ສືບຕໍ່ຫັນລົງຮາກຖານ ຊ່ວຍທ້ອງຖິ່ນແກ້ໄຂບັນຫາຢາເສບຕິດ

160 12 ມິ.ນ. 2018 ຂ່າວໜ້າ​ໜຶ່ງ
ສືບຕໍ່ຫັນລົງຮາກຖານ ຊ່ວຍທ້ອງຖິ່ນແກ້ໄຂບັນຫາຢາເສບຕິດ

ຢາ​ເສບ​ຕິດ​ໄດ້​ສ້າງ​ຄວາມ​ບໍ່​ສະຫງົບ​ໃຫ້​ແກ່​ປະເທດ​ພວກ​ເຮົາ ທຳລາຍ​ຖັນ​ແຖວ​ໄວ​ໜຸ່ມ-ເຍົາວະ​ຊົນ ກໍ່ໃຫ້ເກີດ​ມີ​ການ​ຫຼິ້ນ​ກິນ​ຟຸມ​ເຟືອຍ ເປັນ​ນັກເລງ​ອັນ​ຕະ​ພານ ຂີ້ລັກ ງັດ​ແງະ ປຸ້ນ​ຈີ້​ຊີງ​ຊັບ ອາ​ລະ​ວາດ​ຕີ​ກັນ ນອກ​ນີ້ ຢາ​ເສບ​ຕິດ​ຍັງ​ເປັນ​ເສັ້ນທາງ​ໃຫ້​ເກີດ​ມີ​ການ​ຊື້​ຈ້າງ ແລະ ໃຫ້​ສິນ​ບົນ ສ້າງ​ຄວາມ​ເສຍ​ຫາຍ​ໃຫ້​ແກ່​ຖັນ​ແຖວ​ພະນັກງານ ແລະ ເຈົ້າ​ໜ້າທີ່​ຕ່າງໆ​ເປັນ​ຈຳນວນ​ຫຼວງຫຼາຍ ນີ້​ຄື​ການ​ລາຍ​ງານ​ຂອງ​ທ່ານ ພົນ​ຕີ ສົມ​ແກ້ວ ສີ​ລາ​ວົງ ລັດຖະມົນຕີກະຊວງ​ປ້ອງ​ກັນ​ຄວາມ​ສະຫງົບ ຕໍ່​ກອງ​ປະຊຸມ​ສະໄໝ​ສາມັນເທື່ອ​ທີ 5 ສະພາ​ແຫ່ງ​ຊາດ ຊຸດ​ທີ VIII.

