018 ຂ່າວໜ້າ​ໜຶ່ງ
ຄະນະບໍລິຫານງານສູນກາງພັກ ກຳນົດຈຸດສຸມການນຳພາໃນຕໍ່ໜ້າ

ຄະນະ​ບໍລິຫານ​ງານ​ສູນ​ກາງ​ພັກ ດຳເນີນ​ກອງ​ປະຊຸມ​ຄົບ​ຄະນະ ຄັ້ງ​ທີ 6 ສະໄໝ​ທີ X ຂຶ້ນ​ເປັນ​ທາງ​ການ​ແຕ່​ວັນ​ທີ 2-8 ພຶດສະພາ 2018 ຢູ່​ຫ້ອງ​ວ່າການ​ສູນ​ກາງ​ພັກ ໂດຍ​ເປັນ​ປະທານ​ຂອງ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ ປະຕິວັດ​ລາວ.

ກອງ​ປະຊຸມ​ດັ່ງກ່າວ ໄດ້​ຄົ້ນຄວ້າປຶກສາ​ຫາລື ແລະ ໃຫ້​ທິດ​ຊີ້​ນຳ​ກ່ຽວ​ກັບ​ການ​ຕີ​ລາຄາ​ການຈັດຕັ້ງ​ປະຕິບັດ ​ມະຕິ​ກອງ​ປະຊຸມ​ສູນ​ກາງ ຄັ້ງ​ທີ 5 ສະໄໝ​ທີ X ແລະ ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ໃນ 2 ປີ​ກວ່າ​ຜ່ານ​ມາ ເຊິ່ງ​ດຳເນີນ​ພາຍ​ໃຕ້​ເງື່ອນໄຂ​ສະພາບ​ແວດ​ລ້ອມ​ຂອງ​ພາກ​ພື້ນ ແລະ ສາກົນ ມີ​ການ​ຜັນ​ແປ​ຢ່າງ​ສັບສົນ ມີ​ທັງ​ສິ່ງ​ທ້າ​ທາຍ​ທົດ​ສອບ ແລະ ໂອກາດ​ເອື້ອ​ອຳນວຍ ແຕ່​ດ້ວຍ​ຄວາມ​ບຸກ​ບືນ​ສູ້​ຊົນ ແລະ ຍົກ​ສູງ​ຄວາມ​ຮັບຜິດຊອບ​ການເມືອງ​ຂອງ​ສູນ​ກາງ​ພັກ ລັດຖະບານ ກໍ່​ຄືຄະນະ​ພັກ ອົງການ​ປົກຄອງ​ແຕ່​ລະ​ຂັ້ນ ແລະ ຄວາມ​ເປັນ​ເຈົ້າ​ຂອງ​ປະເທດ​ຊາດ ຄວາມ​ດຸໝັ່ນ​ຂະຫຍັນ​ພຽນ ຄວາມ​ສາມັກຄີ​ປອງ​ດອງ​ເປັນ​ປຶກ​ແຜ່ນ​ຂອງ​ປວງ​ຊົນ​ລາວ​ທັງ​ຊາດ ໄດ້​ເຮັດ​ໃຫ້​ປະເທດ​ຊາດ​ສືບຕໍ່​ມີ​ສະຖຽນ​ລະ​ພາບ​ດ້ານ​ການເມືອງ​ຢ່າງ​ໜັກ​ແໜ້ນ ສັງຄົມ​ມີ​ຄວາມ​ສະຫງົບ ແລະ ເປັນ​ລະບຽບ​ຮຽບ​ຮ້ອຍ​ໂດຍ​ພື້ນຖານ ເສດຖະກິດ-ສັງຄົມ​ສືບຕໍ່​ຂະຫຍາຍຕົວ​ຕໍ່​ເນື່ອງ ສະເລ່ຍ 6,9% ຕໍ່​ປີ ລວມ​ຍອດຜະລິດ​ຕະ​ພັນ​ພາຍ​ໃນ​ສະເລ່ຍ​ຕໍ່​ຫົວ​ຄົນ ມາ​ຮອດ​ຕົ້ນ​ປີ 2018 ບັນລຸ 2.472 ໂດ​ລາ​ສະຫະລັດ ຫຼື ປະມານ 20,57 ລ້ານ​ກີບ ການ​ຜະລິດ ການ​ປຸງ​ແຕ່ງ​ເປັນ​ສິນຄ້າ ໂດຍ​ສະເພາະ ທຸລະ​ກິດ​ຂະໜາດ​ນ້ອຍ-ກາງ ໄດ້​ມີ​ປັດ​ໄຈ​ໃໝ່ ແລະ ເຕີບ​ໃຫຍ່​ຂະຫຍາຍຕົວ ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ປັບປຸງ​ດີ​ຂຶ້ນ ລະບົບ​ການເມືອງ​ນັບ​ທັງ​ກົງຈັກ​ການຈັດຕັ້ງຂອງ​ພັກ-ລັດ ແລະ ອົງການຈັດ​ຕັ້ງ​ມະຫາຊົນ ໄດ້​ຮັບ​ການ​ປັບປຸງ​ມີ​ຄວາມ​ໜັກ​ແໜ້ນ ເຂັ້ມແຂງ ບົນ​ພື້ນຖານ​ກົດໝາຍ ແລະ ລະບຽບ​ການ​ກ່ຽວຂ້ອງ ເຮັດ​ໃຫ້ການ​ຄຸ້ມ​ຄອງ​ບໍລິຫານ​ລັດ​ຫັນ​ເຂົ້າ​ສູ່​ກົດໝາຍ​ຢ່າງ​ໜັກ​ແໜ້ນ ແລະ ມີ​ປະ​ສິດທິ​ຜົນ​ສູງ ຕິດ​ພັນ​ກັບ​ການ​ດຳເນີນ​ຊີວິດ​ການເມືອງ ປັບປຸງ​ປົວແປງ​ພັກ​ຢ່າງ​ເລິກເຊິ່ງ ເພື່ອ​ແກ້​ໄຂ ແລະ ກຳຈັດ​ປາກົດການ​ຫຍໍ້ທໍ້​ໃນ​ກົງຈັກ ແລະ ຖັນ​ແຖວ​ພະນັກງານ​ແຕ່​ລະ​ຂັ້ນ ໂດຍ​ສະເພາະ ພະຍາດ​ອາດຍາ​ສິດ ສໍ້​ລາດ​ບັງ​ຫຼວງ ພ້ອມ​ນີ້ ການ​ພົວພັນ​ຮ່ວມ​ມື​ກັບ​ບັນດາ​ປະເທດ​ເພື່ອນ​ມິດສາ​ກົນ ກໍ່​ຄືການເຄື່ອນໄຫວ​ວຽກ​ງານ​ຕ່າງປະເທດ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ສືບຕໍ່​ໄດ້​ຮັບ​ການ​ເສີມ​ຂະຫຍາຍ​ເຂົ້າ​ສູ່​ລວງ​ເລິກ ແລະ ໄດ້​ຮັບ​ການ​ສະໜັບສະໜູນ​ຊ່ວຍເຫຼືອ​ເຊິ່ງ​ກັນ ແລະ ກັນ​ຢ່າງ​ຕໍ່​ເນື່ອງ ບົດບາດ​ຂອງ​ພັກ-ລັດ ໄດ້​ຮັບ​ການ​ເຊີດ​ຊູ​ສູງ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ແລະ ສາກົນ ເຊິ່ງ​ໄດ້​ສ້າງ​ພື້ນຖານ​ອັນ​ໜັກ​ແໜ້ນ ​ໃຫ້​ແກ່​ການຈັດຕັ້ງ​ປະຕິບັດ​ຄາດໝາຍ​ສູ້​ຊົນ ທີ່​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ​ວາງ​ອອກ​ໃຫ້​ມີ​ຜົນສຳເລັດ ໂດຍ​ສະ​ເພະ ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ ແລະ ນຳພາ​ປະເທດ​ຊາດ​ຫຼຸດ​ພົ້ນ​ອອກ​ຈາກ​ສະຖານະ​ພາບ​ດ້ອຍ​ພັດທະນາ​ໃນ​ຊຸມ​ປີ​ຕໍ່ໜ້າ.

