ເປີດຂະບວນການເສຍຄ່າທຳນຽມທາງ ປະຈຳປີ 2018

180 11 ພ.ພ. 2018 ຂ່າວໜ້າ​ໜຶ່ງ
ເປີດຂະບວນການເສຍຄ່າທຳນຽມທາງ ປະຈຳປີ 2018

ພະ​ແນກ​ສ່ວຍ​ສາ​ອາກອນ ນະຄອນຫຼວງ​ວຽງ​ຈັນ ຮ່ວມ​ກັບທະນາ​ຄານ​ການ​ຄ້າແຫ່ງ​ປະເທດ​ລາວ​ມະຫາຊົນ ແລະ ກະຊວງ​ການ​ເງິນ ເປີດ​ຂະ​ບວນ​ການ​ເສຍ​ຄ່າ​ທຳນຽມ​ທາງ ປະຈຳ​ປີ 2018 ຂຶ້ນ ວັນ​ທີ 10 ພຶດສະພາ 2018 ຢູ່​ກະຊວງ​ການ​ເງິນ ໂດຍ​ມີ​ທ່ານ ສຳເພົາ ເລົ່າ​ສີ ຮອງ​ຫົວໜ້າ​ຫ້ອງການ ກະຊວງ​ການ​ເງິນ ທ່ານ ສຸລິຍາ ອາ​ລຸນ​ສະຫວາດ ຮອງ​ຫົວໜ້າ​ພະ​ແນກ​ສ່ວຍ​ສາ​ອາກອນ ນະຄອນຫຼວງ​ວຽງ​ຈັນ ທ່ານ​ນາງ ​ບົວ​ສະຫວາດ ສີ​ສານ ຫົວໜ້າ​ພະ​ແນກ​ບໍລິການ​ລູກ​ຄ້າ ທະນາຄານ​ການ​ຄ້າ​ແຫ່ງ​ປະເທດ​ລາວ​ມະຫາຊົນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ສຳເພົາ ເລົ່າ​ສີ ກ່າວ​ວ່າ: ການ​ປະຕິບັດ​ພັນທະ​ເຂົ້າ​ງົບປະມານ​ແຫ່ງ​ລັດ ແມ່ນ​ໜ້າທີ່​ຂອງ​ທຸກ​ພາກສ່ວນ ນັບ​ທັງ​ອົງ​ການຈັດຕັ້ງ ພັກ-ລັດ ອົງ​ການຈັດຕັ້ງ​ມະຫາຊົນ ຫົວໜ່ວຍ​ທຸລະ​ກິດ ແລະ ພົນລະເມືອງ​ລາວ​ທຸກ​ຄົນ​ຕ້ອງ​ໄດ້​ປະກອບສ່ວນ ສະນັ້ນ ການ​ເປີດ​ຂະ​ບວນ​ການ​ເສຍ​ຄ່າ​ທຳນຽມ​ທາງ ປະຈຳ​ປີ 2018 ຂຶ້ນ ເພື່ອ​ປຸກລະດົມຊຸກຍູ້ ແລະ ອຳນວຍ​ຄວາມ​ສະດວກ​ໃຫ້​ອົງ​ການຈັດຕັ້ງ​ລັດ ພະນັກງານ-ລັດຖະກອນ ໄດ້​ເສຍ​ຄ່າ​ທຳນຽມ​ທາງ​ໃຫ້​ເປັນ​ຂະ​ບວນ​ຟົດຟື້ນ ອັນສຳຄັນ​ແມ່ນ ເພື່ອ​ສ້າງ​ຂະ​ບວນ​ການ​ໃຫ້​ເປັນ​ແບບຢ່າງ​ນຳ​ໜ້າ​ ສະແດງ​ເຖິງ​ສະຕິ​ຄວາມ​ຕື່ນ​ຕົວ​ຄວາມ​ສະໝັກ​ໃຈ ​ທີ່​ຈະ​ປະກອບສ່ວນ​ເຂົ້າ​ງົບປະມານ​ໃຫ້​ແກ່​ລັດ ກໍ່​ຄືການ​ສ້າງສາ​ພັດທະນາ​ປະເທດ​ຊາດ ສະນັ້ນ ຂໍ​ເຊີນຊວນ​ອົງ​ການຈັດຕັ້ງ​ທຸກ​ພາກສ່ວນ ພ້ອມ​ກັນ​ມາ​ປະກອບສ່ວນ​ພັນທະ​ເຂົ້າ​ງົບປະມານ​ລັດ ດ້ວຍ​ການ​ແຈ້ງ​ເສຍ​ຄ່າ​ທຳນຽມ​ທາງ​ໃຫ້​ຄົບ​ຖ້ວນ​ຕາມ​ຈຳນວນ​ພາຫະນະ​ທີ່​ຕົນ​ຄຸ້ມ​ຄອງ ແລະ ນຳ​ໃຊ້​ໃນ​ປັດຈຸບັນ.

ສຳລັບ​ປີ 2017 ມີ​ຜູ້​ຈ່າຍ​ຄ່າ​ທຳນຽມ​ທາງ 55,44 ຕື້​ກີບ ສ່ວນ​ປີ 2018 ມີ​ຜູ້​ມາ​ເສຍ​ຄ່າ​ທຳນຽມ​ທາງ​ແລ້ວ 33,36 ຕື້​ກີບ ລວມ 88,8 ຕື້​ກີບ ໃນ​ນີ້ ປ້າຍ​ເຫຼືອງ 152.450 ຄັນ ເທົ່າ​ກັບ 11,74% ປ້າຍ​ຂາວ 35.031 ຄັນ ເທົ່າ​ກັບ 19,18% ປ້າຍ​ຟ້າ 8.447 ຄັນ ເທົ່າ​ກັບ 19,97% ປ້າຍ ​ກທ 68 ຄັນ ເທົ່າ​ກັບ 68% ແລະ ປ້າຍ ​ປກສ 10 ຄັນ ເທົ່າ​ກັບ 0,31% ລວມ​ທັງ​ໝົດ 202.586 ຄັນ ເທົ່າ​ກັບ 12,96%.

ຂ່າວທີ່ກ່ຽວຂ້ອງ