ຂ່າວຫຼ້າສຸດ

ບາເຊໂລນ່າ ອາດຖືກລົງໂທດຫ້າມຊື້ນັກເຕະຮ່ວມທີມ

231 06 ມິ.ນ. 2018 ວົງຈອນກີລາ
ບາເຊໂລນ່າ ອາດຖືກລົງໂທດຫ້າມຊື້ນັກເຕະຮ່ວມທີມ

         The Sun ສື່ຂອງອັງກິດ ລະບຸວ່າ ບາເຊໂລນ່າ ມີໂອກາດຖືກ ຟີຟ່າ ສັ່ງລົງໂທດຈາກການລົງທະບຽນນັກເຕະທີ່ດຶງມາຮ່ວມທີມນານສຸດເຖິງ 2 ປີເຄິ່ງ  ຈາກການທີ່ກຳລັງຕາມເກ້ຍກ່ອມ ອັອງຕວນ ກຣີຊມັນ ກອງໜ້າ ແອດ. ມາດຣິດ ທັ້ງທີ່ດາວເຕະຊາວຝຣັ່ງຍັງມີສັນຍາຢູ່ກັບ ແອດ. ມາດຣິດ ສ່ວນ ກຣີຊມັນ ກໍມີສິດຖືກລົງໂທດເຊັ່ນກັນ.

          ກຣີຊມັນ ຕົກເປັນຂ່າວກັບ ບາເຊໂລນ່າ ມາໄລຍະໜຶ່ງແລ້ວ ຫຼັງຈາກທີ່ ບາເຊໂລນ່າເຊື່ອວ່າເຂົາຈະເຮັດໃຫ້ກອງໜ້າຂອງທີມເຂັ້ມແຂງຫຼາຍຍິ່ງຂຶ້ນ ຊຶ່ງກ່ອນໜ້ານີ້ ທ່ານ ໂຈເຊບ ມາເຣຍ ບາໂຕເມວ ປະທານຂອງຍອດທີມແຫ່ງຖິ່ນ ຄໍ້າ ນູ ກໍບອກເອງວ່າເຄີຍຕິດຕໍ່ກັບນາຍໜ້າຂອງນັກເຕະຊາວຝຣັ່ງຈິງໆ ແຖມມີລາຍງານວ່າ ທີມຍິ່ງໃຫຍ່ຈາກແຄວ້ນກາຕາລຸນຢ່າ ກຽມຂໍ້ສະເໜີມູນຄ່າ 100 ລ້ານປອນລໍຖ້າເອົາໄວ້ແລ້ວ.

          ຢ່າງໃດກໍຕາມ ກຣີຊມັນ ຍັງມີສັນຍາກັບ ແອດ. ມາດຣິດ ຈົນເຖິງປີ 2022 ຊຶ່ງກົດຂອງສະຫະພັນເຕະບານນານາຊາດລະບຸເອົາໄວ້ຢ່າງຈະແຈ້ງວ່າ ນັກເຕະອາຊີບທຸກຄົນທີ່ມີສັນຍາຢູ່ກັບສະໂມສອນໃດສະໂມສອນໜຶ່ງນັ້ນ ຈະສາມາດດຳເນີນຂັ້ນຕອນເລື່ອງສັນຍາກັບທີມອື່ນຈົນສໍາເລັດໄດ້ກໍຕໍ່ເມື່ອສັນຍາຂອງເຂົາກັບຕົ້ນສັງກັດປັດຈຸບັນມັນໝົດລົງໄປແລ້ວ ຫຼືເຫຼືອສັນຍາກັບຕົ້ນສັງກັດປັດຈຸບັນອີກ 6 ເດືອນ ແລະ ຖ້າຫາກມີການຝ່າຝືນກົດ ມັນກໍຈະເຮັດໃຫ້ທຸກຝ່າຍທີ່ເຮັດຜິດກົດຖືກລົງໂທດ.

          ນັ້ນໝາຍຄວາມວ່າ ຖ້າເກີດ ບາເຊໂລນ່າ ຖືກຕັດສິນວ່າມີຄວາມຜິດອີຫຼີ ພວກເຂົາກໍອາດຖືກສັ່ງຫ້າມລົງທະບຽນນັກເຕະທີ່ຄວ້າມາຮ່ວມທີມໃນໄລຍະຕະຫຼາດຊື້-ຂາຍນັກເຕະ 3-5 ໄລຍະ ຊຶ່ງຖ້າທຽບເປັນໄລຍະເວລາກໍເທົ່າກັບ 1 ປີເຄິ່ງ-2 ປີເຄິ່ງ ນັ້ນເອງ ຂະນະທີ່ ກຣີຊມັນ ກໍອາດຖືກສັ່ງຫ້າມລົງຫຼິ້ນເປັນເວລາສູງສຸດ 6 ເດືອນດ້ວຍກັນ.

          ທັ້ງນີ້ ມັນເຄີຍເກີດກໍລະນີແບບນີ້ມາແລ້ວ ຢ່າງເຊັ່ນຕອນທີ່ ອາແອສ ໂຣມ່າ ຖືກຕັດສິນວ່າມີຄວາມຜິດຈາກການດຶງ ຟິລິບ ແມັກແຊສ ອະດີດກອງຫຼັງຊາວຝຣັ່ງ ມາຈາກ ໂອແຊ ເມື່ອປີ 2004 ເປັນຕົ້ນ ໂດຍຕອນນັ້ນ ແມັກແຊສ ຖືກສັ່ງຫ້າມລົງຫຼິ້ນໄປໄລຍະໜຶ່ງ ສ່ວນ ໂຣມ່າ ກໍຕ້ອງຈ່າຍເງິນໃຫ້ ໂອແຊ ເພີ່ມ ເພື່ອເປັນຄ່າຊົດເຊີຍດ້ວຍ.

ຂ່າວທີ່ກ່ຽວຂ້ອງ