ກອງ​ປະຊຸມ​ຄັ້ງ​ນີ້ ຍັງ​ໄດ້​ປຶກສາ​ຫາລື ແລະ ກຳນົດ​ໜ້າທີ່​ຈຸດ​ສຸມ​ສຳລັບ​ການ​ຊີ້​ນຳ-ນຳພາ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ໄລຍະ​ນີ້​ຮອດໆ​ໝົດ​ສະໄໝ​ທີ X ແລະ ແຕ່​ນີ້​ຮອດ​ໝົດ​ປີ 2018 ໂດຍ​ເລັ່ງ​ໃສ່​ບັນຫາ​ສຳຄັນ ຄື: ສືບຕໍ່​ຮັບປະກັນ​ສະຖຽນ​ລະ​ພາບ​ດ້ານ​ການເມືອງ ແລະ ຄວາມ​ໝັ້ນຄົງ​ຢ່າງ​ໜັກ​ແໜ້ນ ສັງຄົມ​ສືບຕໍ່​ເສີມ​ຂະຫຍາຍ​ຄວາມ​ສາມັກຄີ​ປອງ​ດອງ ມີ​ຄວາມ​ສະຫງົບ ແລະ ເປັນ​ລະບຽບ​ຮຽບ​ຮ້ອຍ ສ້າງ​ການ​ຫັນປ່ຽນ​ຢ່າງ​ຕໍ່​ເນື່ອງ ເລິກເຊິ່ງ ແລະ ຮອບດ້ານ ເນື້ອ​ໃນ ແລະ ແບບແຜນ​ນຳພາ​ຂອງ​ສູນ​ກາງ ກໍ່​ຄືຂອງ​ຄະນະ​ພັກ​ທຸກ​ຂັ້ນ ຕິດ​ພັນ​ກັບ​ການ​ເສີມ​ຂະຫຍາຍ​ຜົນ​ສຳເລັດຂອງ​ການ​ດຳເນີນ​ຊີວິດ​ການເມືອງ ປັບປຸງ​ປົວແປງ​ພັກ ສ້າງ​ພັກ​ປອດ​ໃສ ເຂັ້ມແຂງ ແລະ ໜັກ​ແໜ້ນ ເປັນ​ຮູບ​ປະ​ທຳ ຕໍ່​ເນື່ອງ ແລະ ເປັນ​ລະບົບ​ແຕ່​ສູນ​ກາງ​ຮອດ​ຮາກ​ຖານ ສູ້​ຊົນ​ແກ້​ໄຂ​ຄວາມທຸກ​ຍາກ​ດ້ານ​ການ​ເງິນ-ງົບປະມານ ດ້ວຍ​ບັນດາ​ມາດ​ຕະການ​ໄລຍະ​ສັ້ນ ແລະ ໄລຍະ​ຍາວ ສ້າງ​ບັນດາ​ປັດ​ໄຈ​ຕົວ​ຈິງ ເພື່ອ​ຄ້ຳປະກັນ​ການ​ປັບປຸງ​ເສດຖະກິດ​ມະຫາ​ພາກ​ໃຫ້​ເຂັ້ມແຂງ ສ້າງ​ຄວາມ​ສາມາດ​ໃໝ່​ຂອງ​ພື້ນຖານ​ການ​ຜະລິດ ແລະ ການ​ບໍລິການ ຮັບປະກັນ​ຄວາມ​ຍືນ​ຍົງ​ໃນ​ການ​ພັດທະນາ​ເສດຖະກິດ-ສັງຄົມ ນຳພາ​ປະເທດ​ຊາດ ອອກ​ຈາກ​ສະຖານະ​ພາບ​ດ້ອຍ​ພັດທະນາ ຕາມ​ຄາດໝາຍ​ທີ່​ວາງ​ອອກ ຍົກ​ສູງ​ປະ​ສິດທິ​ຜົນ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງຄົມ​ດ້ວຍ​ກົດໝາຍ ຕິດ​ພັນ​ກັບ​ການ​ເຮັດ​ໃຫ້​ກົງຈັກ​ລັດ​ແຕ່​ລະ​ຂັ້ນ​ກະທັດ​ຮັດ ເຂັ້ມແຂງ ຫຼຸດ​ຂັ້ນ-ຂອດ​ບໍລິຫານ ເຄື່ອນ​ໄຫວ​ເປັນ​ລະບົບ ໂປ່ງ​ໃສ ວ່ອງໄວ ແລະ ມີ​ມາດ​ຕະການ​ຕົວ​ຈິງ​ແກ້​ໄຂ​ການ​ລະເມີດ ການ​ສວຍ​ໃຊ້​ສິດ​ອຳນາດ​ບໍ່​ຖືກຕ້ອງ​ຂອງ​ເຈົ້າ​ໜ້າທີ່​ຢ່າງ​ເດັດຂາດ ສືບຕໍ່​ບຸກ​ທະລຸ​ຢ່າງ​ແຂງແຮງຕໍ່​ເນື່ອງ ການ​ທູດ​ປ້ອງ​ກັນ​ເຫດ​ກັບ​ການ​ສະແຫວງຫາ​ໂອກາດ​ໃໝ່ໆ ເພື່ອ​ຍາດ​ແຍ່ງ​ການ​ສະໜັບສະໜູນ​ດ້ານ​ການເມືອງ ດຶງ​ດູດ​ການ​ລົງທຶນ ແລະ ເປີດ​ກວ້າງ​ການ​ຮ່ວມ​ມື​ຊ່ວຍເຫຼືອ​ຈາກ​ສາກົນ.

