ມີໂຮງງານຂ້າສັດ 13 ແຫ່ງ ບໍ່ປະຕິບັດຕາມມາດຕະຖານ

232 11 ພ.ພ. 2018 ຂ່າວໜ້າ​ໜຶ່ງ
ມີໂຮງງານຂ້າສັດ 13 ແຫ່ງ ບໍ່ປະຕິບັດຕາມມາດຕະຖານ

ປັດຈຸບັນ ທົ່ວ​ນະຄອນຫຼວງ​ວຽງ​ຈັນ ມີ​ໂຮງງານ​ຂ້າ​ສັດ ແລະ ບ່ອນ​ຂ້າ​ສັດ​ຍ່ອຍ ທີ່​ໄດ້​ຮັບ​ອະນຸຍາດ​ດຳເນີນ​ກິດຈະການ​ທັງ​ໝົດ ຈຳນວນ 28 ແຫ່ງ ອັດຕາ​ການ​ຂ້າ​ສັດ​ຕໍ່​ວັນ​ສະເລ່ຍ ໝູ 560 ໂຕ ງົວ ຄວາຍ 58 ໂຕ ໃນ​ນີ້ ມີ​ໂຮງງານ​ຕັ້ງ​ຢູ່​ເມືອງ​ຈັນທະ​ບູ​ລີ 1 ແຫ່ງ ສີ​ໂຄດ​ຕະບອງ 3 ແຫ່ງ ໄຊ​ເຊດ​ຖາ 1 ແຫ່ງ ນາ​ຊາຍ​ທອງ 3 ແຫ່ງ ໄຊ​ທານີ 8 ແຫ່ງ ຫາດ​ຊາຍ​ຟອງ 4 ແຫ່ງ ສັງ​ທອງ 4 ແຫ່ງ ແລະ ເມືອງ​ປາກ​ງື່ມ 4 ແຫ່ງ.

ຜ່ານ​ການ​ລົງ​ຕິດຕາມ​ກວດກາ​ຕົວ​ຈິງ​ຂອງ​ພະນັກງານ ເຫັນ​ວ່າການ​ດຳເນີນ​ກິດຈະການ​ໂຮງງານ​ຂ້າ​ສັດ ແລະ ບ່ອນ​ຂາຍ​ສັດ​ຍ່ອຍ ຈຳນວນ 13 ແຫ່ງ ແມ່ນ​ບໍ່​ໄດ້​ປະຕິບັດ​ຕາມ​ມາດຕະຖານ​ໂຮງງານ​ຂ້າ​ສັດ ແລະ ຂໍ້​ຕົກລົງ​ຂອງ​ທ່ານ​ເຈົ້າ​ຄອງ​ນະຄອນຫຼວງ ຄື: ມາດຕະຖານ​ດ້ານ​ອາຄານ​ໂຮງງານ ມາດຕະຖານ​ດ້ານ​ເຄື່ອງ​ຈັກ ແລະ ມາດຕະຖານ​ດ້ານ​ຄວາມ​ປອດ​ໄພ ສຸ​ຂະ​ອະນາໄມ​ໂຮງງານ ເຊັ່ນ: ບໍ່​ມີ​ຫ້ອງການ ບໍ່​ມີ​ບ່ອນ​ພັກ​ສັດ ເປັນ​ອາຄານ​ເປີດ ການ​ຈັດ​ສັນ​ພື້ນ​ທີ່​ບໍ່​ເປັນ​ລະບຽບ ແລະ ການ​ຮັກສາ​ຄວາມ​ສະອາດ ບໍ່​ມີ​ສາງ​ເຢັນ ພາຊະນະ​ບັນຈຸ​ຊີ້ນ​ບໍ່​ໄດ້​ມາດຕະຖານ ບໍ່​ມີ​ເຄື່ອງ​ຍົກ​ນ້ຳໜັກ ເພື່ອ​ຍົກ​ຊາກ​ສັດ ແລະ ບໍ່​ມີ​ໝາກ​ລ໋ອກ​ສະຫວັນ ເພື່ອ​ລຳລຽງ​ຊາກ​ສັດ​ໄປ​ຕາມ​ຂັ້ນ​ຕອນ​ການ​ຜະລິດ ບໍ່​ມີ​ລະບົບ​ເຕືອນ​ໄພ ບໍ່​ມີ​ລະບົບ​ປ້ອງ​ກັນ​ອັນຕະລາຍ​ຈາກ​ເຄື່ອງ​ຈັກ ອຸປະກອນ​ປ້ອງ​ກັນ​ຝຸ່ນ ກິ່ນ ແລະ ຕູ້​ຢາ​ສຸກ​ເສີນ​ປະຈຳ​ໂຮງງານ.

