ສຳນັກຂ່າວສານປະເທດລາວ ສະຫຼອງຄົບຮອບ 50 ປີ

225 10 ພ.ພ. 2018 ຂ່າວໜ້າ​ໜຶ່ງ
ສຳນັກຂ່າວສານປະເທດລາວ ສະຫຼອງຄົບຮອບ 50 ປີ

ພິທີ​ສະເຫຼີມສະຫຼອງ ​ວັນ​ສ້າງຕັ້ງ​ສຳນັກ​ຂ່າວສານ​ປະເທດ​ລາວ ຄົບຮອບ 50 ປີ (6/1/1968-6/1/2018) ຈັດ​ຂຶ້ນ​ວັນ​ທີ 9 ພຶດສະພາ 2018 ທີ່​ສຳນັກ​ຂ່າວສານ​ດັ່ງກ່າວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນດາ​ລັດຖະມົນຕີ ພະນັກງານ-ລັດຖະກອນ​ສຳນັກ​ຂ່າວສານ​ປະເທດ​ລາວ ແລະ ແຂກ​ຖືກ​ເຊີນ​ເຂົ້າ​ຮ່ວມ​ເປັນ​ຈຳນວນ​ຫຼວງຫຼາຍ.

ໂອກາດ​ນີ້ ທ່ານ ສູນ​ທອນ ຄັນທະ​ວົງ ອຳນວຍ​ການ​ໃຫຍ່​ສຳນັກ​ຂ່າວສານ​ປະເທດ​ລາວ ໄດ້​ຍົກ​ໃຫ້​ເຫັນ​ມູນເຊື້ອ​ແຫ່ງ​ການ​ເຕີບ​ໃຫຍ່​ຂະຫຍາຍຕົວ​ຂອງ​ຂ່າວສານ​ປະເທດ​ລາວ ຕະຫຼອດ​ໄລຍະ 5 ທົດ​ສະ​ວັດ​ຜ່ານ​ມາ ທີ່​ຕິດ​ພັນ​ຢ່າງ​ສະໜິດ​ແໜ້ນ​ກັບ​ພາລະກິດ​ປະຕິວັດ​ໃນ​ແຕ່​ລະ​ໄລຍະ ແລະ ມູນເຊື້ອ​ແຫ່ງ​ນ້ຳໃຈ​ຕໍ່ສູ້​ອັນ​ເດັດດ່ຽວ ບຸກ​ບືນ​ຜ່ານ​ຜ່າ​ຄວາມ​ຫຍຸ້ງຍາກ​ນາໆ​ປະການ​ຂອງ​ປະຊາຊົນ​ລາວ​ບັນດາເຜົ່າ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ ປະຕິວັດ​ລາວ ເຊິ່ງ​ກ່ອນ​ໜ້າ​ນີ້ 50 ປີ ເຖິງ​ຈະ​ມີ​ຄວາມ​ຫຍຸ້ງຍາກ​ປານໃດ​ກໍ່​ຕາມ ແຕ່​ດ້ວຍ​ຄວາມ​ຮັບຜິດຊອບ​ຕໍ່​ພາລະ​ບົດບາດ​ຂອງ​ຕົນ ນັບ​ແຕ່​ມື້​ສ້າງຕັ້ງ​ຂຶ້ນ ຂ່າວສານ​ປະເທດ​ລາວ​ໄດ້​ມີ​ສາຂາ​ຂ່າວ​ປະຈຳ​ຢູ່​ບາງ​ແຂວງ ເຊັ່ນ: ແຂວງ​ຊຽງ​ຂວາງ ສະຫວັນ​ນະ​ເຂດ ຄຳ​ມ່ວນ ອຸດົມ​ໄຊ ແລະ ແຂວງ​ເຊ​ກອງ ພ້ອມ​ນັ້ນ ກໍ່​ມີ​ໜ່ວຍ​ຂ່າວ​ເຄື່ອນ​ໄຫວ​ເກັບ​ກຳ​ຂ່າວ​ຢູ່​ເມືອງ​ວຽງ​ໄຊ ແຂວງ​ຫົວພັນ ພ້ອມ​ທັງ​ອອກ​ເຄື່ອນ​ໄຫວ​ເກັບ​ກຳ​ຂ່າວ​ຢູ່​ຕ່າງ​ແຂວງ ແລະ ບ່ອນ​ທີ່​ມີ​ສະໜາມຮົບ​ອັນ​ດຸເດືອດ ພາຍຫຼັງ​ທີ່​ປະເທດ​ຊາດ​ໄດ້​ຮັບ​ການ​ປົດ​ປ່ອຍ ໂຄງ​ປະກອບ​ການຈັດຕັ້ງ​ສຳນັກ​ຂ່າວສານ​ປະເທດ​ລາວ​ໄດ້​ມີ​ການ​ປ່ຽນແປງ ວິທະຍຸ​ກະຈາຍສຽງ​ໄດ້​ແຍກ​ໄປ​ເປັນ​ຄະນະ​ອຳນວຍ​ການ​ຕ່າງຫາກ ແລະ ຂ່າວສານ​ປະເທດ​ລາວ​ໄດ້​ມີ​ການ​ປັບປຸງ​ຫຼາຍ​ດ້ານ​ແບບ​ກ້າວ​ກະໂດດ​ຂັ້ນ​ ຈຳນວນ​ພະນັກງານ​ໄດ້​ເພີ່ມ​ຂຶ້ນ​ຢ່າງ​ຫຼວງຫຼາຍ ຫຼັງ​ຈາກ​ການຈັດຕັ້ງ​ເປັນ​ຮູບ​ຮ່າງ​ເຂົ້າ​ສູ່​ລະບົບ​ແລ້ວ ກໍ່​ໄດ້​ສືບຕໍ່​ພິມ​ໃບ​ຂ່າວ​ລາຍ​ວັນ​ເປັນ​ພາສາ​ລາວ ໃບ​ຂ່າວ​ຄົ້ນຄວ້າ ໃບ​ຂ່າວ​ພາສາ​ຝຣັ່ງ ພາສາ​ອັງກິດ ນັບ​ແຕ່​ປີ 2001 ເປັນຕົ້ນ​ມາ ໄດ້​ເພີ່ມ​ຜະລິດ​ຕະ​ພັນ​ຈັດ​ພິມ​ໜັງສືພິມ​ປະເທດ​ລາວ ແລະ ສືບຕໍ່​ປະກອບສ່ວນ​ຢ່າງ​ຕັ້ງໜ້າ ເຂົ້າ​ໃນ​ການ​ດຳເນີນ​ວຽກ​ງານ​ຕາມ​ພາລະ​ບົດບາດໜ້າທີ່​ຂອງ​ຕົນ​ຢູ່​ໃນ​ເງື່ອນໄຂ​ພາຍ​ໃນ ອັນ​ໄດ້​ເຮັດ​ໃຫ້​ສຳນັກ​ຂ່າວສານ​ໄດ້​ມີ​ການ​ປັບປຸງ ຍົກ​ສູງ​ຄຸນະພາບ ແລະ ພັດທະນາ​ດີ​ຂຶ້ນ​ເປັນ​ກ້າວໆ ແລະ ໄລຍະ​ປີ 2012-2017 ໄດ້​ດຳເນີນ​ການ​ປັບປຸງ​ໂຄງ​ປະກອບ​ກົງຈັກ​ການຈັດຕັ້ງ​ຢ່າງ​ຕໍ່​ເນື່ອງ​ໃຫ້​ສອດຄ່ອງ ແທດເໝາະ​ກັບເງື່ອນໄຂ​ຕົວ​ຈິງ​ຂອງ​ການ​ພັດ​ທະນາ​ເຕັກນິກ ແລະ ຂະຫຍາຍ​ຜະລິດ​ຕະ​ພັນ​ໃຫ້​ຫຼາຍ​ຂຶ້ນ ມາ​ຮອດ​ປັດຈຸບັນ ໄດ້​ມີ​ເວັບ​ໄຊ www.kpl.gov.la ເປັນ​ພາສາ​ລາວ ອັງກິດ ແລະ ຝຣັ່ງ ໃບ​ຂ່າວ​ພາຍ​ໃນ​ປະເທດ ຂ່າວ​ໂລກ​ທີ່​ເປັນ​ພາສາ​ລາວ​ລາຍ​ວັນ ອອນ​ລາຍ ໃບ​ຂ່າວ​ຄົ້ນຄວ້າ​ລາຍ​ວັນ ວາລະສານ​ປະເທດ​ລາວ​ລາຍ​ໄຕ​ມາດ ຮູບ​ພາບ-ສຳ​ເນົາ ສຳລັບ​ການ​ໂຄສະນາ ແລະ ອື່ນໆ ພ້ອມ​ນີ້ຍັງ​ມີ​ສື່​ອອນ​ລາຍ​ປະເທດ​ລາວ (Facebook) ຄຣິບ​ວີ​ດີ​ໂອຂ່າວ​ພາສາ​ລາວ ຜ່ານ​ເຄືອ​ຄ່າຍ​ອິນ​ເຕີ​ເນັດ ແລະ ບໍລິການ SMS ຜ່ານ​ເຄືອ​ຄ່າຍ​ໂທລະສັບ​ຂອງ​ບໍລິສັດ ​ລາວ​ໂທລະ​ຄົມ.

