ຂ່າວຫຼ້າສຸດ

ໃຫ້ຄວາມຮູ້ຂໍ້ມູນກ່ຽວກັບການປ້ອງກັນພະຍາດວໍ້

74 12 ມິ.ນ. 2018 ຂ່າວໜ້າ​ໜຶ່ງ
ໃຫ້ຄວາມຮູ້ຂໍ້ມູນກ່ຽວກັບການປ້ອງກັນພະຍາດວໍ້

ເພື່ອ​ເຮັດ​ໃຫ້​ລາວ​ເຮົາ​ ເປັນ​ປະເທດ​ທີ່​ປອດ​ພະຍາດ​ວໍ້​ໃນ​ປີ 2030 ປ້ອງ​ກັນ​ສຸຂະພາບ​ຂອງ​ຄົນ ແລະ ລົບລ້າງ​ພະຍາດ​ທັງ​ໃນ​ສັດ ແລະ ໃນ​ຄົນ ເພື່ອ​ບັນລຸ​ຄຳ​ໝັ້ນ​ສັນຍາ​ຂອງ​ກອງ​ປະຊຸມ​ລັດຖະມົນຕີ​ກະຊວງ​ສາທາລະນະ​ສຸກ​ອາ​ຊຽນ ປີ 2010 ທີ່ ​ສສ ຫວຽດນາມ ແລະ ເພື່ອ​ເປັນ​ການ​ສ້າງ​ຄວາມ​ເຂົ້າໃຈ​ທາງ​ດ້ານ​ຂໍ້​ມູນ​ຂ່າວສານ ​ທີ່​ຈະ​ເຜີຍແຜ່​ໃຫ້​ປະຊາຊົນ​ບັນດາເຜົ່າ​ໄດ້​ຮັບ​ຮູ້ ແລະ ເຂົ້າໃຈ​ແຈ້ງ​ກ່ຽວ​ກັບ​ການ​ປ້ອງ​ກັນ​ພະຍາດ​ວໍ້​ຫຼາຍ​ຂຶ້ນ.

ກົມ​ຄວບ​ຄຸມພະ​ຍາດ​ຕິດຕໍ່ ກະຊວງ​ສາທາລະນະ​ສຸກ ຈັດ​ກອງ​ປະຊຸມ​ວັນ​ຕ້ານ​ພະຍາດ​ວໍ້​ໂລກ 28 ກັນຍາ​ໃຫ້​ສື່​ມວນ​ຊົນ ຂຶ້ນ​ວັນ​ທີ 7-8 ມິຖຸນາ 2018 ທີ່​ທ່າ​ລາດ ເມືອງ​ແກ້ວ​ອຸດົມ ແຂວງ​ວຽງ​ຈັນ ເປັນ​ປະທານ​ຂອງ​ທ່ານ ຣັດ​ຕະ​ນະ​ໄຊ ເພັດ​ສຸວັນ ຫົວໜ້າ​ກົມ​ຄວບ​ຄຸມພະ​ຍາດ​ຕິດຕໍ່ ມີ​ຕາງໜ້າ​ກົມ ສູນ ພະ​ແນກ​ສາທາລະນະ​ສຸກ​ແຂວງ​ອ້ອມ​ຂ້າງ​ນະຄອນຫຼວງ ແລະ ສື່​ມວນ​ຊົນ​ເຂົ້າ​ຮ່ວມ.

