ຂ່າວຫຼ້າສຸດ

ສາທາລະນະສຸກ ເລັ່ງຄວບຄຸມການຫຼຸລູກທີ່ບໍ່ປອດໄພ

320 10 ພ.ພ. 2018 ຂ່າວໜ້າ​ໜຶ່ງ
ສາທາລະນະສຸກ ເລັ່ງຄວບຄຸມການຫຼຸລູກທີ່ບໍ່ປອດໄພ

ເພື່ອ​ເປັນ​ການ​ສ້າງ​ຄວາມ​ເຂັ້ມແຂງ​ ໃນ​ການ​ບໍລິການ​ວຽກ​ງານ​ປ້ອງ​ກັນ​ການ​ຫຼຸ​ລູກ​ທີ່​ບໍ່​ປອດ​ໄພ ໃນ​ພາກ​ລັດ​ໃຫ້​ມີ​ຄຸນະພາບ ແລະ ບັນລຸ​ເປົ້າ​ໝາຍ ໃນ​ການ​ຫຼຸດຜ່ອນ​ອັດຕາ​ການ​ຕາຍ​ຂອງ​ແມ່ ແລະ ເດັກ ຈາກ​ການ​ຫຼຸ​ລູກ​ທີ່​ບໍ່​ປອດ​ໄພ​ກະຊວງ​ສາທາລະນະ​ສຸກ ຈຶ່ງ​ໄດ້​ຈັດ​ກອງ​ປະຊຸມ​ຮ່ວມ​ກັບ​ຄູ່​ຮ່ວມ​ງານ​ພາຍ​ໃນ​ກະຊວງ​ສາທາລະນະ​ສຸກ ແລະ ອົງການ​ສາກົນ​ຕ່າງໆ ເພື່ອ​ປຶກສາ​ຫາລື​ວຽກ​ງານ​ປ້ອງ​ກັນ​ການ​ຫຼຸ​ລູກ​ທີ່​ບໍ່​ປອດ​ໄພ ດ້ວຍ​ການ​ນຳ​ໃຊ້​ຢາ ຂຶ້ນ​ໃນ​ວັນ​ທີ 3 ພຶດສະພາ 2018 ທີ່​ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ ພາຍ​ໃຕ້​ການ​ສະໜັບສະໜູນ​ຂອງ​ອົງການ PSI ລາວ ແລະ ເປັນ​ປະທານ​ຂອງ​ທ່ານ ບຸນ​ໜັກ ໄຊຊະນະ​ສົງຄາມ ຫົວໜ້າ​ກົມ​ປິ່ນປົວ ແລະ ຟື້ນ​ຟູ​ໜ້າທີ່​ການ ກະຊວງ​ສາທາລະນະ​ສຸກ.