ຕອນ​ທ້າຍ​ທ່ານ​ນາຍົກລັດຖະມົນຕີ ໃຫ້​ກຽດ​ໂອ້​ລົມ​ໃຫ້​ທິດ​ຊີ້​ນຳ​ຕໍ່​ຄະນະ​ນຳ ແລະ ພະນັກງານ​ລັດຖະກອນ ເຊິ່ງ​ທ່ານ​ໄດ້​ເນັ້ນ​ໃຫ້​ສືບຕໍ່​ປະຕິບັດ​ບົດບາດ​ຂອງ​ສຳນັກ​ຂ່າວສານ​ໃນ​ໄລຍະ​ໃໝ່ ໃນ​ຖານະ​ເປັນ​ອົງການ​ຂ່າວ​ທາງ​ການ​ຂອງ​ລັດຖະບານ​ໃຫ້​ມີ​ຄຸນະພາບ ວ່ອງໄວ ແລະ ທັນ​ເຫດການ ໃຫ້​ຈັບ​ເອົາ​ສິ່ງ​ທ້າ​ທາຍ ວິ​ກິດ​ການ​ມາ​ເປັນ​ໂອກາດ ສືບຕໍ່​ເປັນ​ກະບອກ​ສຽງ​ອັນ​ແຫຼມ​ຄົມ ຈົງ​ຮັກ​ພັກດີ ໜັກ​ແໜ້ນໃນ​ການ​ສື່​ສຳພັນ​ລະຫວ່າງ​ຄົນ​ກັບ​ຄົນພາຍ​ໃນ ແລະ ຄົນ​ລາວ​ຢູ່​ພາຍ​ນອກ​ກັບ​ຕ່າງປະເທດ ແລະ ຄົນ​ຕ່າງປະເທດ​ໃຫ້​ເປັນ​ສື່​ທີ່​ໄວ້​ວາງໃຈ ທັງ​ເປັນ​ສື່​ທີ່​ສືບຕໍ່​ໃຫ້​ຄວາມ​ຮູ້​ກັບ​ພໍ່​ແມ່​ປະຊາຊົນ ສືບຕໍ່​ສູ້​ປ້ອງ​ກັນ​ກັບ​ສິ່ງ​ທີ່​ຝ່າຍ​ກົງກັນຂ້າມທີ່​ມີ​ຈຸດປະສົງ​ບໍ່​ດີ​ຕໍ່​ພັກ-ລັດ ປະຊາຊົນ ສ້າງ​ຄວາມ​ແຕກ​ແຍກ ຄວາມ​ເຂົ້າໃຈ​ລະຫວ່າງ​ຂັ້ນ​ເທິງ​ຫາ​ຂັ້ນ​ລຸ່ມ​ຕະຫຼອດ​ຮອດ​ປະຊາຊົນ ຢຶດ​ໜັ້ນ​ຫຼັກການ​ພື້ນຖານ​ການ​ປ່ຽນແປງໃໝ່​ຮອບດ້ານ​ ຢ່າງ​ມີ​ຫຼັກການ​ຂອງ​ພັກ ແລະ ຢຶດ​ໜັ້ນ​ໃນ​ລັກສະນະ​ຕໍ່ສູ້ ແລະ ລັກສະນະ​ສຶກ​ສາ​ໃຫ້​ຄວາມ​ຮູ້​ຄວາມ​ເຂົ້າໃຈ​ທີ່​ຖືກຕ້ອງ​ໃຫ້​ແກ່​ຜູ້​ບໍລິໂພກ​ຂ່າວ ໂດຍ​ເຮັດ​ໜ້າທີ່​ຕາມ​ຫຼັກການ​ວິທະຍາສາດ ທັນ​ສະໄໝ ​ຊັດ​ເຈນ ເລິກເຊິ່ງ ໜັກ​ແໜ້ນ ແລະ ອື່ນໆ.

ໃນ​ພິທີ​ດັ່ງກ່າວ ທ່ານ ບໍ່​ແສງ​ຄຳ ວົງ​ດາລາ ໄດ້​ຕາງໜ້າ​ລັດຖະບານ​ມອບ​ຫຼຽນ​ໄຊ​ອິດສະຫຼະ ​ຊັ້ນ I ໃຫ້​ສຳນັກ​ຂ່າວສານ​ປະເທດ​ລາວ ຕາງໜ້າ​ຮັບ​ຂອງ​ທ່ານ​ອຳນວຍ​ການ​ໃຫຍ່​ ສຳນັກ​ຂ່າວສານ​ປະເທດ​ລາວ ເພື່ອ​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ ແລະ ໄຊຊະນະ​ທີ່​ສຳນັກ​ຂ່າວສານ​ປະເທດ​ລາວ​ຍາດ​ມາ​ໄດ້ ຕະຫຼອດ​ໄລຍະ 50 ປີ ອັນ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ພາລະກິດ​ປົດ​ປ່ອຍ​ຊາດ ຍາດ​ເອົາ​ເອກະລາດ​ມາສູ່​ປະເທດ​ຊາດ​ຢ່າງ​ສົມບູນ ກໍ່​ຄື​ພາລະກິດ​ປົກ​ປັກ​ຮັກສາ ແລະ ສ້າງສາ​ປະເທດ​ຊາດ​ທີ່​ນັບ​ມື້​ເຕີບ​ໃຫຍ່​ເຂັ້ມແຂງ.

ຂ່າວທີ່ກ່ຽວຂ້ອງ