ຂ່າວຫຼ້າສຸດ

ນ້ຳເທີນ 2 ສ້າງຕັ້ງກອງທຶນເພື່ອສະໜອງທຶນໃຫ້ການພັດທະນາ

236 12 ມິ.ນ. 2018 ຂ່າວໜ້າ​ໜຶ່ງ

ພິທີ​ເຊັນ​ສັນຍາ​ຮ່ວມ​ມື​ກ່ຽວ​ກັບ​ກອງ​ທຶນ​ພັດທະນາ​ນ້ຳ​ເທີນ 2 ລະຫວ່າງແຂວງ​ຄຳ​ມ່ວນ ກັບບໍລິສັດ ໄຟຟ້າ​ນ້ຳ​ເທີນ 2 ຈຳກັດ (NTPC) ຈັດ​ຂຶ້ນ​ວັນ​ທີ 6 ມິຖຸນາ 2018 ທີ່​ແຂວງ​ຄຳ​ມ່ວນ ຮ່ວມ​ລົງ​ນາມລະຫວ່າງທ່ານ ໂອ​ໄດ ສຸດາ​ພອນ ເຈົ້າແຂວງ​ຄຳ​ມ່ວນ ປະທານ​ຄະນະ​ກຳມະການ​ຍົກຍ້າຍ​ຈັດ​ສັນ​ໂຄງການ​ນ້ຳ​ເທີນ 2 ແລະ ທ່ານ ເຟຼ​ເດິ​ຣິກ ​ຮອຟ​ແມນ໌ ຜູ້ອຳນວຍການ​ໃຫຍ່​ບໍລິສັດ ​ໄຟຟ້າ​ນ້ຳ​ເທີນ 2 ມີ​ທ່ານ​ເຈົ້າເມືອງ​ນາ​ກາຍ ພະແນກການ ກົມ​ທຸລະ​ກິດ​ພະລັງງານ ຕະຫຼອດ​ຮອດ​ພາກສ່ວນ​ກ່ຽວຂ້ອງ ແລະ ອຳນາດ​ການ​ປົກຄອງ​ບ້ານ​ໃນ​ເຂດ​ໂຄງການ​ນ້ຳ​ເທີນ 2 ເຂົ້າ​ຮ່ວມ​ເປັນ​ສັກຂີ​ພິຍານ.

ກອງ​ທຶນ​ພັດທະນາ​ຊຸມ​ຊົນ​ຖືກ​ສ້າງຕັ້ງ​ຂຶ້ນ​ ເພື່ອ​ສະໜອງ​ທຶນ​ໃຫ້ການ​ພັດທະນາ​ຕ່າງໆ​ຢູ່​ເທິງ​ພູ​ພຽງ​ນາ​ກາຍ ເພາະວ່າ​ການ​ກໍ່ສ້າງ​ເຂື່ອນ​ນ້ຳ​ເທີນ 2 ເຮັດ​ໃຫ້​ຈຳເປັນ​ຕ້ອງ​ໄດ້​ຍົກຍ້າຍ​ປະຊາຊົນ​ຈຳນວນ 6.289 ຄົນ ທີ່​ດຳລົງ​ຊິວິດ​ຢູ່​ໃນ 17 ບ້ານ​ ໄດ້​ຮັບ​ຜົນ​ກະທົບ​ເທິງ​ພູ​ພຽງ​ນາ​ກາຍ ເພື່ອ​ຟື້ນ​ຟູ​ແບບແຜນ​ການ​ດຳລົງ​ຊິວິດ​ຂອງ​ປະຊາຊົນ ໂດຍ​ໄດ້​ຮັບ​ການ​ສະໜັບສະໜູນ​ຈາກ​ບໍລິສັດ​ໄຟຟ້າ​ນ້ຳ​ເທີນ 2 ລັດຖະບານ​ລາວ ​ໄດ້​ຈັດ​ຕັ້ງ​ປະຕິບັດ​ວຽກ​ງານ​ຊົດ​ເຊີຍ​ຄ່າ​ເສຍ​ຫາຍ​ໃຫ້​ແກ່​ຜູ້​ທີ່​ໄດ້​ຮັບ​ຜົນ​ກະທົບ ພ້ອມ​ທັງ​ດຳເນີນ​ແຜນ​ງານ​ພັດທະນາ​ຫຼາຍ​ດ້ານ ໂດຍ​ການ​ຮ່ວມ​ມື​ຂອງ​ແຂວງ​ຄຳ​ມ່ວນ ໂດຍ​ສະເພາະແມ່ນເມືອງ​ນາ​ກາຍ ແລະ ບໍລິສັດ ໄຟຟ້າ​ນ້ຳ​ເທີນ 2 ເພື່ອ​ສ້າງຕັ້ງ​ກອງ​ທຶນ​ພັດທະນາ​ນ້ຳ​ເທີນ 2 ຂຶ້ນ​ມາ​ຮອງ​ຮັບ​ໃນ​ການ​ພັດທະນາ​ຕ່າງໆ ໂດຍ​ປະຕິບັດ​ຕາມ​ນະໂຍບາຍ 3 ສ້າງ​ຂອງ​ລັດຖະບານ​ລາວ ກອງ​ທຶນ​ພັດທະນາ​ນ້ຳ​ເທີນ 2 ໄດ້​ຖື​ເອົາ​ອຳນາດ​ການ​ປົກຄອງ​ບ້ານ ແລະ ເມືອງ ເປັນໃຈ​ກາງຂອງ​ການ​ດຳເນີນ​ງານ​ທຶນ​ທີ່​ສະໜອງ​ໃຫ້​ໂຄງການ​ທີ່​ໄດ້​ຈັດ​ຕັ້ງ​ປະຕິບັດ ເປັນຕົ້ນແມ່ນ​ການ​ພັດທະນາ​ແບບແຜນ​ການ​ດຳລົງ​ຊິວິດ ແລະ ເສດຖະກິດ​ໄພ​ທະ​ມະ​ຊາດ ການ​ສຶກ​ສາ ສຸຂະພາບ ການ​ປົກ​ປ້ອງ​ສັງຄົມ ແລະ ການ​ສ້າງ​ຄວາມ​ເຂັ້ມແຂງ​ໃຫ້​ແກ່​ສະ​ຖາ​ບັນ ເຊິ່ງ​ຈະ​ໄດ້​ມອບ​ທຶນ​ໃຫ້​ແກ່​ຊຸມ​ຊົນ​ເປັນ​ຜູ້​ຄັດ​ເລືອກ ແລະ ໂດຍ​ປະຕິບັດ​ຕາມ​ທິດ​ຊີ້​ນຳ​ກ່ຽວ​ກັບ​ການ​ວາງ​ແຜນ​ພັດທະນາ​ບ້ານ​ແຫ່ງ​ຊາດ.

ກອງ​ທຶນ​ພັດທະນາ​ນ້ຳ​ເທີນ 2 ແມ່ນ​ອົງ​ປະກອບ​ໃຫຍ່​ອັນ​ໜຶ່ງ​ ຢູ່​ໃນ​ວຽກ​ງານ​ຄວາມ​ຮັບຜິດຊອບ​ທາງ​ສັງຄົມ​ຂອງ​ທຸລະ​ກິດ​ບໍລິສັດ ​ໄຟຟ້າ​ນ້ຳ​ເທີນ 2 ມັນ​ແມ່ນ​ມາດ​ຕະການ​ແບບ​ສະໝັກ​ໃຈ​ຂອງ​ບັນດາ​ຂາ​ຮຸ້ນ​ຂອງ​ບໍລິສັດ ເພື່ອ​ສົ່ງເສີມ​ການ​ພັດທະນາ​ທີ່​ສອດຄ່ອງ​ກົມ​ກືນ​ຢູ່​ເທິງ​ພູ​ພຽງ​ນາ​ກາຍ ຜ່ານ​ທາງ​ການ​ຈັດ​ສັນ​ລາຍ​ໄດ້​ໃນ​ອັດຕາ 1.000 ກີບ​ຕໍ່​ເມ​ກາ​ວັດຂອງ​ໄຟຟ້າ​ທີ່​ຜະລິດ​ໄດ້ ປັດຈຸບັນ ​ຈຳນວນ​ເງິນ​ທັງ​ໝົດ​ທີ່​ຄາດ​ຄະເນ​ວ່າ​ຈະ​ໄດ້​ຮັບ 750.000 ໂດ​ລາ​ສະຫະລັດ ຫຼື ປະມານ 6 ຕື້​ກີບ​ຕໍ່​ປີ ແລະ ຈະ​ສືບຕໍ່​ໄດ້​ຮັບ​ໃນ​ຈຳນວນ​ເທົ່າ​ນີ້​ໄປ​ຈົນ​ເຖິງ​ວັນ​ສິ້ນ​ສຸດ​ໄລຍະ​ສຳ​ປະທານ​ໃນ​ປີ 2035 ແນໃສ່​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າ ພາຍ​ໃນ​ເຂດ​ຍົກຍ້າຍ​ຈັດ​ສັນ ກໍ່​ຄື​ການ​ພັດທະນາ​ຊຸມ​ຊົນ​ຢູ່​ພູ​ພຽງ​ນາ​ກາຍ​ໄດ້​ມີ​ຊີວິດ​ການ​ເປັນ​ຢູ່​ທີ່​ດີ​ຂຶ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