ງານວາງສະແດງເຟີນີເຈີລາວ ຈະຈັດຂຶ້ນຕົ້ນເດືອນໜ້າ

129 11 ມິ.ນ. 2018 ຂ່າວໜ້າ​ໜຶ່ງ

ເພື່ອ​ປະຕິບັດ​ຕາມ​ນະໂຍບາຍ ​ການ​ສົ່ງເສີມ​ການ​ຜະລິດ​ເຄື່ອງ​ຟີ​ນີ​ເຈີ​ໄມ້​ລາວ ທັງ​ເປັນ​ການ​ໂຄສະນາ​ເຜີຍແຜ່​ໃຫ້​ສັງຄົມ ​ຮັບ​ຮູ້​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ​ຫຼາຍ​ຂຶ້ນ ໃຫ້​ຜູ້​ຜະລິດ​ສາມາດ​ເຂົ້າ​ຫາ​ຕະຫຼາດ ຈຳໜ່າຍ​ສິນຄ້າ​ທັງ​ພາຍ​ໃນ ແລະ ຕ່າງປະເທດ ພ້ອມ​ກ້າວ​ສູ່​ການ​ສ້າງ​ຕາ​ໜ່າງ​ການວາງສະແດງ-ຂາຍ​ເຟີ​ນີ​ເຈີ​ກັບ​ພາກ​ພື້ນ ແລະ ສາກົນ​ໃນ​ອະນາຄົດ ດັ່ງນັ້ນ ສະມາຄົມ​ເຟີ​ນີ​ເຈີ​ລາວ ຈຶ່ງ​ໄດ້​ຈັດ​ງານ​ວາງສະແດງ​ເຄື່ອງ​ເຮືອນ​ລາວ ຄັ້ງ​ທີ 3 ປະຈຳ​ປີ 2018 ຂຶ້ນ​ວັນ​ທີ 7-15 ກໍລະກົດ 2018 ຢູ່​ທີ່​ສູນ​ການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ.

