ສະຫຼອງວັນຄ້າຍວັນເກີດ ກາກມາກ ຄົບຮອບ 200 ປີ

259 07 ມິ.ນ. 2018 ຂ່າວໜ້າ​ໜຶ່ງ

ໃນ​ວັນ​ທີ 30-31 ພຶດສະພາ 2018 ສະຫາຍ ທອງ​ສະ​ລິດ ມັງ​ໜໍ່​ເມກ ກຳມະການ​ສູນ​ກາງ​ພັກ ຫົວໜ້າ​ສະ​ຖາ​ບັນ​ການເມືອງ ແລະ ການ​ປົກຄອງ​ແຫ່ງ​ຊາດ ພ້ອມ​ດ້ວຍ​ຄະນະ ໄດ້​ເດີນທາງ​ໄປ​ເຂົ້າ​ຮ່ວມ​ກອງ​ປະຊຸມ​ສາກົນ ແລະ ສະເຫຼີມສະຫຼອງ​ວັນ​ຄ້າຍ​ວັນ​ເກີດ ກາກ​ມາກ ຄົບຮອບ 200 ປີ ພາຍ​ໃຕ້​ຫົວຂໍ້: “ລັດທິ​ມາກ ແລະ ສັງຄົມ​ນິຍົມ” ທີ່​ນະຄອນຫຼວງ​ກັດ​ມານ​ດູ ປະເທດ​ເນ​ປານ ໂດຍ​ເປັນ​ເຈົ້າພາບ​ຮ່ວມ​ຂອງ​ພັກ​ກອມ​ມູ​ນິດ​ເນ​ປານ ແລະ ພັກ​ກອມ​ມູ​ນິດ​ເນ​ປານ​ມາ​ຊານ ມີ​ຜູ້​ແທນ​ເຂົ້າ​ຮ່ວມ​ທັງ​ໝົດ 300 ຄົນ ໃນ​ນັ້ນ ມີ​ຄະນະ​ຜູ້​ແທນ​ຕ່າງປະເທດ 23 ພັກ​ການເມືອງ​ທີ່​ມາ​ຈາກ 17 ປະເທດ.

ບັນດາ​ຜູ້​ແທນ​ກອງ​ປະຊຸມ​ໄດ້​ປຶກສາ​ຫາລື ແລະ ແລກປ່ຽນ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ​ປິ່ນ​ອ້ອມ​ສອງ​ຫົວຂໍ້​ຕົ້ນຕໍ​ຄື: “ລັດທິ​ມາກ ແລະ ສັງຄົມ​ນິຍົມ​ປັດຈຸບັນ” ແລະ “ບົດຮຽນ​ຂອງ​ຂະ​ບວນ​ການ​ກອມ​ມູ​ນິດ​ຢູ່​ບັນດາ​ປະເທດ” ເຊິ່ງ​ໄດ້​ຮ່ວມ​ກັນ​ທົບ​ທວນຄືນ​ບັນດາ​ຫຼັກ​ມູນ​ທິດ​ສະ​ດີ​ຂອງ​ລັດທິ​ມາກ ແລະ ການ​ໝູນ​ໃຊ້​ລັດທິ​ມາກ​ເຂົ້າ​ໃນ​ສະພາບ​ຕົວ​ຈິງ​ຂອງ​ແຕ່​ລະ​ປະເທດ ໃນ​ແຕ່​ລະ​ຍຸກ ແຕ່​ລະສະ​ໄໝ ແລະ ຢືນຢັນ​ວ່າ ລັດທິ​ມາກ ແມ່ນ​ທິດ​ສະ​ດີ​ວິທະຍາສາດ​ທີ່​ຖືກຕ້ອງ ແລະ ຍັງ​ສອດຄ່ອງ​ກັບ​ຍຸກ​ປັດຈຸບັນ ໃນ​ກອງ​ປະຊຸມ​ຄະນະ​ຜູ້​ແທນ ພັກ ​ປປ ລາວ ​ໄດ້​ຍົກ​ໃຫ້​ເຫັນ​ບົດບາດ​ຄວາມ​ສຳຄັນ​ຂອງ 3 ຫຼັກ​ມູນ​ທິດ​ສະ​ດີ​ພື້ນຖານ​ຂອງ​ມາກ ທີ່​ເປັນ​ການ​ຄົ້ນ​ພົບ​ອັນ​ຍິ່ງ​ໃຫຍ່​ຂອງ​ມວນ​ມະນຸດ​ເຊິ່ງ 3 ຫຼັກ​ມູນ​ພື້ນຖານ​ຂອງ​ລັດທິ​ມາກ​ຍັງ​ມີ​ຄຸນຄ່າ​ອັນ​ໃຫຍ່​ຫຼວງ​ໃຫ້​ແກ່​ການ​ຄົ້ນຄວ້າ ໝູນ​ໃຊ້​ເຂົ້າ​ໃນ​ພາລະກິດ​ປະຕິວັດ​ຂອງ​ແຕ່​ລະ​ປະເທດ ພ້ອມ​ນີ້ ຄະນະ​ຜູ້​ແທນ​ພັກ​ເຮົາ​ຍັງ​ໄດ້​ແລກປ່ຽນ​ບົດຮຽນ​ກ່ຽວ​ກັບ​ການ​ໝູນ​ໃຊ້​ທິດ​ສະ​ດີ​ມາກຢ່າງ​ປະດິດ​ສ້າງ ​ເຂົ້າ​ໃນ​ພຶດຕິ​ກຳ​ຕົວ​ຈິງ​ຂອງ​ພັກ ໃນ​ການ​ຕໍ່ສູ້​ເພື່ອ​ປົດ​ປ່ອຍ​ຊາດ ແລະ ສ້າງສາ​ພັດທະ​ນາ​ປະເທດ​ຊາດ ກໍ່​ຄືການ​ດຳເນີນ​ພາລະກິດ​ປ່ຽນແປງ​ໃໝ່​ຮອບດ້ານ​ຢ່າງ​ມີ​ຫຼັກການ​ຂອງ​ພັກ ​ປປ ລາວ ໃນ​ຕະຫຼອດ​ໄລຍະ​ທີ່​ຜ່ານ​ມາ.