ກອງ​ປະຊຸມ​ຄັ້ງ​ນີ້ ຍັງ​ໄດ້​ຄົ້ນຄວ້າ​ປຶກສາ​ຫາລື​ຢ່າງ​ກວ້າງຂວາງ ເລິກເຊິ່ງ ແລະ ຮັບຮອງ​ເອົາ​ມະຕິ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ວ່າ​ດ້ວຍ​ການ​ຍົກ​ສູງ​ປະ​ສິດທິ​ຜົນ ການ​ຄຸ້ມ​ຄອງ​ລັດ ຄຸ້ມ​ຄອງ​ສັງຄົມ​ດ້ວຍ​ກົດໝາຍ ໂດຍ​ໃຫ້​ທິດ​ຊີ້​ນຳ​ວ່າ ບັນຫາ​ດັ່ງກ່າວ ເປັນ​ບັນຫາ​ພື້ນຖານ​ສຳຄັນ​ຂອງ​ການ​ສ້າງ​ລັດ​ປະຊາທິປະໄຕ​ປະຊາຊົນ ທີ່​ປົກຄອງ​ດ້ວຍ​ກົດໝາຍ ພາຍ​ໃຕ້​ການ​ຊີ້​ນຳ-ນຳພາ​ຂອງ​ພັກ ທັງ​ແມ່ນ​ຄວາມ​ຈຳເປັນ​ພາວະ​ວິໄສ​ແຫ່ງ​ການ​ສ້າງ​ປະຖົມ​ປັດ​ໄຈ​ໃຫ້​ແກ່​ການ​ສືບຕໍ່​ສ້າງ ແລະ ເສີມ​ຂະຫຍາຍ​ລະບອບ​ປະຊາທິປະໄຕ ປະຊາຊົນ​ສູ່​ຈຸດໝາຍ​ສັງຄົມ​ນິຍົມ ກອງ​ປະຊຸມ​ໄດ້​ຊີ້​ແຈງ​ວ່າ ນັບ​ແຕ່​ເລີ່ມ​ການ​ປ່ຽນແປງ​ໃໝ່​ເປັນຕົ້ນ​ມາ ພັກ​ໄດ້​ນຳພາ​ຫັນ​ການ​ຄຸ້ມ​ຄອງ​ຕາມ​ກົນ​ໄກ​ຄຸ້ມ​ຄອງ​ລວມ​ສູນ​ອາດຍາ​ສິດ ບໍລິຫານ​ເກື້ອກູນ ໄປ​ສູ່​ການ​ຄຸ້ມ​ຄອງ​ລັດ ຄຸ້ມ​ຄອງ​ເສດຖະກິດ-ສັງຄົມ​ດ້ວຍ​ກົດໝາຍ ​ເຮັດ​ໃຫ້ການ​ບໍລິຫານ-ຄຸ້ມ​ຄອງ​ລັດ​ມີ​ປະ​ສິດທິ​ຜົນ​ສູງ ຫັນ​ການເຄື່ອນ​ໄຫວ​ຊີວິດ​ສັງຄົມ ເຂົ້າ​ສູ່​ລະບອບ​ລະບຽບ​ການ​ຂອງ​ກົດໝາຍ​ເປັນ​ກ້າວໆ ພ້ອມ​ນີ້ ກອງ​ປະຊຸມ​ຍັງ​ເປັນ​ເອກະ​ພາບ​ໃຫ້​ສືບຕໍ່​ບຸກ​ທະ​ລຸກ​ຢ່າງ​ແຂງແຮງ ເພື່ອ​ຜ່າ​ມ້າງ​ສິ່ງ​ກີດຂວາງ ແລະ ເປັນ​ອຸປະສັກ​ໃນ​ການ​ບໍລິຫານ-ຄຸ້ມ​ຄອງ​ລັດ ກໍ່​ຄືການ​ຄຸ້ມ​ຄອງ​ສັງຄົມ​ດ້ວຍ​ກົດໝາຍ ເພື່ອ​ແກ້​ໄຂ​ປາກົດການ​ຫຍໍ້ທໍ້ ການ​ລະເມີດ​ກົດໝາຍ​ຢູ່​ໃນ​ກົງຈັກ​ການຈັດຕັ້ງ​ຂອງ​ພັກ-ລັດ ແລະ ໃນ​ສັງຄົມ ເພີ່ມ​ທະວີ​ຄວາມ​ສັກສິດ​ຂອງ​ກົດໝາຍ ເພີ່ມ​ທະວີ​ນິຕິ​ກຳ​ໃນ​ການ​ປົກຄອງ ແລະ ປະ​ສິດທິ​ຜົນ​ການ​ບໍລິຫານ​ລັດ ແນໃສ່​ເພີ່ມ​ຄວາມ​ເຊື່ອ​ໝັ້ນ​ຂອງ​ປະຊາຊົນ​ຕໍ່​ການ​ນຳພາ​ຂອງ​ພັກ ແລະ ການ​ຄຸ້ມ​ຄອງ​ລັດ ກໍ່​ຄື​ເພີ່ມ​ຄວາມ​ເຊື່ອ​ໝັ້ນ​ໃຫ້​ແກ່​ການ​ລົງທຶນ​ຂອງ​ຕ່າງປະເທດ.

ຂ່າວທີ່ກ່ຽວຂ້ອງ