ກອງ​ປະຊຸມ​ຄັ້ງ​ນີ້ ໄດ້​ຕີ​ລາຄາ​ສູງ​ກ່ຽວ​ກັບ​ການ​ປະສານ​ງານ​ໃນ​ການ​ປະຕິບັດ​ວຽກ​ງານ ເພື່ອ​ບັນລຸ​ເປົ້າ​ໝາຍ​ແຜນ​ຍຸດ​ທະ​ສາດ​ແຫ່ງ​ຊາດ​ສຸຂະພາບ​ຈະເລີນ​ພັນ​ແມ່ ແລະ ເດັກ ທີ່​ກະຊວງ​ສາທາລະນະ​ສຸກ​ໄດ້​ວາງ​ອອກ ໂດຍ​ສະເພາະ ຈຸດປະສົງ​ຍຸດ​ທະ​ສາດ​ແຫ່ງ​ຊາດ ແມ່ ແລະ ເດັກ ທີ 3 (SO3) ທີ່​ມີ​ເປົ້າ​ໝາຍ​ໃນ​ການ​ຫຼຸດຜ່ອນ​ອັດຕາ​ການ​ຕາຍ​ຂອງ​ແມ່ ແລະ ເດັກ​ລົງ ເຊິ່ງ​ບັນຫາ​ດັ່ງກ່າວ​ແມ່ນ​ມີ​ຄວາມ​ສຳຄັນ​ຫຼາຍ ໃນ​ການ​ພັດທະນາ​ຊັບພະຍາກອນ​ມະນຸດ​ພື້ນຖານ​ຂອງ​ສັງຄົມ ໂດຍ​ສະເພາະແມ່ນ​ແມ່ຍິງ ແລະ ເດັກນ້ອຍ ດັ່ງ​ຕົວຢ່າງ​ກໍລະນີ​ສຶກ​ສາ​ຕໍ່​ໄປ​ນີ້: “ແມ່​ຕາຍ​ຍ້ອນ​ຊຶມ​ເຊື້ອ​ຫຼັງ​ຫຼຸ​ລູກ” ແມ່ຍິງ ອາຍຸ 21 ປີ ຖືພາ​ລູກ​ຜູ້​ທີ 2 ຖືພາ​ຄັ້ງ​ນີ້ ເປັນ​ຄັ້ງ​ທີ 3 ອາຍຸ​ຖືພາ 2 ເດືອນ ການ​ຖືພາ​ຄັ້ງ​ນີ້ ແມ່ນ​ການ​ຖືພາ​ທີ່​ບໍ່​ຕ້ອງການ ເນື່ອງ​ຈາກ​ຫາກໍ່​ຜ່າຕັດ​ເກີດ​ໄດ້ 7 ເດືອນ ແລະ ຜູ້ກ່ຽວ​ໄດ້​ໄປ​ຊື້​ຢາ​ມາ​ກິນ​ເອງ ແລະ ເຮັດ​ໃຫ້​ມີ​ເລືອດ​ອອກ ຈາກ​ນັ້ນ ລາວ​ໄດ້​ໄປ​ຂູດ​ອອກ​ນຳ​ແພດ​ຄົນ​ໜຶ່ງ​ທີ່​ບໍ່​ໄດ້​ຮັບ​ອະນຸຍາດ ແລະ ບອກ​ໃຫ້​ລາວ​ກັບ​ບ້ານ​ພັກຜ່ອນ ໃນ​ເວລາ​ນັ້ນ​ລາວ​ຮູ້ສຶກ​ເຈັບທ້ອງ ແລະ ມີ​ເລືອດ​ອອກ​ຈຶ່ງ​ກັບ​ມາ​ສຸກສາລາ ແພດ​ສຸກສາລາ​ບໍ່​ສາມາດ​ປິ່ນປົວ​ໄດ້ ຈຶ່ງ​ບອກ​ລາວ​ໄປ​ໂຮງໝໍ​ສູນ​ກາງ ເມື່ອ​ມາ​ໂຮງໝໍ​ສູນ​ກາງ​ໄດ້​ເອົາ​ເຂົ້າ​ນອນ​ຕິດຕາມ​ສອງ​ວັນ ແລະ ໂຮງໝໍ​ດັ່ງກ່າວ​ບໍ່​ສາມາດ​ປິ່ນປົວ​ໄດ້ ຈຶ່ງ​ນຳ​ສົ່ງຕໍ່​ຫາ​ໂຮງໝໍ​ສູນ​ກາງ​ອີກ​ແຫ່ງ​ໜຶ່ງ ເມື່ອ​ຮອດ​ໂຮງໝໍ ແພດ​ໄດ້​ຜ່າຕັດ ແລະ ພົບ​ວ່າ​ມົດ​ລູກຊອດ ມີ​ການ​ຊຶມ​ເຊື້ອ ແລະ ໃຫ້ການ​ປິ່ນປົວ​ຕໍ່​ໄປ ແຕ່​ອາການ​ຜູ້ກ່ຽວ​ບໍ່​ດີ​ຂຶ້ນ ແລະ ລາວ​ໄດ້​ເສຍ​ຊີວິດ​ໃນ​ເວລາ​ຕໍ່​ມາ ນີ້​ເປັນ​ພຽງ​ສ່ວນ​ໜຶ່ງ​ໃນ​ຫຼາຍ​ກໍລະນີ​ເທົ່າ​ນັ້ນ ດ້ວຍ​ເຫດ​ນີ້ ກອງ​ປະຊຸມ​ຈຶ່ງ​ໄດ້​ຕົກລົງ​ເຫັນ​ດີ ສ້າງ​ຄວາມ​ເຂັ້ມແຂງ​ໃຫ້ການ​ບໍລິການ​ຂອງ​ພາກ​ລັດ ດ້ວຍ​ການ​ນຳ​ໃຊ້​ຢາ​ທີ່​ມີ​ຄຸນະພາບ ເພື່ອ​ປ້ອງ​ກັນ​ການ​ຫຼຸ​ລູກ​ທີ່​ບໍ່​ປອດ​ໄພ ວ່ອງໄວ​ໃນ​ການ​ກອບ​ກູ້​ຊີວິດ​ແມ່ຍິງ ແລະ ຮັບ​ປະກັນ​ໃຫ້​ແມ່ຍິງ​ລາວ​ເຂົ້າ​ເຖິງ​ການ​ບໍລິການ​ທີ່​ໄດ້​ຄຸນະພາບ​ທີ່​ສຸດ.

ຂ່າວທີ່ກ່ຽວຂ້ອງ