ກອງ​ປະຊຸມ​ຄັ້ງ​ນີ້​ໄດ້​ເປັນ​ເອກະ​ພາບ​ກັນ​ ຮັບຮອງ​ເອົາ​ຖະແຫຼງການ​ກອງ​ປະຊຸມ ​ເຊິ່ງ​ໄດ້​ຢືນຢັນ​ຄວາມ​ສຳຄັນ​ຂອງ​ລັດທິ​ມາກ ​ທີ່​ເປັນ​ຫຼັກການ​ຊີ້​ນຳ-ນຳພາ​ຂອງ​ນັກ​ກອມ​ມູ​ນິດ​ກຳມະກອນ ແລະ ​ນັກ​ສັງຄົມ​ນິຍົມ ​ເພື່ອ​ບັນລຸ​ເປົ້າ​ໝາຍ​ກ້າວ​ຂຶ້ນ​ສູ່​ລັດທິ​ສັງຄົມ​ນິຍົມ ​ເພື່ອ​ສ້າງ​ໂລກ​ແຫ່ງ​ຄວາມ​ຍຸຕິ​ທຳ​ມີ​ສັນຕິພາບ ແລະ ວັດທະນາ​ຖາວອນ.

ນອກຈາກ​ເຂົ້າ​ຮ່ວມ​ກອງ​ປະຊຸມ​ແລ້ວ ​ຄະນະ​ຜູ້​ແທນ​ພັກ​ເຮົາ​ຍັງ​ໄດ້​ພົບ​ປະ​ສອງ​ຝ່າຍ​ກັບ​ພັກ​ກອມ​ມູ​ນິດ​ເນ​ປານ ​ແລະ ​ເຄື່ອນ​ໄຫວ​ພົບ​ປະ​ແລກປ່ຽນ​ກັບ​ຄະນະ​ຜູ້​ແທນ​ພັກ​ການເມືອງ​ຕ່າງໆ ທີ່​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ ແລະ ​ຢ້ຽມຢາມ​ສະຖານທີ່​ສຳຄັນ​ທາງ​ປະຫວັດສາດ​ຈຳນວນ​ໜຶ່ງ ​ຢູ່​ນະຄອນຫຼວງ​ກັດ​ມານ​ດູ ຕື່ມ​ອີກ.

ຂ່າວທີ່ກ່ຽວຂ້ອງ