ທ່ານ​ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ​ ໄດ້​ຊີ້​ແຈງ​ສາເຫດ​ຕົ້ນຕໍ​ທີ່​ພາໃຫ້​ເກີດ​ບັນຫາ ກ່ອນ​ອື່ນ​ກໍ່​ແມ່ນ​ປະຊາຊົນ​ບັນດາເຜົ່າ​ ຍັງ​ບໍ່​ທັນ​ເຊື່ອມ​ຊຶມ​ຢ່າງ​ເລິກເຊິ່ງ​ຕໍ່​ແນວທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ​ຂອງ​ພັກ ການ​ສຶກ​ສາ​ອົບຮົມ​ຜົນ​ຮ້າຍ​ຂອງ​ຢາ​ເສບ​ຕິດ​ບໍ່​ທັນ​ກວ້າງຂວາງ ການ​ບັງຄັບ​ໃຊ້​ກົດໝາຍ​ຕໍ່​ຜູ້​ພົວພັນ​ຊື້-ຂາຍ​ຢາ​ເສບ​ຕິດ​ບໍ່​ທັນ​ເຂັ້ມ​ງວດ ແລະ ເດັດຂາດ ຈຶ່ງ​ເຮັດ​ໃຫ້​ຜູ້​ກະທຳ​ຜິດ​ບໍ່​ເຂັດ​ຫຼາບ ບໍ່​ຢ້ານ​ກົວ​ຕໍ່​ລະບຽບ​ກົດໝາຍ (ຜ່ານ​ມາ​ເຖິງ​ວ່າ​ມີ​ການ​ຕັດສິນ​ຄະດີ​ຢາ​ເສບ​ຕິດ​ເຖິງ​ໂທດ​ປະຫານ​ຊີວິດ ແຕ່​ຕົວ​ຈິງ​ຜັດ​ບໍ່​ຖືກ​ປະຫານ​ຊີວິດ) ການ​ປະສານ​ງານ​ລະຫວ່າງ​ເຈົ້າ​ໜ້າທີ່​ຕຳຫຼວດ​ກັບ​ອົງການ​ໄອ​ຍະ​ການ ສານ ແລະ ອົງການ​ກ່ຽວຂ້ອງ​ແຕ່​ລະ​ຂັ້ນ​ ຍັງ​ບໍ່​ທັນ​ກົມກຽວ​ກັບ​ຕົວ​ຈິງ ຈຶ່ງ​ພາ​ໃຫ້ການ​ແກ້​ໄຂ​ຄະດີ​ຊັກ​ຊ້າ ແລະ ແກ່ຍາວ ມີ​ບາງ​ຄະດີ​ຈະແຈ້ງ​ແລ້ວແຕ່​ກໍ່​ບໍ່​ຕັດສິນ ຫຼື ຕັດສິນ​ຕ່ຳ​ກວ່າ​ຄວາມ​ຜິດ​ຕົວ​ຈິງ ມີ​ເຈົ້າ​ໜ້າທີ່​ແຕ່​ລະ​ຂັ້ນ​ຈຳນວນ​ໜຶ່ງ​ບໍ່​ໂປ່ງ​ໃສ ບໍ່​ທ່ຽງ​ທຳ​ໃນການ​ດຳເນີນ​ຄະດີ ປ່ຽນ​ຮູບ​ຄະດີ​ໜັກ​ເປັນ​ເບົາ ຜິດ​ເປັນ​ຖືກ ຂອງ​ແທ້​ເປັນ​ຂອງ​ປອມ ແລະ ອື່ນໆ.

ສຳລັບ​ການ​ແກ້​ໄຂ​ນັ້ນ ທ່ານ​ລັດຖະມົນຕີຢືນຢັນ​ວ່າ: ຈະ​ຕ້ອງ​ໄດ້​ສືບຕໍ່​ເຊື່ອມ​ຊຶມ ແລະ ປະຕິບັດ​ແນວທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ​ຂອງ​ພັກ ແລະ ເອກະສານ​ອື່ນໆ​ທີ່​ກ່ຽວຂ້ອງ ປັບປຸງ​ບັນດາ​ກົດໝາຍ ແລະ ນິຕິ​ກຳ​ຕ່າງໆ​ກ່ຽວ​ກັບ​ຢາ​ເສບ​ຕິດ​ໃຫ້​ຮັດກຸມ ຮັບປະກັນ​ບໍ່​ໃຫ້​ມີ​ຊ່ອງ​ຫວ່າງ​ໃຫ້​ກຸ່ມ​ຄົນ​ບໍ່​ດີ​ສວຍ​ໃຊ້ ແລະ ເຮັດ​ໃຫ້ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງຄົມ​ດ້ວຍ​ກົດໝາຍ​ ໄດ້​ຮັບ​ການຈັດຕັ້ງ​ປະຕິບັດ​ຢ່າງ​ເຂັ້ມ​ງວດ​ເດັດຂາດ ເຮັດ​ໃຫ້​ທຸກ​ຄົນ​ເກງ​ຂາມ​ຢ້ານ​ກົວ​ບໍ່​ກ້າ​ພົວພັນ ຂົນສົ່ງ ແລະ ຊື້-ຂາຍ​ຢາ​ເສບ​ຕິດ ປັບປຸງ​ກົງຈັກ​ການຈັດຕັ້ງ ແລະ ບຸ​ຄະລາ​ກອນທີ່​ເຮັດ​ໜ້າທີ່​ຄວບ​ຄຸມ ສະກັດ​ກັ້ນ ປາບ​ປາມ ແລະ ແກ້​ໄຂ​ບັນຫາ​ຢາ​ເສບ​ຕິດ​ໃຫ້​ມີ​ຄວາມ​ປອດ​ໃສ ໜັກ​ແໜ້ນ ແລະ ເຂັ້ມແຂງ ມີ​ຄວາມ​ຍຸຕິ​ທຳ​ຕໍ່ໜ້າ​ທີ່​ວຽກ​ງານ ສະໜອງ​ງົບປະມານ ວັດຖຸ ພາຫະນະ-ເຕັກນິກ​ທີ່​ທັນ​ສະໄໝ​ຮັບ​ໃຊ້​ວຽກ​ງານ​ຄວບ​ຄຸມ ສະກັດ​ກັ້ນ ປາບ​ປາມ ແລະ ແກ້​ໄຂ​ຢາ​ເສບ​ຕິດ​ທີ່​ຈຳເປັນ​ຢ່າງ​ເໝາະ​ສົມ.