ກອງ​ປະຊຸມ​ປຶກສາ​ຫາລື​ກ່ຽວ​ກັບ “ການ​ປັບປຸງ ແລະ ດັດສົມ​ໂຮງງານ​ຂ້າ​ສັດ ແລະ ບ່ອນ​ຂາຍ​ສັດ​ຍ່ອຍ” ຈັດ​ຂຶ້ນ​ວັນ​ທີ 10 ພຶດສະພາ 2018 ຢູ່​ທີ່​ພະ​ແນກ​ອຸດສາຫະກຳ ແລະ ການ​ຄ້າ ນະຄອນຫຼວງ​ວຽງ​ຈັນ ໂດຍ​ເປັນ​ປະທານ​ຮ່ວມ ມີ​ທ່ານ​ນາງ ວັນ​ມະນີ ພິມ​ມະ​ສານ ຮອງ​ຫົວໜ້າ​ພະ​ແນກ​ອຸດສາຫະກຳ ແລະ ການ​ຄ້າ ນວ ທ່ານ ສະຫວາດ ຂຸນ​ດາ​ວົງ ຮອງ​ຫົວໜ້າ​ກົມ​ອຸດສາຫະກຳ ແລະ ຫັດຖະກຳ ກະຊວງ​ອຸດສາຫະກຳ ແລະ ການ​ຄ້າ ມີ​ພະນັກງານŒວິຊາ​ການ​ທີ່​ກ່ຽວຂ້ອງ ແລະ ຜູ້​ປະກອບ​ການ​ທຸລະ​ກິດ​ເຂົ້າ​ຮ່ວມ.

ທ່ານ​ນາງ ວັນ​ມະນີ ພິມ​ມະ​ສານ ກ່າວ​ວ່າ: ແຜນ​ບຸກ​ທະລຸ​ສູ່​ການ​ຜະລິດ​ສິນຄ້າ ການ​ຫັນ​ສູ່​ການ​ບໍລິການ ມີ​ການ​ພັດທະນາ​ໄປ​ສູ່​ຄຸນະພາບ ເພື່ອ​ເຮັດ​ໃຫ້​ພາກ​ທຸລະ​ກິດ​ເຂົ້າໃຈ​ນະໂຍບາຍ ແລະ ທິດ​ທາງ​ຂອງ​ລັດຖະບານ ເວົ້າ​ລວມ ເວົ້າ​ສະເພາະ ແມ່ນ​ວິ​ໃສ​ທັດ​ຂອງ​ນະຄອນຫຼວງ​ວຽງ​ຈັນ ພ້ອມ​ທັງ​ເປັນ​ການ​ຍົກ​ລະດັບ​ຄວາມ​ຮູ້ ຄວາມ​ສາມາດ ແລະ ເຕັກນິກ​ໃນ​ການ​ຜະລິດ​ໃຫ້​ແກ່​ຜູ້​ປະກອບ​ການ ໃຫ້​ຖືກ​ຕາມ​ຫຼັກ​ສຸ​ຂະ​ອະນາໄມ ຮັບປະກັນ​ຄວາມ​ສະອາດ​ຕໍ່​ຜູ້​ບໍລິໂພກ.

ຂ່າວທີ່ກ່ຽວຂ້ອງ