ທ່ານ ຣັດ​ຕະ​ນະ​ໄຊ ເພັດ​ສຸວັນ ກ່າວ​ວ່າ: ການ​ຈັດ​ກອງ​ປະຊຸມ​ຄັ້ງ​ນີ້ ​ເພື່ອ​ເປັນ​ການ​ເຜີຍແຜ່​ຄວາມ​ຮູ້​ພື້ນຖານ​ກ່ຽວ​ກັບ​ພະຍາດ​ຕິດຕໍ່​ຈາກ​ສັດ​ສູ່​ຄົນ ໂດຍ​ສະເພາະແມ່ນ​ພະຍາດ​ວໍ້ ຢາກ​ໃຫ້​ທຸກ​ຄົນ​ໃນ​ສັງຄົມ​ໄດ້​ຮັບ​ຮູ້ ແລະ ເຂົ້າໃຈ​ກ່ຽວ​ກັບ​ພະຍາດ​ວໍ້​ທີ່​ເປັນ​ອັນຕະລາຍ ເຊິ່ງ​ແຕ່​ລະ​ປີ​ມີ​ຄົນ​ຕາຍ​ຍ້ອນ​ພະຍາດ​ວໍ້​ເປັນ​ຈຳນວນ​ບໍ່​ໜ້ອຍ ພະຍາດ​ວໍ້​ແມ່ນ​ພະຍາດ​ທີ່​ເກົ່າ​ແກ່ ເກີດ​ມາ​ພ້ອມ​ກັບ​ມະນຸດ ໝາ ແມວ ເຈຍ ແລະ ອື່ນໆ ພະຍາດ​ນີ້​ແມ່ນ​ເຊື້ອ​ໄວ​ຣັດ​ຊະນິດ​ໜຶ່ງ ​ທີ່​ເຂົ້າ​ໄປ​ທຳລາຍ​ເສັ້ນປະສາດ ຖ້າ​ຫາກ​ຄົນ ແລະ ສັດ​ທີ່​ຕິດເຊື້ອ​ພະຍາດ​ວໍ້​ນີ້​ແລ້ວ ມີ​ຄວາມ​ຫວັງ​ຄື​ຕາຍ​ຢ່າງ​ດຽວ ເພາະ​ຍັງ​ບໍ່​ມີ​ຢາ​ຊະນິດ​ໃດ​ທີ່​ຈະ​ມາ​ປິ່ນປົວ​ຄົນ ຫຼື ສັດທີ່​ຕິດເຊື້ອ​ພະຍາດ​ນີ້​ໃຫ້​ຫາຍ​ດີ​ໄດ້ ສະນັ້ນ ເຮົາ​ຈຶ່ງ​ຕ້ອງ​ໄດ້​ປ້ອງ​ກັນ ສິ່ງ​ສຳຄັນ​ຫຼັກ​ຄື​ບໍ່​ໃຫ້​ໝາ ແມວ ເຈຍ ກັດ ຫຼື ຂູດ ສັດລ້ຽງ​ຕ້ອງ​ເອົາ​ໄປ​ສັກ​ຢາ​ກັນ​ວໍ້​ໃຫ້​ຄົບ 5 ເຂັມ ຖ້າ​ຫາກ​ຖືກ​ໝາ ແມວ​ກັດ ຂູດ ຕ້ອງ​ໄປ​ຫາ​ແພດ​ໝໍ​ສັກ​ຢາ​ທັນທີ ເຖິງ​ວ່າ​ສັດ​ທີ່​ກັດ​ນັ້ນ​ຈະ​ສັກ​ຢາ​ກັນ​ວໍ້​ແລ້ວ​ກໍ່​ຕາມ ຫາກ​ຖືກ​ສັດ​ກັດ​ຂູດ ຖ້າ​ຫາກ​ບໍ່​ໄດ້​ສັກ​ຢາ​ອາການ​ຈະ​ສາມາດ​ເລີ່ມ​ສະແດງ​ອອກ​ແຕ່ 4 ວັນ​ເຖິງ 6 ປີ ເຊື້ອ​ໄວ​ຣັດ​ຊະນິດ​ນີ້​ມັນ​ຈະ​ເຂົ້າ​ເສັ້ນປະສາດ ​ແລ້ວ​ຄ່ອຍໆ​ເສື່ອມ​ເຂົ້າ​ໄປ​ຫາ​ສະໝອງ ເຊິ່ງ​ອາການ​ເລີ່ມ​ຕົ້ນ​ມີ​ລັກ​ຊະນະ​ຕື່ນເຕັ້ນ ບໍ່​ຢາກ​ສຳຜັດ​ກັບ​ນ້ຳ ຄວາມ​ຈື່​ຈຳ​ເລີ່ມ​ບໍ່​ດີ ແລ້ວ​ກ້າວ​ໄປ​ສູ່​ການ​ເສຍສະຕິ ແລະ ເສຍ​ຊີວິດ​ໃນ​ໄລຍະ​ຕໍ່​ມາ.

ຂ່າວທີ່ກ່ຽວຂ້ອງ