ຕໍ່​ກັບ​ບັນຫາ​ດັ່ງກ່າວ ທ່ານ ​ພົ.ວ ຄຳ​ສຸກ ວີ​ອິນ​ທະ​ວົງ ຮອງ​ປະທານ​ກຳມາ​ທິ​ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ສະພາ​ແຫ່ງ​ຊາດ ໄດ້​ມີ​ຄຳ​ເຫັນ​ວ່າ: ສືບຕໍ່​ຫັນ​ລົງ​ຮາກ​ຖານ​ຊ່ວຍ​ທ້ອງຖິ່ນ​ແກ້​ໄຂ​ບັນຫາ​ຢາ​ເສບ​ຕິດ ກຳ​ແໜ້ນ​ທຸກ​ສະພາບ​ກົນອຸບາຍ ເລ້​ຫຼ່ຽມ ການເຄື່ອນ​ໄຫວ​ບັນດາ​ເປົ້າ​ໝາຍ​ທັງ​ລາຍ​ໃຫຍ່ ລາຍ​ກາງ ລາຍ​ຍ່ອຍ​ຢູ່​ພາຍ​ໃນ ແລະ ຕ່າງປະເທດ ແກ້​ແຕ່​ກົກ​ເຖິງ​ປາຍ ເອົາໃຈໃສ່​ໃນ​ການ​ດຳເນີນ​ຄະດີ​ຢາ​ເສບ​ຕິດ​ທີ່​ເຂົ້າ​ໃໝ່ ແລະ ຍັງ​ຄ້າງ​ຄາ​ອັ່ງ​ອໍ​ຢູ່​ບັນດາ​ອົງການ​ທີ່​ກ່ຽວຂ້ອງ​ໃນ​ໄລຍະ​ຜ່ານ​ມາ​ໃຫ້​ຫຼຸດຜ່ອນ​ລົງ ເຮັດ​ວຽກ​ງານ​ໂຄສະນາ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ປະຕິບັດ​ໃຫ້​ໄດ້ 4 ບໍ່ ຄື: ບໍ່​ຂາຍ-ບໍ່​ຊື້-ບໍ່​ເສບ ແລະ ບໍ່​ຜະລິດ​ປຸງ​ແຕ່ງໃຫ້​ກາຍເປັນ​ຂອງ​ທົ່ວ​ປວງ​ຊົນ ເພີ່ມ​ທະວີ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ​ກັບ​ບັນດາ​ປະເທດ​ໃກ້​ຄຽງ ແລະ ອື່ນໆ​ຈຳນວນ​ໜຶ່ງ ແນໃສ່​ເພື່ອ​ເຮັດ​ໃຫ້​ປະເທດ​ເຮົາ​ສືບຕໍ່​ມີ​ຄວາມ​ໝັ້ນຄົງ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