ການ​ຈັດ​ງານ​ເພື່ອ​ຈັດ​ຕັ້ງ​ຜັນ​ຂະຫຍາຍ ​ຕາມ​ເນື້ອ​ໃນ​ຈິດໃຈ​ຂອງ​ຂັ້ນ​ເທິງ​ວາງ​ອອກ​ໃຫ້​ປາກົດ​ຜົນ​ເປັນ​ຈິງ ໂດຍ​ສະເພາະ ແຈ້ງ​ການ​ເລກ​ທີ 15/​ນຍ ທັງ​ເປັນ​ການ​ອະນຸ​ຮັກ​ຮັກສາ​ປ່າໄມ້ ການ​ນຳ​ໃຊ້​ໄມ້​ໃຫ້​ເກີດ​ຜົນ​ປະໂຫຍດ​ສູງ​ສຸດ ແລະ ມີ​ໄມ້​ໄວ້​ໃຊ້​ຢ່າງ​ຍືນ​ຍົງ ​ໂດຍ​ການ​ປຸງ​ແຕ່ງ​ໃຫ້​ເປັນ​ຜະລິດ​ຕະ​ພັນ​ສຳເລັດ​ຮູບ​ມາ​ຈາກ​ໄມ້ຫວາຍ ແລະ ໄມ້ປ່ອງ ໃຫ້​ມີ​ຫຼາຍ​ຜະລິດ​ຕະ​ພັນ​ຕາມ​ທີ່​ສັງຄົມ​ປັດຈຸບັນ​ຕ້ອງການ ແລະ ເປັນ​ທີ່​ນິຍົມ​ກັນ​ຢູ່​ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທັນ​ສະໄໝ ພ້ອມ​ນັ້ນ ຍັງ​ເປັນ​ການ​ສ້າງ​ມູນ​ຄ່າ​ເພີ່ມ​ໃຫ້​ກັບ​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ ໃຫ້​ກາຍເປັນ​ສິນຄ້າ​ທີ່​ມີ​ຄຸນະພາບ​ລາຄາ​ສູງ ຕາມ​ຄວາມ​ຕ້ອງການ​ຂອງ​ລູກ​ຄ້າ ແລະ ຕະຫຼາດ​ເຮັດ​ໃຫ້​ສາມາດ​ສົ່ງ​ອອກ​ຕ່າງປະເທດ​ໄດ້ ນອກ​ນີ້ຍັງ​ເປັນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ກັບ​ປະຊາຊົນ​ບັນດາເຜົ່າ ຕ້ານ​ໄພ​ວ່າງ​ງານ ແລະ ຊ່ວຍ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ໃນ​ອະນາຄົດ ແລະ ເພື່ອ​ສົ່ງເສີມ​ການ​ປູກ​ໄມ້ ຫັນ​ມາ​ໃຊ້​ໄມ້​ປູກ​ທົດ​ແທນ​ໄມ້​ທຳ​ມະ​ຊາດ​ການ​ພັດທະນາ​ເປັນ​ສີຂຽວ ສົ່ງເສີມ​ສ້າງ​ຄວາມເຂັ້ມແຂງ​ໃຫ້​ກັບ​ສີໄມ້ລາຍມື​ຂອງ​ຄົນ​ລາວ ຫົວໜ່ວຍ​ທຸລະ​ກິດ​ເຟີ​ນີ​ເຈີ​ໄມ້​ລາວ​ໃຫ້​ຂະຫຍາຍຕົວ ແລະ ເປັນ​ການ​ຕ້ອນຮັບ​ປີ​ທ່ອງ​ທ່ຽວ​ລາວ 2018 ຕື່ມ​ອີກ ເຊິ່ງ​ປະເພດ​ສິນຄ້າ​ທີ່​ນຳ​ເຂົ້າ​ວາງສະແດງ​ປະກອບ​ມີ ຜະລິດ​ຕະ​ພັນ​ເຄື່ອງ​ເຟີ​ນີ​ເຈີ​ຜະລິດ​ດ້ວຍ​ໄມ້ຫວາຍ ໄມ້ປ່ອງ ແລະ ຈາກ​ວັດ​ສະ​ດຸ​ເສດ​ເຫຼືອ​ຕ່າງໆ ​ທີ່​ເຮັດ​ເປັນ​ເຄື່ອງ​ເຟີ​ນີ​ເຈີ ຜະລິດ​ຕະ​ພັນ​ຫັດຖະກຳ ເຄື່ອງ​ແກະສະຫຼັກ​ໄມ້​ຕ່າງໆ ເຄື່ອງ​ປະດັບ​ຕົບແຕ່ງ​ເອ​ຢ້ອງ​ພາຍ​ໃນ​ເຮືອນ ແລະ ອຸປະກອນ​ຮັບ​ໃຊ້ເຄື່ອງມື ເຄື່ອງ​ຈັກ​ຕ່າງໆ​ທີ່​ກ່ຽວ​ກັບ​ການ​ຜະລິດ​ເຟີ​ນີ​ເຈີ​ໄມ້ ມີ​ຫ້ອງ​ວາງສະແດງ​ທັງ​ໝົດ 170 ຫ້ອງ ໃນ​ນີ້​ມີ 20 ຫ້ອງ​ສຳລັບ​ຫົວໜ່ວຍ​ທຸລະ​ກິດ​ໂອ​ດ໋ອບ ມາ​ຮອດ​ປັດຈຸບັນ​ນີ້​ ໄດ້​ມີ​ຫົວໜ່ວຍ​ທຸລະ​ກິດ​ຕ່າງໆ​ໃນ​ທົ່ວ​ປະເທດ​ໄດ້​ເຂົ້າ​ມາ​ຈອງ​ຫ້ອງ​ວາງສະແດງ​ແລ້ວ 84% ດັ່ງນັ້ນ ​ຜູ້​ທີ່​ຍັງ​ບໍ່​ທັນ​ໄດ້​ຈັບຈອງ​ຫ້ອງ​ຂາຍ ​ກໍ່​ສາມາດ​ມາ​ຕິດຕໍ່​ພົວພັນ​ໄດ້​ນຳ​ຄະນະ​ກຳມະການ​ຮັບຜິດຊອບ​ຈັດ​ງານ ​ຢູ່​ຫ້ອງການ​ສະມາຄົມ​ເຟີ​ນີ​ເຈີ​ລາວ ເບີ​ໂທ 021 720454.

ພິທີ​ຖະແຫຼງ​ຂ່າວ​ງານ​ວາງສະແດງ​ເຄື່ອງ​ເຮືອນ​ລາວ ຄັ້ງ​ທີ 3 ປະຈຳ​ປີ 2018 ຈັດ​ຂຶ້ນ​ວັນ​ທີ 6 ມິຖຸນາ 2018 ທີ່​ສຳນັກງານ​ສະພາ​ການ​ຄ້າ ແລະ ອຸດສາຫະກຳ​ແຫ່ງ​ຊາດ​ລາວ ຖະແຫຼງ​ໂດຍ​ທ່ານ ກອງ​ມາລາ ພົມມາ​ໄລ ຮອງ​ປະທານ​ສະມາຄົມ​ເຟີ​ນີ​ເຈີ​ລາວ ປະທານ​ບໍລິສັດ ເຄ​ແອນ​ບີ​ເຟີ​ນີ​ເຈີ ທ່ານ ໄຊ​ສົມ​ເພັດ ນໍ​ຣະ​ສິງ ຮັກສາ​ການ​ຫົວໜ້າ​ກົມ​ສົ່ງເສີມ​ການ​ຄ້າ ກະຊວງ​ອຸດສາຫະກຳ ແລະ ການ​ຄ້າ ທ່ານ​ນາງ ຈັນທະ​ຈອນ ວົງ​ໄຊ ຮອງ​ປະທານ​ສະພາ​ການ​ຄ້າ ແລະ ອຸດສາຫະກຳ​ແຫ່ງ​ຊາດ​ລາວ ທ່ານ​ອຳນວຍ​ການ​ບໍລິສັດ ລາວ​ເວີນ​ມະຫາຊົນ ຈຳກັດ ບັນດາ​ຜູ້​ປະກອບ​ການ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