ໂຄງການເຂື່ອນໄຟຟ້ານ້ຳໄຜ່ ແລະ ນ້ຳມັງ 1 ເປີດຂາຍໄຟຢ່າງເປັນທາງການແລ້ວ

146 10 ພ.ພ. 2018 ຂ່າວໜ້າ​ໜຶ່ງ
ໂຄງການເຂື່ອນໄຟຟ້ານ້ຳໄຜ່ ແລະ ນ້ຳມັງ 1 ເປີດຂາຍໄຟຢ່າງເປັນທາງການແລ້ວ

ໂຄງການ​ເຂື່ອນ​ໄຟຟ້າ​ນ້ຳ​ໄຜ່ ຕັ້ງ​ຢູ່​ເມືອງ​ລ້ອງ​ແຈ້ງ ແຂວງ​ໄຊ​ສົມບູນ ມີ​ກຳລັງ​ຕິດ​ຕັ້ງ 86 ເມ​ກາ​ວັດ ຜະລິດ​ພະລັງງານໄດ້ 429,5 ຈີ​ກາ​ວັດ​ໂມງ​ຕໍ່​ປີ ມູນ​ຄ່າ​ການ​ລົງທຶນ 1.744 ຕື້​ກີບ ຫຼື ເທົ່າ​ກັບ 218 ລ້ານ​ໂດ​ລາ​ສະຫະ​ລັດ ໃນ​ນີ້ ລັດຖະບານ​ລາວ (ລັດ​ວິ​ສາ​ຫະ​ກິດ​ໄຟຟ້າ​ລາວ) ຖື​ຮຸ້ນ 15% ກຸ່ມ​ບໍລິສັດ NORINCO ​ສປ.ຈີນ ຖື​ຮຸ້ນ 85% ໂຄງການ​ນີ້ ເລີ່ມ​ກໍ່ສ້າງ​ເດືອນ​ຕຸລາ 2014 ແລະ ສຳເລັດ ແລະ ເປີດ​ຂາຍ​ໄຟ​ເປັນ​ທາງ​ການ​ວັນ​ທີ 22 ມັງກອນ 2018 (ຊົມໃຊ້​ພາຍ​ໃນ 100%) ໃນ​ນີ້ ລາຍ​ຮັບ​ໂດຍ​ກົງ​ຂອງ​ລັດຖະບານ​ຕະຫຼອດ​ອາຍຸ​ສຳ​ປະທານ 25 ປີ 840 ຕື້​ກີບ ນອກ​ນີ້ຍັງ​ຈະ​ໄດ້​ຮັບ​ຜົນ​ປະໂຫຍດ​ທາງ​ອ້ອມ​ອື່ນໆ​ອີກ.

ສຳລັບ​ໂຄງການ​ເຂື່ອນ​ໄຟຟ້າ​ນ້ຳ​ມັງ 1 ຕັ້ງ​ຢູ່​ເມືອງ​ທ່າ​ພະ​ບາດ​ແຂວງ​ບໍ​ລິ​ຄຳ​ໄຊ ແລະ ອ່າງເກັບນ້ຳ​ກວມ​ເອົາ​ເມືອງ​ຮົ່ມ ແຂວງ​ໄຊ​ສົມບູນ ມີ​ກຳລັງ​ຕິດ​ຕັ້ງ 64 ເມ​ກາ​ວັດ ຜະລິດ​ພະລັງງານ​ໄດ້ 224,8 ຈີ​ກາ​ວັດ​ໂມງ​ຕໍ່​ປີ ມູນ​ຄ່າ​ການ​ລົງທຶນ 94,99 ລ້ານ​ໂດ​ລາ​ສະຫະລັດ ຫຼື ປະມານ 759,92 ຕື້​ກີບ ໃນ​ນີ້ ບໍລິສັດ Dongfang ຖື​ຮຸ້ນ 75% ບໍລິສັດ A&C (Far East) Industrial ຖື​ຮຸ້ນ 10,75% ລັດຖະບານ​ລາວ ຖື​ຮຸ້ນ 10% ແລະ ບໍລິສັດ Saitha Construction 4,25% ເລີ່ມ​ກໍ່ສ້າງ​ຕົ້ນ​ປີ 2013 ແລະ ສຳເລັດ ແລະ ເປີດ​ຂາຍ​ໄຟ​ເປັນ​ທາງ​ການ ວັນ​ທີ 1 ມັງກອນ 2017 (ຊົມໃຊ້​ພາຍ​ໃນ 100%) ໃນ​ນີ້ ລາຍ​ຮັບ​ໂດຍ​ກົງ​ຂອງ​ລັດຖະບານ​ຕະຫຼອດອາຍຸ​ສຳ​ປະທານ 25 ປີ ໃນ​ນີ້​ຄ່າພາກ​ຫຼວງ 29,28 ຕື້ກີບ ຫຼື ປະມານ 3,66 ລ້ານໂດລາສະຫະລັດ ງົບປະມານ​ພັດທະນາ​ຊຸມ​ຊົນ 45.000 ໂດ​ລາ​ສະຫະລັດ ຫຼື ປະມານ 360 ລ້ານ​ກີບ​ຕໍ່​ປີ ກອງ​ທຶນ​ສິ່ງແວດລ້ອມ 15.000 ໂດ​ລາ​ສະຫະລັດ ຫຼື ປະມານ 120 ລ້ານ​ກີບ​ຕໍ່​ປີ ແລະ ງົບປະມານ​ຄຸ້ມ​ຄອງ​ອ່າງ​ໂຕ່ງ 70.000 ໂດ​ລາ​ສະຫະລັດ ຫຼື ປະມານ 560 ລ້ານ​ກີບ​ຕໍ່​ປີ ສ່ວນ​ອາກອນ​ແຮງ​ງານ​ແມ່ນ​ປະຕິບັດ​ຕາມ​ກົດໝາຍ.

ກອງ​ປະຊຸມ​ດັ່ງກ່າວ ໄດ້​ຈັດ​ຂຶ້ນ​ວັນ​ທີ 9 ພຶດສະພາ 2018 ຢູ່​ໂຮງແຮມ​ວຽງ​ຈັນ​ພລາ​ຊາ ໂດຍ​ເປັນ​ປະທານ​ຂອງ​ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ປະທານ​ຄະນະ​ກຳມະການ​ຊີ້​ນຳ​ຮ່ວມ​ໂຄງການ​ເຂື່ອນ​ໄຟຟ້າ ມີ​ບັນດາ​ສະມາຊິກ​ຄະນະ​ກຳມະການ​ຊີ້​ນຳຮ່ວມ ​ໂຄງການ​ເຂື່ອນ​ໄຟຟ້າທີ່​ມາ​ຈາກ​ຂະແໜງການ​ກ່ຽວຂ້ອງ​ ທັງ​ສູນ​ກາງ ແລະ ທ້ອງຖິ່ນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