ນວ ປະຕິສັງຂອນຫຼັງຄາພຸດທະສິມມາວັດອົງຕື້

278 11 ພ.ພ. 2018 ຂ່າວໜ້າ​ໜຶ່ງ
ນວ ປະຕິສັງຂອນຫຼັງຄາພຸດທະສິມມາວັດອົງຕື້

ໂຄງ​ຫຼັງຄາ​ພຸດ​ທະ​ສິມ​ມາ​ວັດ​ອົງ​ຕື້ ເປັນ​ໂຄງ​ຫຼັງຄາ​ທີ່​ເຮັດ​ດ້ວຍ​ໄມ້​ເນື້ອ​ແຂງ (ໄມ້ແຄນ) ແລະ ມຸງ​ດ້ວຍ​ດິນຂໍ ດ້ວຍ​ອາຍຸ​ການ​ນຳ​ໃຊ້​ໄມ້​ມາ​ໄດ້ 20 ກວ່າ​ປີ ປັດຈຸບັນ ໂຄງ​ຫຼັງຄາ​ດັ່ງກ່າວ​ມີ​ການ​ຊຸດໂຊມ ເປ່​ເພ ແລະ ຊຳ​ຫຼຸດ​ຈຳນວນ​ໜຶ່ງ ເວລາ​ຝົນຕົກ​ເຮັດ​ໃຫ້​ນ້ຳ​ຝົນ​ຮົ່ວ​ຊຶມ​ລົງ​ມາ​ໃສ່​ດ້ານ​ໃນ​ຂອງ​ພຸດ​ທະ​ສິມ​ມາ​ຫຼັງ​ດັ່ງກ່າວ ເຮັດ​ໃຫ້​ມີ​ນ້ຳ​ອັ່ງ ແລະ ເປິະ​ເປື້ອນ ດັ່ງນັ້ນ ເຈົ້າ​ອະທິການ​ວັດ​ອົງ​ຕື້ ພ້ອມ​ດ້ວຍ​ອຳນາດ​ການ​ປົກຄອງ​ບ້ານ​ ໄດ້​ໃຫ້​ກົມ​ວິຈິດ​ສິນ ກະຊວງ​ຖະແຫຼງ​ຂ່າວ​ວັດທະນະທຳ ແລະ ທ່ອງ​ທ່ຽວ ສຳ​ຫຼວດ​ດ້ານ​ວິຊາ​ການ ເຊິ່ງ​ຜ່ານ​ການ​ສຳ​ຫຼວດ​ເຫັນ​ວ່າ ໄມ້​ໂຄງ​ຫຼັງຄາ​ມີ​ບາງ​ຈຸດ​ແມ່ນ​ໂດກ ແລະ ບາງ​ຈຸດ​ແມ່ນ​ມີ​ປວກ​ເຮັດ​ຮັງ​ອາໄສ​ຢູ່ ຈາກ​ນັ້ນ ໄດ້​ຂຽນ​ບົດ​ລາຍ​ງານ​ສະເໜີ​ຕໍ່​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ເພື່ອ​ສະເໜີ​ຕໍ່​ເຈົ້າ​ຄອງ​ນະຄອນຫຼວງ​ວຽງ​ຈັນ ກ່ຽວ​ກັບ​ການຈັດຕັ້ງ​ປະຕິບັດ​ການ​ປະຕິສັງຂອນ​ຊຸດ​ນີ້.

ວັນ​ທີ 10 ພຶດສະພາ 2018 ທີ່​ວັດ​ອົງ​ຕື້​ມະຫາ​ວິຫານ ພະ​ອາຈານ ພວງ​ປະເສີດ ພູມ​ມະ​ວົງ ເຈົ້າ​ອະທິການ​ວັດ​ອົງ​ຕື້ ທ່ານ ສະໜອງ ສີ​ຫາ​ລາດ ກົມ​ວິຈິດ​ສິນ ກະຊວງ ຖວທ ພ້ອມ​ດ້ວຍ​ຕາງໜ້າ​ຈາກ​ພະແນກການ​ກ່ຽວຂ້ອງ ແລະ ອຳນາດ​ການ​ປົກຄອງ​ບ້ານ​ວັດ​ຈັນ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ໄດ້​ພ້ອມ​ກັນ​ສຳ​ຫຼວດ ແລະ ເປີດ​ໂຄງການ​ປະຕິສັງຂອນ​ໂຄງ​ຫຼັງຄາ​ພຸດ​ທະ​ສິມ​ມາ​ວັດ​ອົງ​ຕື້​ພະ​ວິຫານ.

ການ​ປະຕິສັງຂອນ​ໂຄງ​ຫຼັງຄາ​ພຸດ​ທະ​ສິມ​ມາ​ວັດ​ອົງ​ຕື້​ມະຫາ​ວິຫານ ແມ່ນ​ໄດ້​ປະຕິສັງຂອນ​ມາ​ໄດ້​ກ່ອນ​ໜ້າ​ນີ້ 20 ກວ່າ​ປີ ແລະ ການ​ປະຕິສັງຂອນ​ຄັ້ງ​ນັ້ນ ​ແມ່ນ​ໄດ້​ໃຊ້​ໄມ້​ເກົ່າ​ອັນ​ໄດ້​ເຮັດ​ໃຫ້​ໂຄງ​ຫຼັງຄາ​ຊຸດໂຊມ ແລະ ຊຳ​ຫຼຸດ​ບາງ​ຈຸດ ດັ່ງນັ້ນ ຈຶ່ງ​ມີ​ຄວາມ​ຈຳເປັນ​ຕ້ອງ​ປະຕິສັງຂອນ​ຄືນໃໝ່ ເປັນ​ຄັ້ງ​ທີ 3.

ເພື່ອ​ເຮັດ​ໃຫ້ການ​ປະຕິສັງຂອນ ຫຼັງຄາ​ພຸດ​ທະ​ສິມ​ມາ​ວັດ​ດັ່ງກ່າວ ສຳເລັດ​ກ່ອນ​ລະດູຝົນ​ທີ່​ຈະ​ມາ​ຮອດ​ນີ້ ຂໍ​ເຊີນຊວນ​ບັນດາ​ອົງ​ການຈັດຕັ້ງ​ທັງ​ພາຍ​ໃນ ແລະ ຕ່າງ​ປະເທດ ຕະຫຼອດ​ຮອດ​ພໍ່​ແມ່ປະຊາຊົນ ຫົວໜ່ວຍ​ທຸລະ​ກິດ ທີ່​ມີ​ຈິດໃຈໃສ​ສັດທາ​ປະກອບສ່ວນ​ປະຕິສັງ​ຂອນ​ໂຄງ​ຫຼັງຄາ​ດັ່ງກ່າວ ເພື່ອ​ພ້ອມ​ກັນ​ຮັກສາ​ວັດຖຸ​ທາງ​ດ້ານ​ພຸດ​ທະ​ສາສະໜາ ​ໃຫ້​ມີ​ຄວາມ​ສວຍ​ງາມ ແລະ ເປັນ​ທີ່​ເພິ່ງ​ທາງ​ດ້ານ​ຈິດໃຈ​ຂອງ​ມວນ​ຊົນ​ລາວ​ຕະຫຼອດ​ໄປ.

ຂ່າວທີ່ກ່ຽວຂ້ອງ